31
Na Tinokae La koe Baṉara Lemueli
1 Na zinama tumatumae te baṉara Lemueli sapu tarae nia sa tinana koa sa:
2 Kei tuqu, kei tuqu koreo sapu podo soti igo rau,
kei tuqu, sa inolaṉa pa qua vinaravara.
3 Mu lopu oki pania koari na barikaleqe sa mua ṉiniraṉira,
na mua totoso arilaedi koarini pu ṉoṉovali sari na baṉara.
4 Lemueli, na lopu tadi baṉara sapu hire:
lopu tadi na baṉara si pude napo vaeni,
lopu tadi tie tuturaṉa si pude ehaka nia sa bia,
5 ura, be guana naponapo si kote muliṉi nia rini sapu sa gua sa tinarae,
meke sekei sari vina toṉoto koari tie ta ṉoṉovaladi.
6 Poni bia sarini pu korapa tata mate,
na vaeni koarini pu kuliusu;
7 Madi napo pude muliṉi ni rini sari dia hinabahuala
meke lopu balabala i sari dia tinasigiti.
8 Zama poni sari habahuala pu lopu boka zama puleni,
zama ni sari tinoṉoto tadi kasa pu loke dia poata.
9 Zama vura, mamu lopu va kalekale pa vinaripitui;
toketoke nia sa tinoṉoto tadi pu malaṉa meke saripu loke gedi.
Sa Barikaleqe Bokabokana
10 Esei boka dogoria sa barikaleqe sapu gotogoto nana hahanana?
Na arilaena si asa, holani sari na patu ṉedala.
11 Sa nana palabatu si raṉe hola ia si asa
meke loketoṉa si papaka nia sa.
12 Na lineana si va kamo lani sa barikaleqe koasa, loke tina sigiti,
pa doduruna sa nana tinoa.
13 Sa barikaleqe si vizata vulu meke lineni
meke tupiti sari lima ṉaliṉalidi tanisa.
14 Guana vaka sapu la holuholu si asa,
meke pa seu suraṉa pule mae ginani.
15 Tekulu si asa sipu korapa huporo;
meke tavete ginani si asa tadi nana tatamana
meke hia tinavete si asa koari nana nabulu vineki.
16 La vilitia sa si keke pepeso meke holua sa;
koari poata va gavori sa si letea sa sa inuma vaeni.
17 Na barikaleqe tavetavetena hola si asa;
sari limana si ṉiṉira gua tugo sari nana hiniva.
18 Dogoria sa sapu va vura poata sari nana hinoluholu,
meke sa nana zuke si lopu hoke mate pana boṉi.
19 Pa limana soti si tavete vura lozi si asa,
meke koari kakarutuna si tigisi vura nia sa sa poko.
20 Tukeli sa sari limana koari pu malaṉa,
meke huhuki sa saripu loke gedi.
21 Totoso kamo sa ibu, si lopu talotaṉa ni sa sari nana tatamana;
ura doduru si ele va sage poko arilaedi tu.
22 Taveti sa sari poko ivara tana nana teqe;
meke asa si va sage poko lineni meke pepolo.
23 Sa nana palabatu si ta pamaṉaena pa vasina varivarigarana koasa vasileana;
hoke la habotu si asa pa varikorapadi rina palabatu koasa popoa.
24 Tavete poko lineni sa barikaleqe bokabokana meke holuholu ni sa,
na belete si la holuholu ni sa pa sitoa.
25 Na ṉiniraṉira meke pinamaṉa si pokopoko ni sa;
boka hegere ni sa sari na rane pa kenuna.
26 Zama si asa pa ginilagilana lohina,
meke na vina tumatumae si hoke tozi sa pa meana.
27 Doduru ginugua pa nana kinoa tatamana si kopu ni sa
meke lopu hoke hakohako si asa.
28 Tekulu sari nana koburu meke poza nia, “Tamanaena,” rini;
sa nana palabatu ba va lavatia tugo:
29 “Soku barikaleqe si taveti tugo sari ginugua sapu arilaedi,
ba hola beto ni agoi.”
30 Dinoṉo lea si kokoha meke tinolava si tuturei hola taloa;
ba sa barikaleqe sapu pamaṉa nia se Zihova si kote ta vahesi.
31 Pia ia si asa koari doduru pu taveti sa.
Sari nana tinavete va lavatia si asa koari na tie.