1 Sipu ele karovo beto sari doduru butubutu Izireli pa kali karovona sa ovuku, si zama la koe Zosua se Zihova, 2 “Mu vizati ka manege rua tie, keke pa hopeke butubutu, 3 mamu garuni pude vagi ka manege rua patu pa vari kokorapana puta sa Ovuku Zodani vasina puta tugo sapu turu sari na hiama. Tozini pude paleki sari na patu pude la vekoi vasina kote la kuri gamu sari na mia ipi pude koa kohite boṉi,” gua si Asa.

4 Ke tioki Zosua sari ka manege rua tie pu ele vizati sa, 5 meke zamai sa, “Mi topue ene la pa Zodani pa kenuna sa Bokese Tanisa Vinariva Egoi te Zihova sa mia Tamasa. Hopeke gamu si kaqu kokovara palekia keke patu, keke pa hopehopeke butubutu Izireli. 6 Sari na patu arini si pude na vina balabala koari na tie sapu gua evaṉia e Zihova. Vugo na repere pana nanasa sari na mia koburu, ‘Nasa laedi sari na patu hire?’ 7 si kote tozini gamu, sapu hire sina vina balabalana sipu popa sa kolona sa ovuku totosona ta paleke karovo sa Bokese Tanisa Vinariva Egoi te Zihova. Sari na patu sara si kaqu va balabala ni koari na tie Izireli doduru totoso gua sapu evaṉia e Zihova tani.”

8 Lulia tugo rini, gua sapu tozi nia e Zihova koe Zosua. Paleki tugo rini sari ka manege rua patu pa vari kokorapana sa Ovuku Zodani, keke tana hopeke butubutu Izireli. Meke la veko varigarani vasina va turui rini sari na dia ipi. 9 E Zosua ba la veko varigarani tugo si ka manege rua patu pa vari kokorapana puta sa Ovuku Zodani, vasina turu noso sari na hiama pu palekia sa Bokese Tanisa Vinariva Egoi te Zihova. Sari na patu arini si korapa koadia kamoa pa rane ṉinoroi. 10-11 Tuturei karovo la sari na tinoni pa kali karovona sa ovuku.

Sipu ele karovo beto la sari na tinoni pa kali karovona sa ovuku si tiqe ene luli la koa rini sari na hiama, palekia rini sa Bokese Tanisa Vinariva Egoi te Zihova. 12 Sari na tiena sa butubutu te Rubeni meke Qadi, meke kukuruna sa butubutu te Manase si va namanama pude varipera. Arini si karovo kekenu koari na tinoni, gua sapu tozini e Zosua pude tavetia. 13 Pa kenuna e Zihova, si ari ka made ṉavulu puta tina tie si karovo la pa kalina sa Ovuku Zodani meke la koasa pezara tata pa Zeriko pude la varipera. 14 Pa rane asa si podalae pamaṉa nia rina tie Izireli se Zosua, sina koa gua koasa tinavete pu evaṉia e Zihova koa sa.

15-16 Meke tozi nia e Zihova se Zosua pude tozini sari na hiama pu palekena sa Bokese tanisa Vinariva Egoi te Zihova pude madi taluarae koasa Ovuku Zodani meke sage mae. 17-18 Ke tozini Zosua sarini, meke sipu haele sage kamoa rina hiama sa taqelena sa ovuku, si podalae totolo pule sa ovuku meke siṉi sage kamo pule sa kolo pa taqelena.

19 Sa totoso sapu karovia rina tinoni sa Ovuku Zodani si pa rane vina manege puta koasa sidara vinakeke, meke la va turui rini sari na dia ipi pa Qiliqali pa kali gasa rimata pa Zeriko. 20 Vasina si la varigarani e Zosua sari ka manege rua patu pu palekeni rini koasa Ovuku Zodani. 21 Meke zamai sa sari na tie Izireli, “Vugo na repere pana nanasani gamu rina tumia, ‘Nasa laedi sari na patu hire,’ gua, 22 si mi tozi ni sa totoso pu popa sa ovuku meke ene karovia rina tie Izireli si asa. 23 Tozini sapu e Zihova sa mia Tamasa si va popaia sa kolona sa Ovuku Zodani meke karovo si gamu. Gua tugo sapu va popaia Sa sa Kolo Ziṉara meke enea gita. 24 Koa gua koasa ginugua hie, si madi gilania ri doduru tie pa kasia popoa sapu ṉiṉira hola se Zihova sa nada Tamasa, meke kaqu va lavatia gamu ninae rane ka rane si Asa,” gua se Zosua.