1 Meke turaṉa lani au sa pa sadana sa Lose Hopena pa Zelepade meke pada ia sa sa moatadi sari goba pa vari kalina meke sa pada si lima mita. 2 Sa nuqunuquruana si lima mita gelena meke sa labena. Sa geledi sari karua goba pa varikalina sa sasada nuquru si hopeke karua mita meke lima ṉavulu sentimita. Pada ia tugo sa sa Lose Hopena meke hiokona mita gelena meke manege puta mita labena.

3 Meke nuquru la si asa koasa Lose Hopena pa Hopena. Pada i sa sari moatadi ri karua kalina sa sasada meke hopeke keke mita moatadi, meke sa labena sa sasada si ṉeta mita. Sari gobagoba pa vari kalina sa sasada si ṉeta meke lima ṉavulu sentimita labedi. 4 Meke pada ia sa sa Lose Hopena pa Hopena meke sa gelena si manege puta mita meke sa labena si manege puta mita tugo. Hie sa lose pa korapana la. Meke zama mae si asa koa rau, “Hie sa Lose Hopena pa Hopena.”

5 Meke pada ia sa sa gobana sa Zelepade meke ṉeta mita sa moatana sa gobagoba, meke sari hopeke lose pa kali gobana sa Zelepade sapu vari likohae nia sa doduruna sa Zelepade si karua mita labedi. 6 Ka ṉeta sari hatara lose pa kali gobana sa Zelepade. Hatara pa pepeso, hatara kokorapa, meke hatara panaulu, meke ka toloṉavulu lose si koa pa keke hatara. Na koa ia na vaṉavaṉa sa gobana sa Zelepade vasina hake sari palakolidi rina hataradi rina lose pa kokorapa meke panaulu. Ke sari na palakoli koari na lose si lopu soto nuquru la koasa gobana sa Zelepade. 7 Sari lose pa hatara panaulu si labe holani sari lose koari karua hatara panapeka koasa, meke sa hatara pa kokorapa si labe hola nia sa hatara pa pepeso; sina sa gobana sa Zelepade si moata pa pepeso meke hiteke sage kamo panaulu. Na halehaleana si podalae pa hatara pa pepeso kamo panaulu, ene gua koasa hatara pa kokorapa. 8 Meke dogoria rau sapu pa vari likohaena sa Zelepade si na tinamunu pepeso sapu ṉeta mita ululuna. Vasina si habotu sari na lose pa kali gobana sa Zelepade. 9-11 Sa goba pa sadadi ri na lose pa vari kalina sa Zelepade si karua mita lima ṉavulu sentimita moatadi. Sa siraṉa ene pa sada sapu varilikohae ni sari na lose pa kali gobana sa Zelepade si karua mita lima ṉavulu sentimita labena. Sa pada podalae koasa goba tia vura tadi na lose meke kamo koasa hukihukirina sa buturu sapu hake ia sa Zelepade si manege puta mita. Sa siraṉa eneneana si kamo koari na sasada nuquru koari na lose, keke si pa kali gede meke keke si pa kali matao.

12 Sa vetu sapu tia la pa varivarigarana tata koasa Zelepade pa kali lodu rimata si toloṉavulu lima mita labena. Sari gobana sa vetu asa si karua mita lima ṉavulu sentimita moatadi pa vari likohaena meke sa gelena si made ṉavulu lima mita.

13 Pada ia sa tie sa Zelepade meke kamo lima ṉavulu mita gelena, meke sa varivarigarana podalae pa mudina sa Zelepade meke turaṉae sa vetu pa kali lodu rimata meke sa gobana sa si lima ṉavulu mita tugo geledi. 14 Sa labena sa varivarigarana pa kali gasa rimata koasa Zelepade podalae koasa kenuna sa Zelepade si lima ṉavulu mita. 15 Meke pada ia sa sa gelena sa vetu sapu tia la koasa varivarigarana pa mudina sa Zelepade, kamo lai sari lose pa vari kalina sa si kamo pa lima ṉavulu mita tugo.

Sari gobana sa Lose Hopena, sa Lose Hopena pa Hopena meke sa lose nuqunuquruanana, 16 sari dedegere koasa sasada, sa hatara, sari vuida ṉizupudi si tava opo paere labete beto. Sa hatara, sa goba sapu kamo la koari na vuida meke sari vuida si ta tava paere beto. 17 Pa kali sage koasa sasada nuquru la koasa Lose Hopena pa Hopena, meke sari gobana pa korapana sa Lose Hopena pa Hopena meke koasa Lose Hopena si ta peqo koari na kineha 18 mateana serubimi meke na huda pamu. Vari solasola i, huda pamu meke na serubimi gua. Sari serubimi si hopeke karua isumatadi. 19 Sa isumata tie si tia la koasa huda pamu pa keke kalina meke sa isumata laione si tia la koasa huda pamu pa keke kalina. Ta peqo si hire pa doduru gobana sa Zelepade. 20 Podalae pa hatara meke kamo la panaulu koari doduru goba koasa Lose Hopena si tava peqo la sari na serubimi meke na huda pamu. 21 Sa sasada koasa Lose Hopena si vari ṉoṉoi ululuna meke labena meke gua tugo sa sasada tanisa Lose Hopena pa Hopena.

22 Koa nana si keke tevolo huda hopena sapu keke mita lima ṉavulu sentimita ululuna meke sa labena si keke mita meke keke mita gelena; sari iiona, hubina meke vari kalina si na huda beto mo. Zama sa tie koa rau, “Hie sa tevolo sapu koa pa Kenuna e Zihova,” gua.

23 Sari sasada koari na Lose Hopena meke sa Lose Hopena pa Hopena si hopeke karua tukutukudi. 24 Sari tukutuku koari hopeke sasada si sigoto pa hinisi ke tukele gua pa kokorapana. 25 Koari na tukutuku koasa sasada pa Lose Hopena si ta peqo la sari na serubimi meke na huda pamu gugua sapu ta peqo la koari na goba, meke na kekepi sapu na huda tavete nia rini si koa pa kenuna sa lose nuqunuquruana. 26 Koari na goba pa kalina sa lose nuqunuquruana si koa dia sari vuida ṉizupudi sapu ta peqo la sari na serubimi meke huda pamu pa hopeke vari kalidi. Sari lose pa vari kalina sa Zelepade si koai tugo na kekepi.