Ndroyi Melit Masih
(English: Genesis)
(Tok Pisin: Stat Bilong Olgeta Samting (Jenesis)
1
Titiye para Ngindrai imbusi melit masih isarayah
1 Koluw koluw mamu kinna, Ngindrai imangsani kol pwan pe hu kol yang. 2 Kol pwan ara, iro mwaihei o, pe hapesah kinto aliy pwi. Mburah lokuran namandran iramburuhi ndrita ndras pe Mwoiwa Ngindrai iho aliy.
3 Pwen Ngindrai ipa, “Ngana lang kilenganiy.” Pwen o ilenganiy. 4 Ngindrai inime ngana lang irayah hiyan, pwen irandrokomatne ngana lang pe ping. 5 Ngindrai ipohowe ngana lang ara “lang” pe ping ara “ping.” Piyahon iyamasan ndroulang ara — isarayah langsih isamu iya melit masih.
6 Pwen Ngindrai ipa, “Hapesah kisarayah pe kisondriti ndran kirayah malkah.” 7 Pwen Ngindrai isondriti ndran iya malkah. Hakah hira paingan yang pe hakah ita kol pwan. Pwen o isarayah tehe yiy ipwai. 8 Pe Ngindrai ipohowe paingan ara “yang.” Piyahon iyamasan ndroulang ara — lang luwoh.
9 Pwen Ngindrai ipa, “Ndran masih ita kol pwan kayawule pe kol pwosowen kirayah.” Pwen melit masih irayah tehe ipwai. 10 Ngindrai ipohowe kol pwosowen ara “pwan,” pe ipohowe ndras namandran ara “mwekeu.” Pe Ngindrai inimei tehe kintayah hiyan.
11 Pwen Ngindrai ipwai ipa, “Hu kei handra-handra mambuwahu kiyasura pekehu, kapolo ndromndriu handra-handra hu kalek ndrita pwan. Pwen pe hu mbuwakei hu kalon pe pekehu hu kalek tehe hu kei ara ko.” Pwen melit masih irayah tehe Ngindrai ipwai. 12 Pwen pe nondriya kol pwan masih hu kei handra-handra mambuwahu iyapolo ndromndriu handra-handra husarayah, pe pekehu hulek tehe hu kei ara kopu. Pe Ngindrai inimei tehe kintayah hiyan. 13 Piyahon iyamasan ndroulang ara — lang toyoh.
14 Pwen Ngindrai ipa, “Hu melit manganahu koho yang pe hu kaiki ndrokomatne lang pe ping. Pwen hu melit ara andre hu kapwaingani kaipisa lohongai tiken, pe karanonoyani walehe memelit tiken, pe andre hu kaiki ndrokomatne lang sih-sih pe hayou sih-sih. 15 Pe andre hu koho yang para hu kalengani kol pwan.” Pwen melit masih irayah tehe ipwai. 16 Tehen tora ko Ngindrai imangsani melit malndra mangana hilu. Imangsani nganan namandran ngalan paramwandrai para kiyat lang pe nganan mendreheh ngalan walah para kiyat ping. Pwen Ngindrai imangsani hu piriy iyapolon i. 17 Ngindrai iyki melit masih hora yang para hu kalengani kol pwan. 18 Paramwandrai, walah, pe hu piriy ara, huiki ndrokomatne lang iya mawen pe ping iya mawen. Ngindrai inimei tehe kintayah hiyan. 19 Piyahon iyamasan ndroulang ara — lang haahiu.
20 Pwen Ngindrai ipa, “Hu ni pe hu melit masih handra-handra makunuwehu hu kapep mbulu ndras pe ndran. Pe hu norukan handra-handra para wohowoh hu kohowoh paingan.” 21 Pwen Ngindrai imangsani hu kan namandran para ndras iyapolo hu melit masih hu tora tokai pe rangangai mbulndras. Pe melit masih aro andre hu kapo noruhu pe karayah soyon iya tehe yihu kopu. Pe Ngindrai inimei tehe kintayah hiyan. 22 Pwen Ngindrai itoholi hu pe ipa, “Kapo noru wawu hu kaya soyon pe ndras andre kihon kiya ta wawu. Pe hu norukan para wohowoh ara hu karayah soyon iya koro kol pwan.” 23 Piyahon iyamasan ndroulang ara — lang yimah.
24 Pwen Ngindrai ipa, “Kol pwan kipep katahu kan masih pe kapo noruhu tehe yihu kopu. Yihu kan para wum, hu kan para seselek, pe hu kan puyap para yangiy ara hu kasarayah pe hu kapo noruhu tehe yihu kopu.” Pwen melit masih ipwai ara husarayah topwei. 25 Tehen tora ko Ngindrai imangsani hu kan puyap para yangiy, pe hu kan para wum, iyasura hu kan para seselek husarayah, pe hupo noruhu tehe yihu kopu. Pe Ngindrai inimei tehe kintayah hiyan.
26 Pwen napwai, Ngindrai ipa, “Yorou tukamangsani hu ndramat hukasarayah tehe yorou opu. Pwen andre hukanimnim katahu ni tora ndras pe hu norukan hu horawoh yang. Pe andre hu kanimnim katahu kan para wum pe hu kan para yangiy.”
27 Pwen Ngindrai imangsani hu ndramat husarayah, mwensen tehe yiy opu.
Imangsani hu ndramat malpat,
kamai pe pihin.
28 Pwen Ngindrai itoholi hu pe ipwai iyatahu ipa, “Wawu kapo noru wawu kasarayah soyon, pe wawu kapep kol pwan, pe kaya mbukena melit masih tora ndrita kol pwan. Pe wawu kapwokerani hu ni tora ndras pe hu norukan para wohowoh, iyasura hu kan masikene makunuwehu hu tora tokai ndrita pwan.”
29 Pwen Ngindrai ipwai ipa, “Yo uhungini wawu hu ndromndriu handra-handra iyapolo hu kei handra-handra mambuwahu pe mapekehu para kasarayah anandrina wawu. 30 Pe hu kan masikene para pwan pe hu norukan para paingan iyasura hu kan para seselek — melit masih makunuwehu ara — yo uhungini hu youkei masih iyasura ndromndriu masih para kasarayah anandrinahu.” Pwen isarayah tehe Ngindrai ipwai.
31 Pwen Ngindrai inime melit masih kinmangsaniy ara kinsarayah hiyan iya. Piyahon iyamasan ndroulang ara — lang annoh.