1 'Dɩayɩnʋ ‑na, dɛ ‑kɔ kɩ ‑a di 'ʋ ‑yrɛɛ ‑nɩ, ɛ nɔ‑ mɔ: ba da Nyɩsʋa, 'kɩ 'ʋ ‑aan ‑ta', ‑ɛ di꞊e nu, Kʋkɔnyɔ ‑Yusu a win 'mʋ bʋ 'hɛɛn ‑nɩ, nyibli 'mʋ꞊ʋ kʋa 'ble, ɛ kɔ, ʋ 'mʋ 'ʋ꞊ʋ 'ʋ ꞊tuu ‑nɩ, ꞊wɩ yɩ, ‑tɛ a ni 'a nunuo. 2 Ba da Nyɩsʋa ‑wɛ, ‑ɛ di꞊e nu, ɛ 'mʋ ‑a mʋ ‑hɛɛ ‑nɩ, nyibli ‑bʋ, ‑ʋ kɔ 'crɛ, ʋ 'nɩ ꞊ha ‑a mʋ dɛ ‑hʋan ꞊dʋ ‑mɔ nu, ‑ɛ nu꞊o, ɛ kɔ nyibli ‑bɩ, 'ʋ 'yɛ nɩ wɛn꞊ɛ kɩ, 'kɩ bʋ kuo ‑Yusu ꞊wlʋ yɩ.

3 Kɛɛ, 'bʋ mɔ, ꞊nɩ kuo ‑aan Kʋkɔnyɔ ꞊wlʋ yɩ, ɛ 'nɩ ‑hie꞊e 'ʋ ‑mʋ bʋ. Ɛ di 'a mʋ 'nɩ ‑hɛɛ ‑nɩ, a 'mʋ 'klɩ kɩ nɩ, ɛ kɔ, ɛ 'mʋ꞊ʋ nu, 'kɩ 'kuo ‑hʋɩn* a nyiblo gbagbʋ 'yɛ nɩ di 'a mʋ dɛ ‑hʋan ‑mɔ nɩ nu. 4 ‑A kuo nɛ ‑aan Kʋkɔnyɔ ꞊wlʋ yɩ, 'kɩ bʋ nu꞊o, ‑tɩ ‑mʋ', ‑a tɔɔ la 'a mʋ, ba 'cibi 'ʋ 'a nunuo.

5 ‑Aan Kʋkɔnyɔ bʋ ‑hɛɛ nɛ 'a mʋ, ‑ɛ di꞊e nu, Nyɩsʋa a nʋɛlɛ 'mʋ klɛ ‑bii ‑nɩ, 'kɩ 'lɩ 'aan ꞊wlɩ kɩ, ɛ kɔ, ‑tɛ a 'blee 'ʋ kʋa, 'kɩ ba 'blee 'ʋ kʋa, ꞊wɩ yɩ, ‑tɛ ‑Yusu 'Klɩsʋ ni la 'a nunuo.

6 'Dɩayɩnʋ ‑na, ‑a ‑hʋɛ꞊ɛ nɩ, 'kɩ 'lɩ ‑aan Kʋkɔnyɔ ‑Yusu 'Klɩsʋ a 'nyrɛ 'kwli, ba hlɔɔ ‑Yusu a nyibli ‑mʋ', ‑ʋ mɔ ‑mimlinyibli ‑mɔ lɛ. Ʋ nʋ‑ ‑mɔ ‑bɩ, ʋ 'nɩ ꞊tuu꞊o 'ʋ dɛ ‑mʋ', ‑a tɔɔ nɛ 'a mʋ. 7 'Aan 'mumu, a yi꞊e nɩ, ‑tɛ a kɔ ba nu 'lɩ ‑aan ꞊pɩ a lɛ‑hɩhɩa. ‑Tɛ ‑a di la 'lɩ 'a mʋ ‑mɔ, ‑a 'nɩ ‑nu꞊o la ‑mimliŋmlɩ lɛ. 8 ‑A 'nɩ ‑di꞊e la 'aan dii‑tɛblɩ dadʋ. Kɛɛ, 'tɔ kɔ ‑nyrɛ, ꞊hɩʋɛn, nɔ‑ ‑a yɩ la 'ye, ‑aan ꞊gbɛtʋ, ꞊a ni la ‑kʋan, ‑ɛ di꞊e nu, ‑a 'mʋ ‑aan dɩɔnʋ lɛ ‑kikle ‑nɩ. ‑A 'nɩ ‑hʋa꞊a la ba kɔ la lɛkiklelɛ ‑aan ‑tɩ. 9 Ɛ mɔ ꞊han‑tɩ ꞊nɩɔ, 'hru pɛ la 'ʋ bʋ, 'kɩ ‑ba ‑hʋa la 'a mʋ diidɛ, kɛɛ, ɛ mɔ dɛ ꞊nɩɔ, ꞊a ‑hʋɛ ‑ba tɔɔ la 'a mɔ꞊ɔ. Ɛ nɔ‑ kɔ ‑tɩ, ꞊a ni la ‑kʋan. 10 ‑Tɛ ‑a nɩ la 'lɩ 'a mʋ ‑mɔ, kɛ‑ ‑a pɩ la: «Nyiblo 'bʋ 'yɛ nɩ ‑hʋa bʋ nu ‑kʋan, ɛ 'yɩ yɩ ‑blɛɛ ‑nɩ, bʋ di dɛ.»

11 Ɛ 'wɩ yɩ, ‑a 'wɩn nɩ, ‑ɛ mɔ, nyibli ‑bɩ nɩ 'lɩ 'a mʋ 'nyɩ, 'ʋ ni ‑mimliŋmlɩ lɛ. Ʋ 'nɩ ‑hʋa꞊a lɩ bʋ nu ‑kʋan, kɛɛ, dɛ ʋ nʋɛ ‑nɩ, ɛ nɔ‑ mɔ, bʋ pʋ 'lɩ 'waa 'bio a ‑tɩ wuntɔ 'nyɩ lɛ. 12 Nyiblidʋ a 'mʋ, ʋ nʋ‑ ‑a yɩ 'lɩ ‑mɔ ‑hlee ‑nɩ. ‑A yɩ ꞊nʋ 'nɩ ‑lee ‑nɩ, 'kɩ 'lɩ ‑aan Kʋkɔnyɔ ‑Yusu 'Klɩsʋ a 'nyrɛ 'kwli, ‑ɛ mɔ, bʋ nu ‑kʋan ‑tɛɛ, ‑ɛ di꞊e nu, ʋ 'mʋ 'waa dɩɔnʋ yɩ ‑wɔn.

13 'Dɩayɩnʋ ‑na, 'a mʋ ‑mɔ ‑bɩ, ba 'cibi 'ʋ, ba nu ꞊haandɛ. 'Aan 'klɩ 'nɩ 'wɛɛ 'lɩ. 14 ‑Baklɛ, nyiblo ‑bɩ di 'ʋ 'nɩ nɩ, ‑tɩ ‑bʋ, ‑a yɩ 'crɩ, 'kɩ ɛ 'yɛ nɩ di 'ʋ꞊ʋ nɩ ꞊tuu ‑nɩ. 'Bʋ mɔ, 'bʋ nɩ 'mʋ lɛ, ‑ɛ ‑bɩ ba 'nɛɛ ꞊nɛ 'yie kɩ bʋ, ɛ kɔ 'a mʋ 'hʋɛn‑, a 'nɩ 'bibie 'lɩ 'yi lɛ, ‑ɛ di꞊e nu, ‑tʋɩ 'mʋ꞊ʋ nu. 15 A 'nɩ 'yraa 'lɩ꞊ɩ, kɛɛ, ba ‑gbɛɛ ꞊nɛ ‑tɛɛ, ‑kɔtɩ ɛ mɔ 'aan 'dɩayɩ ꞊nɩɔ.

16 ‑Aan Kʋkɔnyɔ ‑Yusu a 'mʋ, ‑ɛ yɩ nyibli kɩbʋwɛɛnlɛ ‑nyi, bʋ ‑nyi 'a mʋ kɩbʋwɛɛnlɛ 'a ‑nɛ ti, 'kɩ 'ʋ 'a ‑nɛ ꞊dedede a ‑ta'. ‑Aan Kʋkɔnyɔ ‑Yusu bʋ nɩ 'ʋ 'aan pɛpɛ ‑mɔ.

17 Kɩ mɔ 'crɩɛnkʋtɩɔ ‑bʋ kɩ, 'mɔ Pɔlʋ, 'na ꞊gbɛtʋ, 'mɔ ‑yɩ 'crɩ. 'N 'bɛti 'a mʋ. Kɛ‑ 'n ni 'na 'nyrɛ a 'cɩcrɩɩ, 'kɩ 'lɩ 'na 'crɩɩn a pɛpɛ 'kwli. 'Na 'cɩcrɩ‑jio, nʋ‑ di 'a mɔ꞊ɔ ‑tɔɔ ‑nɩ, ‑ɛ mɔ, Pɔlʋ ꞊crɩ 'crɩɛn ‑bʋ.

18 ‑Aan Kʋkɔnyɔ ‑Yusu 'Klɩsʋ bʋ nu 'aan pɛpɛ ꞊haandɛ ‑mɔ.