20
Zopara
1 Meke olaṉa se Zopara sapu mae guana pa popoa Neama,
2 “Zobi, va talotaṉa au goi.
Gua asa ke kaqu olaṉa igo rau.
3 Zama ṉoṉovala au goi si rau,
ba tumae nia qua gua sapu kote olaṉa guni nigo.
4 Vegua lopu gilania tu goi sapu pa pinodalaena sa kasia popoa,
sipu podalae ta veko sa tie pa popoa pepeso,
5 si papaka mo sa totoso sapu hegere na komolo sari tie kaleadi,
meke pa totoso hite mo si koa qetu sari na tie huporo?
6 Be ululu kamo la pa maṉauru sa vinahesi pule tanisa,
meke tiqu la koari na lei sa batuna,
7 ba kote ta givusu palae guana kavuru si asa,
meke arini pu gilania, si kote nanasa, ‘Avei si asa?’ gua.
8 Kote murimuri guana pinutagita meke lopu ta dogoro pule,
kote ta hadu taloa si asa guana keke dinogodogorae pana boṉi.
9 Arini pu dogoria ba lopu kote dogoro pulea,
sa nana vasina ba lopu kote va kamo pulea si asa.
10 Sari nana koburu si kote va pule la i sari na likakalae koari na tie malaṉa,
meke kaqu va pulei rini sari na tinagotago hinikodi.
11 Be korapa vaqurana sa,
ba sa susurina si kaqu eko pa kavuru.
12-13 Sari na kinaleadi si lomoso koasa,
ke veko seunae i sa pa ṉuzuna pude koa hola sari liṉiliṉidi.
14 Ba hoke iliri pasa sari na ginani,
guana poizini noki pa tiana.
15 Kote lua vurani sa sari tinagotago pu onoli sa,
e Tamasa kote vagi vura puleni pa tiana.
16 Kote onolo vagia sa tie kaleana sa poizini tanisa noki;
sari livona sa noki si kote va matena sa.
17 Lopu kaqu dogoro pulea sa sari oela olive sapu totolo guana ovuku,
ba be na zipale na meleke sapu totolo guana leana.
18 Kaqu va pule i sa sari doduru likakalae pu mabo ni sa,
lopu kaqu ta poni lolomo pude qetu si asa koari na nana tinagotago.
19 Sina ṉoṉovali sa sari na tie malaṉa meke va habahuala i sa,
meke vagi sa sari na vetu sapu votiki tie taveti.
20 Sa puhi tanisa si loke kokoina;
doduru nana tinagotago si lopu boka va sarea pa minate.
21 Lopu hoke koa hola sa ginani pana henahena si asa,
ke sa nana tinagotago si lopu kaqu koa hola.
22 Pana tagotago va hola si asa si kote kamoa na tinasuna,
na tinalotaṉa nomana si kote raza la koasa.
23 Vekoa, mani henai doduru gua sapu hiva ni sa!
Kote va kilasia Tamasa si asa pa Nana tinaṉaziri na binugoro.
24 Be boka govete nia sa sa vinaripera,
ba na tupi boronizi si kote nuquru karovo pa tinina.
25 Kote daku vura nia sa sa tupi pa mudina,
meke va vura ia pa berona sa batu tupi ṉedalana,
meke sa minatagutuna sa minate si kote kamo la koa sa.
26 Doduru tinagotago tanisa si ta huara palae beto,
kote sulu pani na nika, sapu lopu na tie va katua,
kote ta sulu tugo si asa meke sari na nana tatamana.
27 Gua na tie va sosode, sa maṉauru
meke sa pepeso si kote tozi vura ni sari nana sinea.
28 Na naqe kote paleke taloa nia sa nana vetu,
guana totolo ṉiṉira pana raza sa tinaṉaziri te Tamasa.
29 Asa sa hinia poni ni Tamasa sari na tie kaleadi,
sa pinia sapu va nama ni Tamasa koa rini.”