Kolinita wali Leta Labuina
Pol wana Leleli
Baaba Houwan
Pol wana nopain etonina gamwanaa i miminaa Epeso inoke Kolinita wali leta houwan i leli, kaiwena pulowan ge hanahanal enuna iyoho ekelesiya gamwanaa. Yaa bwagana leta o i ginol, hanahanal o iyoho ya eliyalil. Inoke ana awa i ola Pol i nok ga eliyalil sauga kaukaubwana ya ge abwe i sikal al Epeso. Nok toto ya gamwanaa Pol alonau ge Kolinita hi pehugahuga-agil ge amnan pupulowanina i gan ali hawawala. (Nok toto ya bana te i ba “no nowa toto valila” 2 Kolinita 2:1 elana ge bana i ba 13:2 elana.) I sikal Epeso enaa, yaka Kolinita wali leta etega i ginol ge baaba gasigasisena enuna i pek eliyalil ge i ba pahenapol. Leta o nige i gagan eliyala, yaa bana Pol i ba 2 Kolinita 2:3-4, 9 ge 7:8-12 elana. Leta o i patuna Taitas nimanaa.
Pol Epeso i eguluwan i nok i na labi Masidoniya, yaka abwe Taitas i pwawaa to i sikalem Kolinita (2:12-13 ge 7:5-6). Taitas Pol wana wasa i pek toabulilek Kolinita hi gewi Pol hi yaliyaya-an, yaa enuna iyoho pagan nanakina hi mimi awaawaginol. I ola al, topankite kakakawel enuna iyoho, heliya Pol wana tuwalali hi sisinali-an ge hi ba tage Pol nige apostolo i oola, heliya ya. Inoke Pol leta toto ya i ginol, yaka Taitas i sikal al Kolinita ge i pek elal.
Leta ya gamwanaa Pol totona yawalina ge wana tuwalali i liwanan (2:12–6:13). Wana nunuwana Kolinita elal ge wana yaliyaya heliya wali nunuwana kaiwena i pamasal. Yaa topankite kakakawel wali ba sisinali al i lahe (awalehina 10-12). Ge Pol i ba iya i nonok al Kolinita ge ni kitel, inoke nuwana bugul bolo hi hanahanal nihi pasapu ga mulaa abwe ni vin (ololana 12:20-21; 13:1-3). I ola al i liwaliwan elal mulolu etegana nihi lovivina-an nonowe toabulilek Yudiya bolo hi gulagula ali mulolu, inoke abwe ni ahe ni na ni pek elal (awalehina 8 ge 9). Leta ya ana nuwatu bwabwatana etegana iyoho 12:9 elana.
1
1 Nau Pol, Yehoba wana nuwatu eliyana ya tabwa Keliso Yeisu wana apostolo. Alou ge talila Timoti leta ya ha leli ge ha patuna i nowa Yehoba wana ekelesiya Kolinita eliyamiu, alomiyau ge Yehoba wana gamagalau gegewel labi Akaiya elana.
2 Ha awanun Yehoba Tamala ge wala Babala Yeisu Keliso nihi muloluagimiu ge wali nuwa laumwal atemiu ni pakalaopop.
Pol I Ba Mulolu Yehoba elana wana Labe kaiwena
3 Yehoba, iya wala Babala Yeisu Keliso wana Yabowaine ge Tamana, ta tobalan. Iya Tamala toatiatilomwan, ge iya Yabowaine toto ala labe gegewena i neem elana. 4 Sauga gegewena ebo pulowan ha pwawa, iya i labema, inoke bosowaima bolo ali pulowan tomaha ona i gan, labe toto Yehoba i pem, eliyana naha label. 5 He lomwan bwabwatana bolo Keliso i pwawa ama al ha pwawa, inoke i ola al Keliso eliyana labe bwabwatana ha pwawa. 6 Sauga ebo ama ha lomwan, he komiu ami labe ge yawalimiu ana pwamwal ku pwawa. Ge sauga ebo Yehoba i labema, he komiu al ge labe ku pwawa, inoke labe o i pagasisi-agimiu lomwan ololana ama ha lomwani nuku palahikan. 7 Atema i matuwaagimiu te nasi nuku talmilil gagasisi. He lomwan toto ama ha pwawa komiu al ku pwawa, inoke ha atena al te labe toto ama ha ahe komiu al ku ahiahi.
8 Talimeyau ge numeyau, nuwama wami wasa naha pewa pulowan kaiweliya, bolo ha pwawa labi Eisiya elana. Pulowan i bwata nabi ha pwawa i anlowagima ge wama gasisi nige bosowaina, inoke ha nuwatu te nasi naha aliga. 9 He tunahot ha nuwatu atemeya te iyaka ha yayaomal. Yaa ginol o i gan eliyama inoke bahi totoma ama mel naha teteli, yaa Yehoba, iya toyaomal i palutil, ana mel naha teli. 10 Nak toto ha pwawa bosowaina hot naha yaomali, yaa iya i pwamwalimaem nak o elana, ge i ola al sauga toto awomeya ni pwamwalimaem elana. Ge iya ha meltelian te ebo hauna pulowan ni gan ni pwamwalima. 11 He komiu wami awanun elana nuku labema. Inoke gamagalau hi gewi wali awanun lahena Yehoba ni muloluagima, yaka gamagalau nihi gewi nihi ba mulolu Yehoba elana wana mulolu eliyama kaiwena.
Pol wana Nuwatu I Pil Nok Kolinita kaiwena
12 Wama abayaliyaya bwabwatana hot etega i ola hiwe: atema gunina elana ha atena te wama pagan gamagalau elal i sapu ge i tunahot Yehoba matanaa. Nige ha golugoluwa siba toto i neem panayawiya, yaa wama gasisi i neem Yehoba wana mulolu elana. Wama pagan i ola to gamagalau gegewel panayawiya elal, ge wama pagan komiu eliyamiu i ola hot to. 13-14 He wami leta elal baaba bolo bosowaimiu nuku vasili ge ali sapu nuku atena ya te ha lelelian eliyamiu. Ge ya atena te ama ama aatena iyaka kekeisi i gan eliyamiu, inoke ateu i matuwa te abwe nuwamiu ni sapu hot ge nuku atena komiu ami ehanahanaha te ama, i ola te sauga Babala Yeisu ni sikalim ama ama ehanahanaha te komiu.
15-16 Ya atena tunahot te ku yaliyaya-agau, inoke valila no nuwatu ya ginol ya ba tage houwa ga na nowa eliyamiu ge abwe na nok na na Masidoniya. I ola al, ya ba tage sauga ebo na sikalem Masidoniya, na nowa al eliyamiu, inoke eliyana labe nuku pwawa paeluwa. Ge ya nuwatu tage komiu nuku labeyau na nok na na labi Yudiya. Yaa nau iyahe Masidoniya, nigeya ga ya nonowa i oola valila no baaba. 17 He ga i ola? Ku nuwatu valila ya ba ola o tage ya kakawemiu? Ku nuwatu ya baaba bwagabwaga ge no nuwatu ya teli pipili i ola panayawi gamagaliliyau wali pagan, inoke hohopewa ya talam ya ba, “Ibwe,” ge atewa ya towa ya ba, “Nigeya”? He nige i oola! 18 Yehoba iya tobaaba tunahot, ge i ola al nau ya ba tunahot eliyamiu te wama baaba eliyamiu i tunahot, nige tage hohopemeya naha ba “Ibwe” ge atemeya naha ba “Nigeya.” 19 He Yehoba Natuna Yeisu Keliso, toto alowau Sailasa ge Timoti ha papaatena-an eliyamiu, iya nige “Ibwe” ge pamaisena al “Nigeya.” Yaa iya bosowaina ana mel ta teli, iya “Ibwe” ya. 20 Yehoba bateli hi gewi i ginolil, he bateli o ali tunahot “Ibwe” i masala Keliso eliyana. Heiya te kaiwena sauga ebo Yehoba ta tobalan, inoke Yeisu Keliso alana elana ta ba “Ibwe. I ola.” 21 He Yehoba iya te komiu ge ama i pagasisela ge ta talmilil gagasisi Keliso elana. Kila i hilela, 22 ge wana euna i teli elala i pamasal kila wana gamagalau, Yayaluwa Bwabwalena i pem i minaa atelaa. He Yayaluwa Bwabwalena o iyaka ta ahe haba, inoke ta atena waisi gegewena bolo Yehoba i bateli kaiwela bwaliga abwe ta ahe al.
23 Yehoba matanaa ya ba tunahot eliyamiu te no puna ge nige ya nonowa Kolinita, heiya te nige nuwau ami lahi ge ami lomwan na ginol. 24 (Yaa nige tage naha logugui-agimiu wami abulilek kaiwena, ha atena te wami abulilek elana ku talmilil gagasisi. He alowau komiu ta tuwalali toyawa wami yaliyaya kaiwena.)