1 O Yooba, uulu yam lak! Pa wal tau tiurur lelen pu mi titoto mbulu ku na, kizin tasa imbot mini som.

Mi tomtom ta tizzo sua ŋonoono men na, ta kembena. Timbiriizi lup. Kizin tasa imbot mini som.

2 Tomtom ta boozomen tizzo sua ta ŋonoono somŋana i, mi tikamam sua pakaamŋana par pizin.

Kwon na, imbesmbeeze pizin tomtom. Mi lelen na, ipa ndel.

3-4 Yooba, yembut sua mbuyeeneŋan boozomen ta iwedet pa kwon i.

Zin wal ta tipakurkur zitun mi tizzo:

“Niam tomtom ki sua. Mbulu pareiŋana ta so amso pa, na tomtom ko tikam men. Asiŋ ko irao ipeteke yam? Som.”

Wal ta kembena na, pumun kwon.

5 Mi Yooba, ni iso ta kembei: “Zin wal ta len mburan biibi som,

mi tomtom tipasansaana zin mi tiurur pataŋana pizin na,

iŋgi be aŋmaŋga mi aŋuulu zin.

Pa zin wal ta timbot ŋoobo na, aŋleŋ tiŋiizi kizin kek.

Tana nio kola amkamke zin, mi aŋuulu zin ma timbot ambai.”

6 Mi sua ki Yooba, ina ambai komboono,

kembei silba ta tineene pa lamata mi ru bekena imilmil ma iŋgeeze kat.

Tana iti irao tuurla sua kini mi tapase pa. ✡ Mbo 19:9, 119:140

7-8 Ŋonoono, mazwaana taiŋgi, wal sananŋan nin zze mi tiwwa pa lele ta boozomen.

Mi mbulu soroksorok ta tikamam na, tomtom tire mi tipakurkur zin pa.

Tamen Yooba, nu ko motom piam,

mi poroukalkaala yam pa wal ta kembei ma alok. ✡ Yo 17:15; 1Pe 1:5