Buka Hope 2 TIMOTE 4

1 Pa kenuna sa Tamasa meke e Zisu Karisito, sapu kaqu varipitui ni sari na tie toadi meke na tie matedi, pa Nana pinule mae meke pa Nana Binaṉara, si garunigo rau, 2 pude mu tarae nia sa Zinama te Tamasa. Mamu koa va namanama pude tozi vura nia doduru totoso be qetu nia babe lopu qetu nia rina tie. Mu norei, na va toṉoti, na va ṉiṉirai, meke va tumatumae i sarini pa doduru ṉinoṉo. 3 Sina kote mae sa totoso, pana lopu kote hiva va avosi rina tie sari na vina tumatumae leadi. Ba kote hiva va avosi tu rini sari na votiki vina tumatumae, meke kote hatai rini sari soku votivotiki tie va tumatumae, pude tozi ni sapu gua hiva va avosi rini. 4 Meke kote korodia hokara pude va taliṉa la ia sa hinokara, meke kote va avoso la i tu rini sari na vivinei kokohadi. 5 Ba agoi, si mamu kopu pule nigo koari doduru mua hahanana, turu va nabu koari na tinasuna, mamu tarae nia sa Inavoso Leana koari na tie pude madi va hinokara, mamu tavete va gorevura i sari doduru mua tinavete ninabulu.

6 Ba sapu arau si ele kamo mae sa totoso, pude kaqu tava vukivukihi sa qua tinoa, meke hiera mo sa qua totoso pude taluarae. 7 Ele varipera nia rau sa vinaripera leana, ele haqala kamoa rau sa vina betona sa qua vinarivose, meke ele kopu valeana nia rau sa rinaṉeraṉe. 8 Meke kamahire si korapa va naqitia Tamasa sa qua pinia, sapu sa tinoṉoto tanisa Baṉara. Sa tinoṉoto asa, si kote poni nau sa Baṉara, sa tie varipitui toṉotona pa rane vinaripitui. Lopu arau mo, ba gua tugo sari doduru tie pu aqa va ṉoṉo nia sa Nana minae.

Sari na Tinepa Vina Betobeto Koe Timote

9 Mamu podeke sisigitia pude tuture mae koa rau. 10 Ura e Dimasi si tataru nia sa kasia popoa hie, ke luara pani au sa, meke la gua nana pa Tesalonaika. E Kiresenisi si la pa Qalesia, meke e Taetusi si la gua pa Dalamesia.* 11 Telena mo e Luke si korapa koa nana koa rau he. Ke mamu vagia se Maka, mamu turaṉa mae nia koa rau, sina kote boka toka nau sa pa qua tinavete.* 12 Ele garunu la nia rau pa Episasi se Tikikasi.* 13 Pana mae goi si mamu paleke mae nia sa qua koti sapu veko hola ia rau koe Kapasi pa vasileana Toroasi. Paleke maeni sari na Kinubekubere Hope ta viqusudi, meke gua tugo sari na Kinubekubere Hope saripu ta tavetae kapu kurukuru.*

14 Se Alekezada sapu sa tie tavete kopa, si ele ṉoṉovalau si rau, ba sa Tamasa tu kote va kilasa nia koasa sapu gua tavetia sa. 15 Maqu va balau igo koa sa, sina kana zoṉazoṉa ia sa sa inavosona e Zisu Karisito.

16 Pa qua totoso kekenu sapu lavelave pule nau telequ pa vinaripitui, si loke tie toka nau, ba luara veko pani au ri doduru. Mani taleoso ni Tamasa si arini. 17 Ba turu kapae koa rau sa Baṉara, meke va ṉiṉirau Sa pude qu tarae va hokoto ia rau sa Inavoso Leana, meke pude madi avosia ri doduru tie Zenitailo, meke pude maqu ta harupu pa minate si rau. 18 Kote harupau e Zisu Karisito koari doduru tinasuna meke kote turaṉa va kamo valeanau Sa koasa Nana Binaṉara pa Maṉauru. Mani koa koa Sa sa vina lavata ninae rane ka rane. Emeni.

Zinama Tataru Vina Betobeto

19 Tozia sa qua tataru koari Pirisila e Akuila, meke koe Onesiporasi meke sa nana tatamana.* 20 Se Erasitasi si koa hola pa Koriniti, meke veko hola ia rau pa Mailitasi se Toropimasi, sina ta razae moho si asa.* 21 Mamu podekia pude tuturei mae sipu lopu ele kamo sa totoso ibu.

Dia tataru koa goi gua sari Eubulusi, Pudenisi, Lainusi meke Kalaudia, meke gua tugo sari doduru tamatasi hire pa linotu.

22 Sa Tamasa si mani koa koasa maqomaqomu, meke sa Nana tataru lopu ta ṉana kamona si mani koa koa gamu doduru.