Faulo ena leta vemagilafuna Timoti ʼinaya
Leta ana alamani weaqina
Faulo ena leta vemagilafuna baʼe Timoti ʼinaya ʼwayavia ʼabaga agona Loma ʼinega tuta nana vanue ʼebeyoqona ʼinaya toatoa. Faulo ge taha luveifana daviaqi ta ʼesi Ieisu Valena ana lulugaihi ʼinega vanue ʼebeyoqona ʼinaya iaʼuluguyea. Timoti lova tauna Faulo ʼinega Ieisu Valena noqolia ta vetumaqanea, ʼinega vetoiula Faulo ʼinaya. Ta ʼabibodanaya Faulo Timoti aʼuya ʼabaga Efeso ʼinaya toʼekalesia naʼitamakidi. Baʼe leta nana ʼinaya Faulo Timoti vonea vonigo tauna kavona Yaubada ena tovedavi taha. Ta wese vematamagilafuyea tomotau edi ilivu weaqina tuta ʼebeluʼovoa ʼinaya. Ta Faulo nuanuana Timoti Yaubada ena vona me ena giwalifatu tuta qabuna nalugaihiea, tuta aqiaqina ʼidia ta wese tuta vitana ʼidia. Ta ʼeguma vita nalobea tovegwavuʼai ʼidiega tua ta nalugaihidi edi luveifana weaqina. Faulo Timoti givewaiwaiea ʼinega wese navewaiwai Ieisu ana vetumaqana weaqina. Ta wese vematamagilafuyea nuanuana namai navayausia Loma ʼinaya.
Leta gamona
1:1-2 Vematamagilafu be venoqi
1:3-18 Faulo ena vona iula Timoti ʼinaya
2:1-26 Toluavia aqiaqi Keliso weaqina
3:1-9 Tomotau edi ilivu be edi viaqa tuta ʼebeluʼovoa ʼinaya
3:10–4:8 Vebibina tafwalolo ana fewa weaqina
4:6-18 Faulo ena toa weaqina givesimatalia
4:19-22 Lukaiwa be vona veyoluba
1
Lukaiwa
1-2 * Via 16:1; 1Tim 1:2 Natugu Timoti ye, baʼe eu leta yaʼa Faulo ʼiguyega. Yaʼa Yaubada ena nuanua ʼinega yavetovaletuyana Ieisu Keliso weaqina. ʼInega Yaubada vetunegu sabi lugaihi Ieisu Valena weaqina, mana Yaubada niʼa vona fofofoleda itaʼa Ieisu ʼinega toa aqiaqina kana lobea. Nuanuagu Tamada Yaubada ta eda Kaiwabu Ieisu Keliso edi veyoluba ta wese edi nuakolokolo ʼinega me eu nuadaumwala una toa.
Vona iula Timoti sabi givewaiwaina
3 * Via 23:1 Timoti, tuta qabuna ʼaubena ta wese velovelovana ʼidia me egu lukaiwa yavevenoqi Yaubada ʼinaya weaqiu. Lova tubugwavo ivetofewa Yaubada ʼinaya, ta yaʼa wese baʼitagana egu nuanua vunavunaqina ʼinega yavevetofewa Yaubada nana ʼinaya. 4 Yanuaia lova tuta nana magilafuda katoatoa me eu dou yanogeu. Ta nuanuagu qiduana ena ʼita ʼevivieu ʼinega ena qaiawa. 5 * Via 16:1 Yanuaveʼavinia oʼa eda Kaiwabu uvetumaqanea inau Iunisi ta wese tubuhu Loise edi vetumaqana ʼidewana. ʼInega yahalamani aqiaqiea eu vetumaqana waiwaina ʼenoʼeno. 6 * 1Tim 4:14 Lova nimagu yahaʼuya ʼiuya ʼinega Niboana Gwalagwalana ena wilaʼa neiu eu fewa weaqina. ʼInega wilaʼa nana una givewaiwai ʼeviviea kavona ʼaiwe una muʼe saelia. 7 * Lom 8:15 Mana Yaubada ge taha niboana ʼebemwaniniva daneida, ta ʼesi Niboana Gwalagwalana neida, ta baʼe Niboani nana ʼinega kana vewaiwai be tomotau kana veyolubedi ta wese ada fata taudega kana ʼitamakida.
8 Waiwai nana neiu, ʼinega ge una iniyauyau eda Kaiwabu Valena ana simana weaqina, ta ʼesi tuta qabuna una lulugaihiea. Yaʼa iaʼuluguyegu vanue ʼebeyoqona ʼinaya Keliso Valena weaqina, ta weaqigu ge una iniyauyau. Oʼa wese vita taha taha una lobedi ʼidewani yaʼa, ta Yaubada ena waiwaiega una tovoloʼiʼita. 9 * Efe 2:8-9; Tai 3:5 Yaubada nana ʼetoyavuida ta venuaʼivineda toa vunavunaqina weaqina. Vonahaqiaqi, gebu itaʼa eda aqiaqi ʼinega davenuaʼivineda, ta ʼesi tauna ena nuenuega madugabeda ta ʼabiboda kuyavata qabudi ena vonega iʼifoqe. Baʼe yani nana viaqia mana nuanuana naveʼiteda ena nuakolokolo qiduana Ieisu Keliso ʼinega. 10 * Ibe 2:14 Ta baʼitagana ena nuanua niʼa giveʼifoqeyea ada Toʼetoyavua Ieisu Keliso ena mai ʼinega. Tauna ʼaliga ena waiwai luveawalia, ta Vale Aqiaqina ʼinega yawai vataya ana ʼeda givesimatalia ʼidaya.
11 * 1Tim 2:7 Yaubada ena nuenuega venuaʼivinegu Vale Aqiaqina weaqina. ʼInega Vale nana weaqina yavetovaletuyana be, yavetolugaihi ta wese yavetoveʼita. 12 Ta baʼe weaqina vanue ʼebeyoqona ʼinaya yatoatoa ta vita yalulutonovia. Ta gebu eda iniyauyau Vale nana weaqina, mana egu vetumaqana ʼiuna Ieisu yahalamani aqiaqiea. Ta wese yahalamania tauna ana fata egu fewa lova neigu naʼitamaki aqiaqiea ana laba naʼevivi namai ena ʼaubena qiduana ʼinaya. 13 Egu veʼita lova yaneiu una kafiʼiʼihia ta una vetutumei ta ʼinega tomotau una veʼitedi. Ta ge una nuafania tuta qabuna me eu vetumaqana be me eu veyoluba una toatoa, mana oʼa Ieisu Keliso maega. 14 * 1Tim 6:20 Eda vetumaqana ʼinega Niboana Gwalagwalana ʼidaya toatoa. Ta tauna ena iula ʼinega ana fata eu fewa lova Yaubada neiu una ʼitamaki aqiaqiea. 15 Niʼau ualamania diʼwe Eisia ana tovetumaqanayavo qabudi inogegu, ta qabu dina ʼidiega ʼoloto magilafudi Faigelusi be Elimogini wese inogegu.
16 Ta yavevenoqi eda Kaiwabu ʼinaya Onesifolo me ena gadeavo nanuakolokoloyedi, mana tauna tuta qabuna vavayausigu ta ena vona ʼinega givewaiwaiegu. Tauna ge taha tuta dainiyauyau egu toa vanue ʼebeyoqona ʼinaya weaqina. 17 Tuta nana mai baʼidia ʼabaga Loma ʼinaya ʼinega weaqigu sali dadana ana laba lobegu. 18 ʼInega yavevenoqi eda Kaiwabu ʼinaya ena ʼaubena qiduana ʼinaya ʼoloto nana nanuakolokoloyea qiduana. Mana niʼa ualamani aqiaqiea ena fewa ʼenaʼina weaqigu ʼabaga Efeso ʼinaya.