35
1 Meke zama pule se Elihu,
2 “Balabala ia goi sapu toṉoto si guahe?
Zama si agoi, ‘Kote tava kalalasa qua koe Tamasa.’
3 Ba nanasa tu si goi, ‘Nasa sa lineana vagi nia rau,
meke nasa si kote vagi nia rau koasa kinoa toṉoto?’
4 Hiva olaṉa atu gamu rau, agoi,
meke sari na mua baere.
5 Eṉa sage la pa maṉauru, mamu dogoria,
doṉo la koari na lei panaulu.
6 Be guana sea si goi, si lopu kote ta sigiti nia Tamasa;* Zob 22:2-3
be soku sari mua sinea, si lopu kote ta ene ni Sa.
7 Ba be na tie toṉoto si goi, na sa kote poni nia goi si Asa?
Na sa si kote vagia Sa pa limamu goi?
8 Sari mua kinaleana si kote raza koari tie gugua agoi,
meke sari mua lineana si kote kamo mo koari tie.
9 Ari na tie si hoke kabo vura totoso noma sa ṉinovaṉovala,
tioko hata tinokae si arini pude harupi koa ri na tie ṉiṉiradi.
10 Ba loke tie si nanasa, ‘Avei sa Tamasa pu tavetequ,
pu boka va kera i sari tie pa totoso tinasuna,
11 pu va tumatumae gita hola ni sari na kurukuru pinomo,
meke va gilae gita hola ni sari na kurukuru tapuru?’
12 Gua ke lopu olaṉa si Asa pana kabo vura sari tie,
sina tie kaleadi si arini meke vahesi puleni.
13 Ura, loke ginugua pude avosi Tamasa sari dia kinabo;
sa Tamasa pu tagoi sari doduru ṉiniraṉira si lopu kote hite liṉana lai.
14 Pude gua asa si kote vegua meke avoso igo Tamasa
totoso zama si goi sapu lopu boka dogoria goi si Asa?
Ba kote ponigo lolomo Sa pude avosigo pana aqa hite si agoi.
15-16 Meke zama si goi sapu sa Tamasa si lopu hoke va kilakilasa tie,
meke lopu va gunagunana nia Sa sa sinea, gua.
Ke e Zobi si zama hoboro sisigiti,
zama va soku si asa ba lopu koa ia ginilagilana.”