84
Ngoangki Mi nan Tehnpas en Koht p TITLE NI MAHSEN EN IPRU: En Peneinei en Kora ar melkahka.
1 Maing KAUN, Wasa Lapalap, ia uwen ei poakohng Tehnpasomwi Sarawio!
2 Ia uwen ei anahne mi wasao!
I ngoangkilahr iang mi nan Tehnpas en KAUN-O.
Paliwereiet oh ngeni unsek kin kokoulki ei peren
ong Koht ieias.
3 Menpihr kan wiadahr pasarail loale,
re pil diaradahr dewerail wasao;
re ahpw kin neineitik limwahn sapwellimomwi pei sarawi kan,
Maing KAUN, Wasa Lapalap, ei nanmwarki, oh ei Koht.
4 Meid pai irail kan me kin kousoan nan Tehnpasomwi Sarawio,
kokouliong oh kapikapinga komwi ahnsou koaros.
5 Meid pai irail kan me kin ale kehlparail sang rehmwi,
oh kin ngoangki iang seiloakowohng pohn Nahna Saion.
6 Ni ar kin keid nan wahu madekeng en Paka,
e kin wiahla utuhnpihl;
keteu en menseng ahpw kin kadirekihla pihl wasao.
7 Ni ar kin kohkohwei, re kin kekehlailla;
re ahpw pahn udiahl Koht en koht akan nan Saion.
8 Maing KAUN, Koht Wasa Lapalap, komw ketin karonge ei kapakapet;
komwi Koht en Seikop, komw ketin karonge ie!
9 Maing Koht, komw ketin kupwuramwahwih at nanmwarki,
nanmwarkio me pein komwi ketin pilada.
10 Pwe rahnteieu nan Tehnpasomwi Sarawio
mwahusang rahn kid wasa teikan;
ei kin mihmi ni wenihmwen tehnpas en ei Koht
mwahusang kousoan nan imwen aramas suwed akan.
11 KAUN-O iei ih me silepatail oh atail nanmwarki lingan,
me kin kupwuramwahwihkin kitail kalahngan oh wahu.
E sohte kin ketin soikala mehkot mwahu
sang irail me kin kapwaiada me pwung.
12 Maing KAUN, Wasa Lapalap, meid pai irail kan me kin likih komwi!