1 Bena Isaak ese Iakob e boiria, e hanamoa, e hagania, eto, Kanaan taudia natudia ta basio adavaia; 2 Padan-aram baola, tubumu Betuel ena ruma ai ba dae kau, vavamu Laban natuna kekenidia ta bavadavaia. 3 Bena Siahu-idoinai Diravana ese baine hanamomu, besemu baine havaraia bona baine habadaia, bese bada-hereana ai baola. 4 Dirava ese Abrahame henia hahenamona oi danu baine henimu, oi garamu baine henidia danu, o noholaia hedoamu tanona, Dirava ese Abraham e henia tanona bavabia, emu tano korikori ai bainela. 5 Bena Isaak ese Iakob e siaia lao. Ia na Padan-aram ela, Laban Betuel, tau Suria, dekenai. Una Laban na Rebeka taihuna; Rebeka na Iakob bona Esau sinadia.

6 Esau vada e diba Isaak ese Iakob vada e hanamoa bona vada e siaia lao, Padan-aram ai baine headava: vada e diba danu e hanamoa negana ai e haḡania, eto “Kanaan taudia natudia ta basio adavaia”; 7 e diba danu Iakob na tamana sinana eredia vada e kamonai, Padan-aram ela. 8 Bena Esau lalona e parara tamana Isaak na Kanaan hahinedia se ura henidiava. 9 Taunabunai, Esau na Ismael dekena ela, Ismael Abraham natuna kekenina Mahalata, Nebaioto taihuna, e adavaia; ḡau tamona, adavana gunadia raruosi nonoho.

10 Iakob ese Bere-sieba e rakatania, Haran dalana ai e raka. 11 Bena gabu ta ai e kau, unuseni ai baine noho rani eto, badina be dina vada e diho. Bena una gabu nadidia ta e abia, ena ikwina; bena e hekure diho, e mahuta. 12 Bena e nihi: ena nihi ai vadavada e itaia, tano amo e dae ela bona guba, bona Dirava ena aneru loḡora unu amo e dae e diho. 13 Iehova na dorina ai e gini, eto, Lau na Iehova, tubumu Abraham ena Dirava, tamamu Isaak ena Dirava danu: lau ese ina o mahutalaiamu tanona oi baina henimu, oi garamu danu baina henidia. 14 Oi garamu danu bae hutuma, tano ḡahuna na heto, tahodiho kahana ai bona mairiveina kahana ai bona mirigini kahana ai bona diho kahana ai do bae pere rohoroho; oi daimu ai bona garamu daidiai tanobada iduhudia idoidiai bae namo. 15 Lau ese baina bamomu, ba lao heni gabudia iboudiai baina gimamu, bona baina hakaumu lou ina tano ba lou henia; lau basina rakatanimu ela bona na herevalai henimu karadia na baina kara ḡuḡuru. 16 Iakob na mahuta amo e noga, bena eto, Momokani, Iehova na iniseni ai, to asi dibagu. 17 Bena kudouna e hetaha, eto, Ina gabu na mai garina; Dirava ena ruma binai; guba iduarana binai.

18 Daba matana ai Iakob e tore isi, ena hekwina nadina e haginia, pupuna ai e halaoa, latanai dehoro e seia. 19 Bena una gabu ladana e hatoa Betele;*“Betele” anina be “Dirava ena ruma”. a una gabu ladana gunana be Lusu. 20 Bena Iakob e gwau hamata, eto, Bema Dirava ese baine bamogu, ina na rakalaiamu dalana ai baine gimagu, aniani baine henigu bona dabua danu, 21 ela bona tamagu ena ruma baina lou henia mai mainogu ida: unu baine karagu toma be Iehova na egu Dirava ai baina halaoa; 22 ina nadi pupuna danu hari name haginia na Dirava ena ruma ai bainela. Ba henigu ḡaudia idoidiai danu baina karoa, karoa gwauta, karoa ta oi baina henimu.