38
Nyangka Tjiramayilu Mama Kuurrku tjukurrpa tirtu watjaranytja. Nyangka puurrpa purlkanya puru palunyaku yamatji pirninyatarrartu-ya kuliralpi mirrparnarringu. Palunyalu-ya Tjiramayinya tjulyaralpi ruumpa manta kaninytjarrangka lakapungu wantingu.
Tjiramayinya-ya Wiilpangka Tjarrpatjunu
1-3 Nyangka Mama Kuurrtu-rni watjarnu yarnangu pirninya-rna ngaapirinypa watjaltjaku, “Yuwa, yiwarlangka-yan nyinaku mirrirriku. Tjiinya-yan yiwarlangka tirtu nyinarranyangka Mama Kuurrtu-tjananyanta yirringkankukitjamunulu wantiku. Nyangka-tjinguru-yan parltjatjirratja mirrirriku. Puru-tjinguru-yan pika purlkanya mantjiralpi mirrirriku. Tjinguru-tjananyanta warrmarlalu pungku wiyalku. Wiya-tjinguru-yan pakalku yinytjanurringku warrmarla Papulanngamartatji pirningka. Nyangka-tjananyanta wankakutu walara katiku palunyaku ngurrakutu.”
Nyangka wati kutjarra-kutjarralu-rniya kulirnu yarnangu pirningka-rna watjaranyangka. 4 Palunyalu-ya yanu puurrpa purlkanya watjarnu, “Wiya, Tjiramayilu tjukurrpa palyamunu watjaranytja. Nyangka-lampa warrmarla pirninya ngurlurringkula. Nyangka puru-ya yarnangu pirninya tjurlpilypa nyinarra. Witula-lanyatju. Nyangka-latju yarra puwa mirrirntarra.”
5 Nyangka puurrpa purlkalu watjarnu, “Yuwa palya, mapitja-ya puwa wuyurrpa-tjananyanta ngaralanyangka. Kamu-tjananyarnanta marrkulku.”
6 Nyangka-rniya pitjangu tjulyara katingu. Palunyatjanu-rniya kultuwanalu parrakarrpiralpi wiilpangka tjarrpatjunu. Nyangka-rna pilkingka nyinarranytja. Tjiinyamarntu kapi wiyarringu, nyangka pilki purlkanya ngarrirranytja.
7 Nyangka wati marulu tjiinya puurrku yiwarlangka waarka palyalpayilu kulirnu ngayunya-rniya wiilpangka tjarrpatjunu. 8 Palunyalu yanu puurrpa purlkanya watjarnu, 9 “Wiya puurr, palyamunulu-ya Tjiramayinya wiilpangka tjarrpatjunu wantingu. Tjiinya nyinarrayilku parltjatjirratja mirrirriku.”
10 Nyangka puurrpa purlkanyalu watjarnu, “Wiya, mapitja-tjananya wati marnkurrpa yarltirra wiilkutu yarra. Palunyalu marlakulu yilala mirrirritjakutarrartu.”
11 Nyangka-ya mularrpartu pitjangu wiilkutu. Tjiinya-ya warntu yurnantji mantjira katingu. Palunyalu-ya purturru puru warntu tjarrpatjuralpi 12 watjarnu, “Warntu ngaanya ngayanywanalu karrpila purturrulunta pikaltjakutarra.” Nyangka-rna mularrpartu karrpirnu. 13 Nyangka-rniya purturrungka yilarnu katurnu. Nyangkalta-rniya wati kutjupatjarralu yaarrpa kaninytjarra tjarrpatjuralpi tirtu miranykanyira kanyiranytja.
Yuwa, palunya.