1 Meke tozi nia e Zihova se Mosese, 2 “mamu tozini sari na tinoni Izireli, ‘Mi koa madi, via, meke toṉoto si gamu, ura Arau Zihova, sa mia Tamasa sina Tamasa madiqu, viaqu, meke toṉoto, gua.* Liv 11:44-45; 1 Pit 1:16 3 Hopeke gamu doduru si kaqu pamaṉa nia sa tinamu meke tamamu, meke kopu nia sa rane Sabati, gua puta tugo sapu garununi Rau koa gamu, ura Arau tugo se Zihova sa mia Tamasa.* Ekd 20:8,12; Diut 5:12,16

4 Mu lopu kekere la na vahesi sari na beku; babe taveti pa aeana na qolo na siliva na gua sari na tamasa beku pude tamugamu, ura Arau tugo se Zihova sa mia Tamasa.* Liv 26:1; Ekd 20:23, 34:17; Diut 27:15

5 Totosona pu tavetia gamu sa vina vukivukihi tana binaere la koe Zihova si mi tavete la nia koa Sa pa siraṉa gua sapu kaqu ta qetue koa Sa. 6 Sa masana sa kurukuru sapu tava mate si kaqu ta hena tugo koasa rane asa, babe pa koivugona. Meke be koa hola meke kamoa sa vina ṉeta rane si kaqu ta sulu va murimuri beto si arini. 7 Be ta hena koa keke tie si asa koasa rane vina ṉeta si lopu via si asa, meke lopu kaqu ta qetue si asa koe Zihova. 8 Ba be hena ia keke tie si asa si sea mo si asa, sina ele tavetavete hoboro nia sa sapu ele tava madina koe Zihova, meke namu lopu kaqu koa hola koari na tie Izireli si asa.

9 Pana pakepakete si gamu koari na mia inuma, si mamu lopu pakepakete kamo la gua pa hukihukiridi ri na inuma, meke lopu kaqu pule la si gamu meke seke vagi gamu batudi sari na huiti saripu koa holadi vasina.* Liv 23:22; Diut 24:19-22 10 Mu lopu pule la pa korapana sa mua inuma vaeni pude pudiki luli vagi sari na vua qurepi d saripu lopu vagi goi babe tava hoqa palae; mamu veko vala i koari na tie malaṉadi babe na tie karovodi. Ura Arau tugo se Zihova sa mia Tamasa. 11 Mu lopu hiko na sekesekei na kokoha.* Ekd 20:15,16; Diut 5:19,20 12 Mu lopu zama kokoha pa tinokotokoro koasa pozaqu Rau, ura kote ta ṉoṉovala sa pozaqu Rau. Ura Arau se Zihova sa mia Tamasa.* Ekd 20:7; Diut 5:11; Mt 5:33

13 Mu lopu sekesekei nia na ṉoṉovalia goi sa turaṉamu babe hikoi sari na likakalae tanisa. Mamu lopu tuqe va seunae nia keke boṉi goi sa tinabarana keke tie tavetavete.* Diut 24:14-15 14 Mu lopu zama va kaleania goi sa tie nulina babe veko nia keketoṉa goi sa kenuna sa tie behuna pude vata tubarae nia. Ba mu va tabe Au, ura Arau se Zihova sa mia Tamasa.* Diut 27:18

15 Mamu zama va hinokara na balabala va toṉoto, pana vizavizata si gamu koari na binalabala tana tinarae pa vinaripitui. Mu lopu toka kaleania sa tie habahuala babe sa tie tagotagona, ba pa tinoṉoto si kaqu pitua goi sa tie. * Ekd 23:6-8; Diut 16:19 16 Mu lopu ene varikarovae na zama ṉoṉovala koari na tie, babe ele ta zutu si keke tie, si mamu zama hinokara pude lopu kaqu mate si asa pa zinutu kokoha. Ura Arau se Zihova sa Mia Tamasa.

17 Mu lopu kuhana nia pa korapa bulomu sa turaṉamu. Ba mamu nore va toṉotia si asa, pude lopu kaqu somana nia goi sa nana sinea.* Mt 18:15 18 Mu lopu tubehia goi si keke tie babe kana la ia mo goi si asa doduru totoso, ba mu tataru nia si asa gua puta tugo sapu tataru pule nigo telemu si agoi, ura Arau se Zihova.* Mt 5:43, 19:19, 22:39; Mk 12:31; Lk 10:27; Rom 13:9; Qal 5:14; Zem 2:8

19 Mu va tabei sari na qua tinarae hire: Mu lopu varivari papani sari na votiki kurukuru. Mu lopu letei sari karua votiki kiko pa keke ilaka. Mu lopu va sagea sa poko sapu ta piti varisotoi koari karua poko votikaedi.* Diut 22:9-11

20 Be keke vineki sina pinausu tana keke tie pu pausuna, meke ta vizata vekona si asa, ba lopu ele ta veko pinirovetuna si asa, meke va sea ia keke tie si asa sipu lopu ele ta rupahana si asa koasa tie pu pausuna, si kaqu tava kilasa si arini; ba lopu kaqu tava mate sari karua hire, sa vineki meke sa tie pu va sea ia, sina lopu ele ta rupahana sa vineki hie. 21 Kaqu paleke mae nia sa tie si keke sipi kokoreo pa sasadana sa Ipi Hope, pude na vina vukivukihi tinaleosae koe Zihova. 22 Kaqu vagia sa hiama sa sipi kokoreo meke tavetia sa sa vina vukivukihi tinaleosae pa kenuna e Zihova pude na vinulasana sa nana sinea sapu ele tavetia sa, si kaqu tiqe taleosae koe Zihova.

23 Pana kamoa gamu sa popoa Kenani meke letei sari na vua huda, si kaqu balabala ni bonidi gamu sari na vua huda koari ka ṉeta vuaheni kekenu. Koari vuaheni arini si lopu kaqu henai gamu sari na vuadi rini. 24 Meke koasa vuaheni vina made si kaqu tava madi sari doduru vua huda pude na vinariponi vinahesina e Zihova si arini. 25 Ba koasa vuaheni vina lima si boka henai gamu sari na vuadi. Be lulia gamu sapu gua asa, si kote vua va sokusoku sari na mia huda. Arau se Zihova sa mia Tamasa.

26 Mu lopu henai sari na masa saripu koai eharadi. Mu lopu tavetavete potana, babe hata tinokae koari na tomate.* Zen 9:4; Liv 7:26-27, 17:10-14; Diut 12:16,23, 15:23, 18:10 27 Mu lopu koto va kaleani sari na kalu pa karua kalina sa batumu meke sari na gumi pa asemu,* Liv 2:5; Diut 14:1 28 meke lopu kubekubere ia sa tinimu babe magumagua pude vata dogoro nia sa tinalotaṉana sa tie pu matena, ura Arau se Zihova.

29 Mu lopu vata evaṉae nia zelepade maqota goi sa tumu vineki. Be ta evaṉa sapu gua asa si kote siṉia na maqota meke na kinaleana pa vinahesi beku sa doduru popoa.* Diut 23:17 30 Kaqu kopu nia gamu sa rane Sabati, mamu pamaṉa nia sa Qua Zelepade, vasina tavahesi si Rau, arau se Zihova.* Liv 26:2

31 Mu lopu la tepa tinokae koari na tie vakuvakutaedi na tie matemateana. Be tavete gua asa si goi si kote na tie nerumu si goi. Ura Arau se Zihova sa mia Tamasa.* Diut 18:11; 1 Samuela 28:3; 2 Baṉ 23:4; Ais 8:19

32 Mu pamaṉani na va lavati sari na barogoso na kaleqe. Mu pamaṉa Nau si Arau sa mua Tamasa; ura Arau se Zihova.

33 Mu lopu ṉoṉovali sari na tie karovodi pu koadi pa mua popoa. 34 Ba mu kopu guni mo na turaṉamu soti pa mua popoa pa Izireli. Mu tataru kekeṉoṉo guni gua pu tataru pulenigo. Mu balabala ia sapu gamu ba gua tugo, na tie karovomia mo totoso koa pa Izipi si gamu. Ura Arau se Zihova sa mia Tamasa.* Ekd 22:21; Diut 24:17-18, 27:19

35 Mu lopu sekesekei pa pinadapada pa ginele, na minamata meke sinoku.* Diut 25:13-16; TTA 20:10; Izk 45:10 36 Kaqu gotogoto meke hinokara sari na mia pinadapada pa ginele, na minamata, na sinoku, meke na pada kolo. Ura Arau se Zihova sa mia Tamasa. 37 Mamu va tabei gamu sari doduru Qua tinarae na zinama. Ura Arau se Zihova.’ ”