1 Sudas Makapius oh ienge ko pwurehng kalowehdi Tehnpas Sarawio oh kahnimw en Serusalem pahn kaweidpen Kaun-o. 2 Re kauwehla pei sarawi kan me mehn liki kan kauwada wasahn netinet kan oh pil iangahki wasahn kaudok teikan. 3 Irail eri kamwakelehda Tehnpas Sarawio oh wiahda ehu pei sarawi kapw. Re ahpw id tuhke oh wiahda ehu kisiniei kapw, oh patohanda keieun meirong me sohte wiawi erein sounpar riau; re isikada warpwohmwahu, isikada lamp kan, oh kihda pilawa sarawi kan. 4 Mwurin ar wiahier mepwukat, re poaridi nanpwel oh kapakap pwe Koht en dehr ketin pwurehng mweidohng soangen apwal pwukat en lelohng irail. Re peki en ketin kupwurkalahngan ong irail ni eh pahn ketin pwurehng kalokehkin irail diparail kan ni ahnsou kohkohdo kan, ahpw en dehr ketin pangiraillahng rehn mehn liki lemei oh rotorot akan. 5 Re kasarawihala sapahl Tehnpas Sarawio ni kerieisek limau en sounpwong Kislep, ni rahn oh sounpwongohte me mehn liki kan kasaminehla Tehnpas Sarawio. 6 Kasarawi kapereno ahpw wiewiawihki erein rahn waluh, duwehte Sarawien Impwal kan, oh aramas akan tamanda duwen ahnsou kis samwalahr, re wia Sarawien Impwal kan ni ar mihmiseli nin nahna kan duwehte mahn lawalo oh koukousoan nan pwoaren paip kan. 7 Ahpw met, re wa rahntuhke mour kan oh tehntuhke me kapwat mie, oh kapar pidekseli, kokoulki koulen kaping ong ih me ketin kamwakelehda pein sapwellime Tehnpas Sarawio. 8 Aramas koaros eri pwungkihda me re pahn kin wia sarawi wet nan sounpar koaros.

9 Mwehin Antaiokus Epipanihs imwiseklahr. 10 Met kitail pahn koasoia duwen Antaiokus Eupator, nein ohl suwed menet, oh oaralapihada duwen suwed kan me eh mahwen kan kahredahr. 1 Mak. 6.17. 11 Ni eh wiahla nanmwarki, e idihada ohl emen ede Lisias pwe en apwalih mwekid en wehi oh keieun kepina en Siria Laud, 12 wiliandi Tolemi Makron, me wia keieun kepina me kadekohng mehn Suhs kan. Makron kauwada popohl nanpwungen ih oh irail pwe en kapwungala sapwung kan me wiawihong irail. 13 Pwehki met, Kompoakepahn Nanmwarki kei ahpw kohla rehn Eupator oh kedipahda Makron me dene e pangala wehio, pwehki eh mweselsangehr deke Saiprus, wasa me Pilometor, nanmwarkien Isip ketikihdi ie pwe en wia wiliepe, ahpw Makron samwalahr rehn Antaiokus Epipanihs. Ni mehlel, aramas koaros kin wiahki Makron sounpangala wehi men. Ni eh solahr kak kolokol wahupen eh pwukoa doadoahk, e ahpw nimala pwoisin oh kemehla pein ih.

14 Ni ahnsou me Korkias wiahla kepinahn Idumea, e koadoadoahkih sounpein liki kei pwe re en kin mahweniong mehn Suhs kan ahnsou koaros. 15 Ni ahnsowohte mehn Idumea kan pil kolokol kelen mahwen kaselel kan oh sohte kin tokedihsang ar kalokaloke mehn Suhs kan. Re kin kasamwo mehn Suhs kan me tangasang Serusalem oh wiewia uwen ar kak pwe mahwen ong mehn Suhs en dehr tokedi. 16 Eri, mwurin Sudas Makapius oh ienge ko ar kapakap oh peki sapwellimen Koht sawas, re ahpw tangeila wia mahwen ieu ong kelen mahwen en mehn Idumea ko. 17 Re pwakihada sounpei ko me sinsile kehl ko oh kalowehdi kelen mahwen ko, re kemehla aramas koaros me re kilangada, me uwen tohto aramas 20,000.

18 Kereniong imwintihti 9,000 me sopolahng nan kelen mahwen kehlail riau oh diren mehn poadoandoar ie. 19 Suda eri douluhlla ekei wasa tohrohr nan sahpwo, wasa me mie anahnepe laud ie, ahpw e kihdi Saimon oh Sosep, iangahki Sakius oh nah sounpei ko. Uwen tohtohn karis wet itarohng re en mahmahwente, 20 ahpw ekei nein Saimon sounpei ko me noahrok en mwohni, ni imwintihti ko ar kihong irail uwen mwohni silper 140, re ahpw mweidohng ekei irail en sopohsang nan kelen mahwen ko. 21 Ni Sudas eh rongada dahme wiawiher, e ahpw kapokonepene kaun akan en nah sounpei ko oh kedipahki ohl pwuko duwen ar netikihla riarail mehn Suhs kan ni ar kapitala imwintihti ko pwe re en mahweniong irail. 22 Ih eri kemehla ohl ako me pangala ar wehi oh mwadangete kalowehdi kelen mahwen riauo. 23 Sudas kin pweida nan mahwen koaros, oh ni eh mahweniong kehl riauo, e kemehla aramas tohtohsang 20,000.

24 Timoty me lohdier pahn mehn Suhs ako mahs, ahpw kapokonepene kiden sounpein dak oahs sang Eisia oh kiden sounpein liki kei oh mwekimwekidlahng mahweniong Sudia. 25 Ahpw ni imwintihti ko ar kohkohdo, Sudas oh ienge ko ahpw kapakapohng Koht. Re pwuhriong nan likoun nsensuwed, kidahng pehs pohn moangarail kan, 26 oh poaridiong nanpwel mwohn pei sarawio, pekipeki Koht en ketin sewese irail oh mahweniong ar imwintihti ko, nin duwen me e ketin inoukidahr nan sapwellime Kosonnedo.

27 Ni ar kaimwisekala ar kapakapo, re ale nair tehtehn mahwen kan, kohieila ekis dohsang Serusalem, oh nipwong re ahpw pweiekdi wasa kis me sohte dohsang ar imwintihti ko. 28 Nimenseng karis riauo ahpw mahwenpene. Sounpein Suhs ko koapworopworki ar kommwad oh ar likih Kaun-o me re pahn powehdi, a imwintihti ko koapworopworki ar koahiek en mahwen. 29 Ni peio eh uklahr mehlel, imwintihti ko kilangada ohl masamwahu limmen me dak oahs ekei me kapwatki kohl oh re tieng mwohn sounpein Suhs ko. 30 Ohl limmen pwukat kapilpene Sudas, doandoarehki pein neirail mehn sansar kan, oh kadakadar arep oh lioal ong imwintihti ko. Imwintihti ko ahpw pingida mehlel oh salohda kahrehda re tangpeseng, oh mehn Suhs ako ahpw peleirailpeseng, 31 re kemehla sounpei alu 20,500 oh sounpein dak oahs 600.

32 Timoty sopolahng nan kelen mahwen kehlail en Keser, wasa me rie Kereas kaunda. 33 Sudas oh nah sounpei ko kapilpene kelen mahweno oh mahmahweniong erein rahn pahieu ni ngiangi mehlel, 34 a sounpei ko loale koapworopworki kelen mahweno oh re kin weriwer lahlahwe mehn Suhs oh ar Koht. 35 Manda ni kelimaun rahn, ninsohrahnie, nein Sudas sounpei riehk, inenen lingeringerkihda lahlahwe pwukat, re ahpw eimahda oh doudahng ni kehlo oh pelepele koaros me re kilangada. 36 Ni ahnsowohte, ekei sounpei ko douda apali kehlo oh isikada wasahn iroir ko. Imwintihti tohto mwasingkihla kisinieio ni eh lullulpeseng. Kesiluhn pwihno kauwehla ewen kehlo oh kapedolong luhwen nein Sudas sounpei ko loale pwe re en kalowehdi kahnimwo. 37 Timoty rukula nan dengk ehu, ahpw re kemehla, iangahki rie Kareas oh Apolopanihs.

38 Ni mahweno eh imwisekla, mehn Suhs ako ahpw wia kasarawihpen ar powehdi ni ar kokoulen kapingkalahngan ong Kaun-o, me ketin kasalehiong irail kalahngan lapalap oh ketikihong irail powehdi.