46
Sa Tamasa si Koa Somana Koa Gita
(Keke kinera tadi na tie pa butubutu Livae pa tutina e Kora)
1 Tamasa sa nada aqoroana,
meke sa nada ṉiniraṉira,
sa nada tinokae pa totoso tasuna.
2 Gua asa ke be tava niu sa pepeso,
meke soru sari na toqere,
meke lodu pa lamana peava,
3 meke be puzaka sari na tovovo na ovaṉa sa lamana,
meke tava rizu sari na toqere pa tinaṉaziri tanisa lamana,
ba lopu kaqu matagutu si gita.
4 Koanana si keke ovuku sapu sa totolona sa kolona
si va qetui sari na tiena sa vasileana nomana tanisa Tamasa lavata,
sa vasina hopena sapu koa ia sa Tamasa Ululuna Hola.
5 Tamasa si koa koasa vasileana nomana sana,
ke lopu kaqu boka ta ṉovala si asa.
Kaqu tuturei mae pana munumunu vaqasa sa Tamasa
pude toka nia sa vasileana lavata sana.
6 Ṉoveoro pa minatagutu sari na butubutu.
Zama si Asa, ke tarazuzu sari na tie koa sa kasia popoa.* Sa ginuana si “tarazuzu sari na tie” babe “noloro guana oto huda sa kasia popoa.”
7 E Zihova Tadi na Qeto Minate si somana koa gita.
Sa Tamasa te Zekopi sa nada Aqoroana.
8 Mae mamu dogori sari na tinavete variva matagutudi,
pu evaṉi e Zihova pa kasia popoa.
9 Va nosoi Sa sari na vinaripera pa kasia popoa,
moku pani Sa sari na bokala tadi na tie varane,
moku va umumi Sa sari na dia hopere,
meke sulu pani Sa sari na dia lave varipera.
10 “Beto varipera,
mamu gilania sapu Arau sa Tamasa.
Arau si koa tava lavata koa ri doduru butubutu.
Tava lavata si Rau pa kasia popoa,” zama gua asa se Zihova!
11 E Zihova Tadi na Qeto Minate
si somana koa gita.
Sa Tamasa te Zekopi, sa nada Aqoroana ṉiṉirana.