1 Txajũ' Pilato' Jesusa's jxũna u'jçxa peçxuukwekaakh. 2 Aça' soldauwe'sxa' çhũçhna tadx vxitçxa Jesus dxikthete kaafxĩkhe'jtx, sa' atxh behsa's kaapã'çxi'jçxatx na'jĩ':

3 —¡Vxiwa, judiuwe'sxtxi jxkaahsa! Txã'jĩçxatx dxi'pga petxaatxa.

4 Txajũ' Pilato' ki' eka kasehçxa' na'wẽk we'we:

—Mthegwe, naa piçthẽ'ja' ayte ũsa', nawa txã'sa' makwe paapẽjxçxawa txajx ewmée yũuni's uymeeth.

5 Txã'jĩ yã'the', Jesusa' kasejk dxikthete çhũçha's tadxçxa kaafxĩkhe'jni, sa' atxh behsa's kaapã'çxi'jni. Aça' Pilato' na'jĩnak we'we:

—Ãçxha' ayte ũsa' txãa piçthẽ'ja's mthegwe.

6 Txã'jĩte', sacerdote npiiçthẽ'jwe'sx vxite' dxuus yat thegsawe'sx Jesusa's thegçxa' na'jĩnatx sus weyya' kiite:

—Kluuste mkaafxuçu'j, kluuste mkaafxuçu'j jĩte', Pilato' na'jĩk:

—I'kwe'sx jxpa'gaçxa kluuste mfxuçwe. Adxa' kĩh yuhwa ewmée yũuni's jiyuya' ãjameeth jĩte', 7 judiuwe'sxa' na'jĩnatx we'we:

—Kwe'sxa' ley ji'ptha'w txãa leya' ikhkaja'k, Dxus Nçxi'kthu jĩna u'jupa'ga.

8 Txã'jĩni's wẽse'jçxa', Pilato' jweeíiçxáak wala ũukhwa'j ji'phu. 9 Sa' txajx u'pnite u'kaçxa', na'jĩnak Jesusa's paapẽjx:

—Idxa' ¿majũwe'sxga? jĩtewa, Jesusa' pasme'.

10 Aça' Pilato' na'jĩk:

—¿Adxa's kĩh yuuçxaga pasu'çmée? ¿Jiimeewá'ga? adxa' kluuste fxuçkahn jxkaajxa'wa ãjawa'jsath, sa' txã'wẽy kaatxhweete'jya'wa ãjawa'jsath jĩte', 11 Jesusa' pasku:

—Dxuspa'gameewaça', idxa' kĩjxa'yuhwa ãjawa'jsameeg adxa's. Nawa iidx kusete adxa's dukhsa' idxte jxthaakwe yuuwesa'.

12 Txã'jĩna we'wenijũ' Pilato' wala pa'pçxuk Jesusa's txhweetewẽeçxa. Nawa judiuwe'sxa' na'jĩnatx sus we'we:

—Naa piçthẽ'ja's txhweteçxa', jxkaahsa Cesar namikumée yuune'ga. Maawa fxiy jxkaahsa' txã' Cesar ju'gusame'.

13 Txã'jĩni's wẽse'jçxa', Pilato' Jesusa's ekate pe'jna u'jçxa', jxkaahna u'pnite kaçxku. Txãa jxkaahna u'pni' Gabata yaasek yu' hebreo yuwete. Txã' Kwet Fxuçni jĩni'. 14 Paskua fxiesta ãjaçtek txã'wẽ yũuna ũsu'. Txajũ' Pilato' na'wẽk we'we judiuwe'sxtxi:

—I'kwe'sxtxi jxkaahsa' ayte ũsa' jĩte', 15 txãawe'sxa' na'wẽtx sus we'we:

—¡Peekx uuna, kluuste mfxuç! jĩte', Pilato' na'wẽk we'we:

—I'kwe'sxtxi jxkaahsa yuja's, ¿ma'wẽ kluuste fxuç kajaki'th? jĩte', sacerdote npiiçthẽ'jwe'sxa' na'wẽtx we'we:

—Kwe'sxtxi jxkaahsa' Cesar yuuçxá'. Vxite jxkaahsa yu' ji'phmeetha'w.

16 Txã'wẽ we'we yã'the', Pilato' Jesusa's txãawe'sx kusete kluuste fxuçkahn dukhte', jxũna u'jtx.

17 Jesusa' txã'sna fxuçwa'j kluusa's yakhçxa çxhabu kasehna u'kh, teeçx ahte Gólgota yaase' kxtee pa'j. Txãa Gólgota yu', Uusáa Jxkwet Dxi'th jĩni' hebreo yuwete'. 18 Kxtee pa'jçxa' Jesusa's kluuste fxuçtxi, vxite e'z piçthẽ'jtx txã'wẽy, Jesusa's pxãhte txahçxa. 19 Txajũ' Pilato' kluus kajkwete na'wẽk ki'p kaah: Jesus Nasarethuwe'sx, judiuwe'sxtxi jxkaahsa jĩna fxi'jni's. 20 Aça' kluuste fxuçni' çxhab utxatek yu', naa pa'ga maazkuẽe judiuwa txãa fxi'jni's thegu'tx. Txãa fxi'jni', hebreo, griego, latin yuwejuk fxi'jni yu'. 21 Aça' sacerdote npiiçthẽ'jwe'sx vxite' judiu npiiçthẽ'jwe'sxa' na'jĩnatx Pilato's paatxhĩ'kh:

—Judiuwe'sxtxi Jxkaahsa jĩna fxi'j na'wẽ, Adxa' Judiuwe'sxtxi Jxkaahsath jĩ'k jĩna fxi'jwaça', wejx ewna.

22 Nawa Pilato pasçxa' na'jĩk:

—Adx txã'wẽ fxi'jni's kim yuhwa yu'pthehmeena.

23 Txajũ' soldauwe'sxa' Jesusa's kluuste fxuç yã'jçxa', Jesus athni's pahzsa txu'dedetx soldau iisa teeçxteeçx. Sa' atxha'swa txã'wẽytxi yũu wẽe, nawa txã' teehwedsaçxáak yu' kaçnimeesa. 24 Aça' soldauwe'sxa' na'wẽtx puutx we'we:

—Txã's sudeya'mée swerte kaja'nja'w kim jĩi neeyũutewa jiyuya'.

Soldauwe'sx txã'wẽ yũuni' Dxus librute na'wẽ fxi'jni kxtey yuuk: Adx athni's txãawe'sx pwe'sx txu'dedetx swerte kaahçxa jĩna fxi'jni'.

25 Txã'wẽ yũuçpkaçxha', Jesusa's fxuçni kluus pukate njĩ'jwa ũsu'k vxite' Jesus njĩ'j yũkwe, vxite' Kleofxas nyu Maria, vxite' Maria Magdalena. 26 Aça' Jesus njĩ'j pukate Jesus wedxnisa ih ũste Jesus uyçxa', njĩ'ja's na'jĩk:

—Naa piçthẽ'ja' i'kwe's jxpe'jena nçxi'k na'wẽ jĩçxa', 27 txãa piçthẽ'ja'swa na'jĩnak neewe'we:

—Na'sa' iidx mama na'wẽ jxpe'jene'ga.

Txã'jĩte', txãa piçthẽ'ja' txãa oratey Jesus njĩ'ja's txajx yatna pe'jna u'kh.

28 Txãa skhẽua', Jesusa' jiik yu' jxuka kxtey yuuna u'jweçtewa. Sa' Dxus librute ma'wẽ fxi'jni kxtey yuukahnku na'jĩna we'we:

—Yũ'wẽeth jĩna.

29 Teeçx tasa vxino utak ũsu'. Aça' txãa vxinote esponja's tuupha'jçxa fxtũte açhçxa Jesus yuwete utxatx çxazxakahn. 30 Aça' Jesusa' esponja's çxazxaçxa', na'wẽk we'we:

—Jxuka jxã'jnik neeyũu jĩna'wa, kĩiçhuna' uuk.

31 Aça' Paskua fxiesta en ãjaç yã'kh yu'. Txãa ena' wala ki'snisa yu'k. Aça' judiuwe'sxa' fxiesta ente uusaawe'sx kakwetx kluuskhẽ nvxiit wẽemeeçxa', Pilato's pẽjxtxi kluuskhẽ ki'pnisa çxidatx çxkadedeya' kaakhan, dud uute' kakwetx txajũ kiisya'. 32 Txajũ' soldauwe'sx u'jçxa çxidatx çxkadedetx teeçxsa khuẽ'yna, sa' vxitenawa txã'wẽytxi yũu Jesus pukakhẽ kluuskhẽ u'psa's. 33 Nawa Jesusnawa txã'wẽy yũuya' utxaana kũhçxa', uunii yã'j u'ptetx uy. Txãa pa'gatx Jesus çxidatx çxkadedemée. 34 Txã'wẽtewa, teeçx soldau yu' Jesus tabxte we'thuk yãja'. Aça' txã'wẽ yãjate', ee yu' yakhku uwu. 35 Txã'wẽ yũunisa's pta'sxsa' txajx yafxju yuuk uy, sa' isak we'we'. Sa' jiia' isa we'weççxawa, kxah i'kwe'sxwa txã'wẽ yuh yũune' sũhwa'ja's ji'phune'kwe. 36 Nawa Dxus librute' na'wẽ fxi'jni': Iidx dxi'thtxi' teeçxçxáa yuhwa çxkahdemeetxna jĩni kxtey yuukahntxi txã'wẽ yũu. 37 Dxus librutey vxite ajkhẽ na'wẽ fxi'jni ũsa': We'thu yãjaçxa', thegutxna jĩ'k.

38 Txã'wẽ yũuniijũ' Jose yaasesa Arimatea çxhabuwe'sxa' Pilato tasxte utxaak Jesus kakwe's pẽjxçxa jxũna u'jya'. Aça' Pilato' ewna jĩte', Josea' Jesus kakwe's pedaaya' jxũna u'kh. Naa Jose yu' Jesus ju'gsak yu', nawa judiuwe'sxtxi ũukhçxa kimwa jiyunimeene' u'jusa yu'. 39 Txajũ' Nikodemowa pa'kh, Jesus yakh kus puutx we'wesa. Txãa yu' treinta kilo ãjk yu'çe tũ'sçxa pa'j, miçxa aloe yakh ka'dnisa. 40 Txajũ' Jose' Nikodemo yakh Jesus kakwe's jxũna u'jçxa', yaptxi txãa yu'çe ka'dnisa yakh, judiuwe'sx ma'wẽne'ta uusáa kakwetx pedá' txã'wẽytxi yũu.

41 Jesusna kluuste fxuçni utxasu walta ũsu'k. Aça' txãa waltate' uusáa pedawa'j kafx u'sesa u'pu'k, kim yuhtxwa pedanimeesa. 42 Txkaatx Jesus kakwe's khikh, kafxa' utxatek u'pu' aça' ki'swa'j enwa ãjaçku yu' naa pa'ga.