1 Tá ndi̱ꞌi ni̱yaꞌa ñayóꞌo, ta inka̱ yichi̱ ki̱xaa̱ ta̱Jesús no̱o̱ na ni̱xika xíꞌin ra yuꞌu̱ mi̱ni ña na̱ní Tiberias.* Mi̱ni Tiberias, inka̱ ki̱vi̱ ña kúu mi̱ni Galilea. Siꞌa ni̱xi̱yo ki̱vi̱ ki̱xaa̱ ra no̱o̱ na: 2 Na̱kutáꞌan sava na ni̱xika xíꞌin ta̱Jesús yuꞌu̱ mi̱ni yóꞌo, ndóo na. Nayóꞌo kúu ta̱Simón Pedro, xíꞌin ta̱Tomás ta̱ sa̱kunaní na ta̱Kuátí, xíꞌin ta̱Natanael, ta̱ kúu ta̱ñoo Caná estado Galilea, xíꞌin o̱vi̱ sa̱ꞌya ta̱Zebedeo, xíꞌin inka̱ o̱vi̱ ta̱a ta̱ kúu ta̱ ni̱xika xíꞌin ta̱Jesús. 3 Ta ni̱ka̱ꞌa̱n ta̱Simón Pedro xíꞌin na, káchí ra saá:

―Ko̱ꞌo̱n i̱ tava i̱ tia̱ká xíꞌin ñono̱ ―káchí ra.

Ta nda̱kuii̱n na, ni̱ka̱ꞌa̱n na xíꞌin ra:

―Ko̱ꞌo̱n ndi̱ xíꞌin ún ―káchí na.

Ta saá nda̱a na tón barco, ta kua̱ꞌa̱n na no̱o̱ takuií mi̱ni. Ta ñii níí ñoó ndúkú na tava na tia̱ká xíꞌin ñono̱, ta nda̱ ñii rí ni̱‑kuchiño na tava na.

4 Ta xa kua̱ꞌa̱n kixáꞌá ti̱vi xita̱a̱n kúu ña, ta saá ñíndichi ta̱Jesús yuꞌu̱ takuií mi̱ni, ta na ni̱xika xíꞌin ra yóꞌo o̱n vása ní‑kuchiño na nakoni na ndí ta̱Jesús kúu ra. 5 Ta nda̱ xíká ka̱ no̱o̱ ñíndichi ta̱Jesús, ni̱ka̱ꞌa̱n ra xíꞌin na:

―Nañani yó, ¿án kómí ndó tia̱ká kuxu yó? ―káchí ra xíꞌin na.

Ta nda̱kuii̱n na:

―Óꞌon, nda̱ ñii tia̱ká ni̱‑kuchiño ndi̱ tava ndi̱, tata ―káchí na.

6 Ta saá ni̱ka̱ꞌa̱n tuku ta̱Jesús xíꞌin na, káchí ra:

―Sakana niꞌni ndó ñono̱ ini takuií, chí sii̱n kuaꞌá tón barco, ta saá tava ndó tia̱ká ―káchí ra xíꞌin na.

Tá ke̱ꞌé na saá, nda̱tán ni̱ka̱ꞌa̱n ra xíꞌin na, ta kua̱ꞌa̱ ní tia̱ká chútú ini ñono̱, ta o̱n vása ní‑kundeé na tava na ñono̱, chi kua̱ꞌa̱ ní tia̱ká ñóꞌo ini ña. 7 Ta ñii ta̱ ni̱xika xíꞌin ta̱Jesús, ta̱ kúu ta̱ kíꞌvi ní ini ta̱Jesús xíni ra, ni̱ka̱ꞌa̱n ra xíꞌin ta̱Simón Pedro, káchí ra:

―¡Mi̱i Ta̱a ta̱Káꞌno no̱o̱ yó kúu ra! ―káchí ra.

Tá xi̱ni̱ so̱ꞌo ta̱Simón Pedro ñayóꞌo, ta saá kama na̱kundixin ra tiko̱to̱ ra, ña kúu ña ta̱va ra xa̱ꞌa̱ ña ki̱sa chiño ra, ta sa̱kana xíꞌin mi̱i ra no̱o̱ takuií ña kama ko̱ꞌo̱n ra ta xaa̱ ra no̱o̱ ñíndichi ta̱Jesús. 8 Ta inka̱ ni̱vi na ñóꞌo ini tón barco, síta na ñono̱ no̱o̱ chútú tia̱ká, ta kua̱ꞌa̱n na xíꞌin tón barco sa̱ta̱ ta̱Pedro. Saá chi yatin yuꞌu̱ takuií yóꞌo xi̱ndichi tón barco: ñaxíká xi̱ndichi nó xi̱kuu ñii ciento metro.† Ñii metro ñii kúu ña xíꞌin o̱vi̱ codo, ña kúu ki̱ꞌva xi̱choꞌon nañoo Israel. Ta saá ñii ciento metro kúu o̱vi̱ ciento codo. 9 Tá ki̱xaa̱ na xíꞌin tón barco yuꞌu̱ takuií, ta no̱o na tón barco yóꞌo, ta xi̱ni na ñii ñoꞌo̱ xíxi̱ no̱o̱ kánóo ñii tia̱ká yátan rí, ta saá tuku xi̱ni na si̱ta̱ va̱ꞌa. 10 Ta ni̱ka̱ꞌa̱n ta̱Jesús xíꞌin na, káchí ra saá:

―Taxi ndó loꞌo tia̱ká tí sa̱kán ta̱va ndó xíꞌin ñono̱ ña kuxu yó ―káchí ra xíꞌin na.

11 Ta ta̱Simón Pedro, nda̱a tuku ra tón barco, ta na̱sita ra ñono̱ no̱o̱ ñóꞌo tia̱ká, na̱sita ra ña nda̱ yuꞌu̱ takuií no̱o̱ yóo ñoꞌo̱ yi̱chí. Ta kua̱ꞌa̱ ní tia̱ká, ta nina tí náꞌno ñóꞌo ini ñono̱, ta kúu rí nda̱ ñii ciento o̱vi̱ si̱ko̱ u̱xu̱ u̱ni̱ tia̱ká náꞌno. Vará kua̱ꞌa̱ ní tia̱ká ñóꞌo, ta veé ní, ta o̱n vása ní‑taꞌnda̱ ñono̱ yóꞌo. 12 Ta ta̱Jesús ni̱ka̱ꞌa̱n ra, káchí ra xíꞌin na:

―Naꞌa ndó kuxu yó ―káchí ra.

Ta nda̱ ñii na ni̱xika xíꞌin ra ni̱‑ndaka̱ to̱ꞌon na ra yu kúu ra, chi xa na̱koni na ta̱Jesús, Ta̱a ta̱Káꞌno no̱o̱ na kúu ra. 13 Ta saá ta̱Jesús ti̱in ra si̱ta̱ va̱ꞌa, ta ta̱xi ra loꞌo ña ndaꞌa̱ ñii ñii na ni̱xika xíꞌin ra. Ta saá ta̱ꞌví ra tia̱ká, ta ta̱xi ra loꞌo rí ndaꞌa̱ ñii ñii na.

14 Nda̱ ki̱vi̱ na̱taku̱ ta̱Jesús ta̱nda̱ vitin, ñayóꞌo kúu yichi̱ u̱ni̱ ña ki̱xaa̱ ra no̱o̱ na ni̱xika xíꞌin ra.

15 Tá ndi̱ꞌi xi̱xi na, ta ta̱Jesús ni̱nda̱ka̱ to̱ꞌon ra ta̱Simón Pedro, káchí ra saá:

―Yóꞌó ta̱Simón, sa̱ꞌya ta̱Jonás, ¿án kíꞌvi ka̱ ini ún xíni ún yi̱ꞌi̱ no̱o̱ ña kíꞌvi ini nayóꞌo xíni na yi̱ꞌi̱? ―káchí ra.

Ta nda̱kuii̱n ta̱Simón Pedro, káchí ra saá:

―Oon, Tata, Ta̱a ta̱Káꞌno no̱o̱ i̱ kúu ún, xíni̱ ún ndí kíꞌvi ini i̱ xíni i̱ yóꞌó ―káchí ra xíꞌin ta̱Jesús.

Ta nda̱kuii̱n ta̱Jesús, ni̱ka̱ꞌa̱n ra xíꞌin ra:

―Taxi ún ñava̱ꞌa ña xíni̱ ñóꞌó ña kixáꞌan tíndikachi válí sa̱na̱ i̱ ―káchí ra xíꞌin ta̱Simón Pedro.

16 Ta tuku yichi̱ ta̱Jesús ni̱nda̱ka̱ to̱ꞌon ñaꞌá ra, káchí ra saá:

―Yóꞌó ta̱Simón, sa̱ꞌya ta̱Jonás, ¿án kíꞌvi ini ún xíni ún yi̱ꞌi̱? ―káchí ra.

Ta tuku nda̱kuii̱n ta̱Pedro, ni̱ka̱ꞌa̱n ra, káchí ra saá:

―Oon, Tata, Ta̱a ta̱Káꞌno no̱o̱ i̱ kúu ún, xíni̱ ún ndí kíꞌvi ní ini i̱ xíni i̱ yóꞌó ―káchí ra.

Ta saá ta̱Jesús nda̱kuii̱n ra:

―Vivíi kundaa ún tíndikachi sa̱na̱ i̱ ―káchí ra.

17 Ta ña yichi̱ u̱ni̱ ta̱Jesús ni̱nda̱ka̱ to̱ꞌon ra ta̱Simón Pedro, káchí ra saá:

―Yóꞌó ta̱Simón, sa̱ꞌya ta̱Jonás, ¿án kíꞌvi ini ún xíni ún yi̱ꞌi̱? ―káchí ra.

Ta ta̱Pedro kúchuchú ní ini ra, chi u̱ni̱ yichi̱ ta̱Jesús ni̱nda̱ka̱ to̱ꞌon ñaꞌá ra, káchí ra: “¿Án ndixa kíꞌvi ini ún xíni ún yi̱ꞌi̱?” Ta saá nda̱kuii̱n ra, ni̱ka̱ꞌa̱n ra xíꞌin ta̱Jesús, káchí ra saá:

―Tata, Ta̱a ta̱Káꞌno no̱o̱ i̱ kúu ún, yóꞌó kúu ta̱a ta̱ xíni̱ ndiꞌi ña yóo ini ni̱vi, ta xíni̱ ún ña ndixa kíꞌvi ini i̱ xíni i̱ yóꞌó ―káchí ra.

Ta tuku ni̱ka̱ꞌa̱n ta̱Jesús xíꞌin ra:

―Taxi ún ñava̱ꞌa ña xíni̱ ñóꞌó kixáꞌan tíndikachi sa̱na̱ i̱ ―káchí ra.

18 Ta ni̱ka̱ꞌa̱n ka̱ ra xíꞌin ta̱Pedro, káchí ra saá:

―Ñanda̱a̱ káꞌa̱n i̱ xíꞌin ún, tá ki̱vi̱ xi̱kuu ún ta̱loꞌo, ta xa̱ꞌnda chiño ún ndá tiko̱to̱ xi̱koni mi̱i ún xi̱ndixin ún, ta ñii ki̱ꞌva saá xa̱ꞌnda chiño ún ndá mí kóni mi̱i ún ko̱ꞌo̱n ún xi̱xa̱ꞌa̱n ún. Ta ki̱vi̱ kuu ún ta̱a ta̱ xi̱kua̱ꞌa̱ ní, ta inka̱ ni̱vi kuu na kaꞌnda chiño no̱o̱ ún xa̱ꞌa̱ ña nandika ún ndaꞌa̱ ún, ta ni̱vi yóꞌo sakundixin na yóꞌó tiko̱to̱, ta xíꞌin ñandu̱xa̱ ko̱ꞌo̱n ún xíꞌin nayóꞌo no̱o̱ o̱n vása kóni ún ko̱ꞌo̱n ún ―káchí ta̱Jesús xíꞌin ta̱Pedro.

19 Ta xíꞌin to̱ꞌon yóꞌo ta̱Jesús sa̱náꞌa ñaꞌá ra ndasaá koo kivi̱ ta̱Pedro, ta xa̱ꞌa̱ ña kivi̱ ra yóꞌo chinóo síkón ra ñato̱ꞌó Ndios. Ta saá tuku ni̱ka̱ꞌa̱n ta̱Jesús xíꞌin ta̱Pedro, káchí ra saá:

―Naꞌa, kundiko̱n ún sa̱ta̱ i̱ ―káchí ra.

20 Ta ta̱Pedro ndi̱kó koo ra na̱koto ra sa̱ta̱ ra, ta xi̱ni ra ndí ndíko̱n ñii ta̱a ta̱ kúu inka̱ ta̱ ni̱xika xíꞌin ta̱Jesús, ta̱a ta̱ kíꞌvi ní ini ta̱Jesús xíni ra kúu ta̱yóꞌo. Ta ta̱yóꞌo kúu ta̱a ta̱ sa̱kán loꞌo ki̱vi̱ ni̱yaꞌa xi̱noo si̱ni̱ ra mi̱i kándíká ta̱Jesús, ta ni̱nda̱ka̱ to̱ꞌon ra ta̱Jesús, ka̱chí ra: “¿Yu kúu ta̱a ta̱ si̱kó kuíꞌná yóꞌó no̱o̱ ni̱vi?”, ka̱chí ra xíꞌin ta̱Jesús. 21 Ta ta̱Pedro xi̱ni ra ta̱yóꞌo va̱xi ra, ta ni̱nda̱ka̱ to̱ꞌon ra ta̱Jesús, káchí ra saá:

―Tata, ta̱Káꞌno no̱o̱ i̱, ¿yukía̱ kundoꞌo ta̱yóꞌo? ―káchí ra.

22 Ta nda̱kuii̱n ta̱Jesús:

―Tá kóni i̱ ña kutaku̱ ra nda̱ ki̱vi̱ ndikó i̱ ñoyívi yóꞌo, ¿yukía̱ ndóꞌo ún ndíni ún xa̱ꞌa̱ ta̱yóꞌo? Ta yóꞌó, xíni̱ ñóꞌó kundiko̱n ún yi̱ꞌi̱ ―káchí ra xíꞌin ta̱Pedro.

23 Ña̱kán kía̱ ni̱xi̱ta̱ níꞌnó to̱ꞌon xa̱ꞌa̱ ta̱yóꞌo ña o̱n kivi̱ ra, chi saá nda̱to̱ꞌon xíꞌin táꞌan inka̱ na ni̱xika xíꞌin ta̱Jesús. Ta ta̱Jesús o̱n vása ní‑kaꞌa̱n ra ña o̱n kivi̱ ta̱yóꞌo. Saá chi ni̱ka̱ꞌa̱n ra: “Tá kóni i̱ ña kutaku̱ ta̱yóꞌo nda̱ ki̱vi̱ ndikó i̱ ñoyívi yóꞌo, ta, ¿yukía̱ ndóꞌo ún ndíni ún xa̱ꞌa̱ ta̱yóꞌo?”, ka̱chí ta̱Jesús.

24 Ta yi̱ꞌi̱ kúu ta̱yóꞌo, ta̱a ta̱ ni̱xika xíꞌin ta̱Jesús, ta ndákuii̱n i̱ xa̱ꞌa̱ ndiꞌi ñayóꞌo, ta yi̱ꞌi̱ kúu ta̱a ta̱ ni̱taa to̱ꞌon yóꞌo, ta xíni̱ yó ndiꞌi ña nda̱kuii̱n i̱ xa̱ꞌa̱ kúu ñanda̱a̱.

25 Yóo kua̱ꞌa̱ ní inka̱ chiño ki̱sa ndivi ta̱Jesús ñoyívi yóꞌo, ta o̱n vása ní‑taa i̱ ndiꞌi ña ki̱sa ndivi ra. Saá chi táná taa i̱ ndiꞌi ñayóꞌo, níkúu, ta xíni̱ ñóꞌó kuu ña kua̱ꞌa̱ ní tutu, ta xáni si̱ni̱ i̱ ndí o̱n vása kunani ñoyívi yóꞌo ña kutú tutu yóꞌo. Saá ná koo ña.