1 Leleyom ambai pa Yooba, mi kosoyaara zaana biibi.

Koso uraata kini bibip ila zin karkari mazwan bekena zin tiute.

2 Kombo mboe pini mi kapakuri.

Kipit mbol pa uraata kini ndabokbokŋan boozomen ta ipa ndel kat.

3 Yooba, ni zaana potomŋana. Tana iti nindi se pini mi tapakuri!

Zin wal ta so tikam kinkiini be tiute i mi timbot kolouŋana pini, nako lelen ambai kat mi menmeen zin.

4 Kuur motoyom pa Yooba mi kusuŋi be ipombol yom pa itunu mburaana.

Kakam kinkiini be kuute kati mi kombot kolouŋana pini. Naso ni imbotmbot raama yom totomen. ✡ Yo 17:3

5-6 Niom popoŋana ki Abaraam ta mbesooŋo kini na,

niom popoŋana ki Yakop ta Anutu ipeikat yom na,

motoyom iŋgalŋgal uraata mi mos bibip ta ni ikam na. Uraata kini tana ipa ndel kat.

Mi kadoono ta ni iur pa kanda koi bizin na, motoyom mbeleele pepe.

7 Ni Yooba, Anutu kiti tau.

Kadoono ta ni iurur pa kanda koi bizin na, uruunu ila ma irao toono ta boozomen.

8 Ko mataana iŋgalŋgal sua kini mbukŋana mi itoto ma alok.

Tomtom tipepeebe len kelŋan, mi iseeŋge iseeŋge ma ila. Mi sua ta ni itunu iur na, ta kembena. Ko imbol ma imbotmbot ma alok. ✡ Mbo 106:45, 111:5

9 Muŋgu ni imbuk sua pa Abaraam be ziru tiparlup zin ma tiwe tamen.

To ikam sua raraate men pa Isak, mi ipombol ma imbol kat. ✡ Un 15:18, 17:2+, 26:3; Lu 1:54+; Ibr 6:14+

10-11 To ikam sua mbukŋana tana pa Yakop,

mi ipombol mini ma iso sua tana ko imbol ma imbotmbot ma alok.

Mi iso pa Yakop ta kembei: “Nio ko aŋkam toono Kanaan ma iwe lem.

Mi toono tana ko iwe matamur pa popoŋana ku, be timbotmbot pa, mi iseeŋge iseeŋge ma ila.” ✡ Un 28:13+, 35:12

12 Indeeŋe tana, zin wal boozoŋan som.

Wal rimen ŋonoono. Mi tiwe leembe men su toono tana.

13 Tana timbot ri isu lele ta, to tizem mi tila lele toro.

Tila tipet ki king ta mi timbot raami, to tizemi mi tila tipet ki king toro. Ta kembei men mi tiwwa.

14-15 Mi Anutu, ni mataana pizin. Tana iyok pa wal sa be tikoto zin mi tipasaana zin na som.

Mi ikam ŋgalseki pa king pakan ma iso pizin ta kembei:

“Zin wal ta ituŋ aŋpeikat zin mi aŋur zin be tikam uraata tio na, kumbuulu zin pepe.

Pa zin tiwe nio kwoŋ. Tana kapasaana zin pepe.” ✡ Un 12:17, 20:3+

16 To Yooba ikam ma peteele ipet pa toono Kanaan.

Tabe Yakop bizin tirao be tindeeŋe kan kini sa som.

17 Mi ni iŋgo tomtom kizin ta, zaana Yosep ma imuuŋgu pizin.

Ni, tikam mburooŋo pini ma iwe mbesooŋo sorok pizin Aikuptu. ✡ Un 37:27+, 45:5

18 Mi zin Aikuptu kan tiuri lela ruumu sanaana, mi tikam sen ila ŋgureene mi timbit la kumbuunu.

Tana ni ire yoyouŋana ma isaana kat. ✡ Un 39:20

19 Imbotmbot ta kembei ma irao iso zin Aikuptu kan pa mbulu tabe ipet pizin i, mi sua kini tana iur ŋonoono.

Tana sua ta Yooba ikam pini na, iswe Yosep kembei ni le uunu sa som, mi mbulu kini iŋgeeze men.

20 To king ki Aikuptu ta ikamam peeze pizin wal boozomen na, iur sua be tiputke Yosep,

mi tizemi ma iyooto pa ruumu sanaana. ✡ Un 41:14

21 Mi iuri be imboro ruumu kini biibi,

mibe ikam peeze pa koroŋ kini ta boozomen. ✡ Un 41:40

22 Tana Yosep iwe biibi pizin wal ta timuŋmuuŋgu pa uraata ki king na, mi ipazalzal zin.

Mi zin wal ta tiuluulu king pa ŋgar na, ni ipaute zin pa ŋgar ambaiŋana.

23 Ina zaala tina ta zin Israel tisula Aikuptu.

Tana popoŋana ki Yakop tiwe leembe pa wal ki Ham toono kizin. ✡ Un 46:1+

24 Mi Yooba ipombolmbol wal kini, ma timasak ma tiwe boozo kat.

Tabe mburan ilip pa zin kartu. ✡ Kam 1:7

25 To itooro ŋgar kizin Aikuptu ma tiwe wal kini kan koi.

Tana tiru zaala be tipakaam zin mbesooŋo ki Anutu mi tikam pataŋana pizin.

26 To Yooba iŋgo mbesooŋo kini Mose ziru Aron ma tisula Aikuptu.

Aron tana, Yooba itunu ipeikati. ✡ Kam 3:10, 4:16

27 Mi ziru tiwe Yooba kwoono mi tiso zin Aikuptu kan pa mos bibip mi uraata mburanŋan tabe Yooba ikam la mazwan i. Uraata tana ipa ndel kat. ✡ Kam 7:9+

28 Yooba ikam ma zugut mandiŋ ipet pa toono kizin Aikuptu.

Pa zin tizooro la kalŋaana tau. ✡ Kam 10:22

29 Mi itooro yok kizin ma tiwe siŋ.

Tabe ye kizin ta boozomen timetmeete lup. ✡ Kam 7:19+

30 Mi ikam ma lele kizin bok pa ŋgeu.

Ruumu leleene boozomen ta zin peeze kan kizin Aikuptu tikenne pa na, ina tomini ŋgeu tilela ma bok. ✡ Kam 8:2

31 Mi Yooba iur sua, to mberommberom ramaki muŋgingin dudut ma timar,

mi tirao pa toono kizin Aikuptu. ✡ Kam 8:17

32 Mi ni itooro yaŋ kizin ma iwe yaŋpat, mi isu ma ipasaana toono kizin.

Mi ikam ma lolo niini iwenweene irao lele kizin ta boozomen. ✡ Kam 9:23+

33 Tana ipasaana ke baen mi ke fik kizin,

mi ke pakan tomini.

34 Mi iur sua to siizi munŋaana ka tieene tipet ma tilol lele ma sik.

Siizi tana, tinin na tarao som. ✡ Kam 10:12+

35 Mi tikan kini ramaki koroŋ boozomen ta tindomdom pa toono kizin Aikuptu na ma imap.

36 Kaimer to Yooba ikasgeege lutun bizin muŋgamuŋga ta boozomen.

Ula kizin ka ŋonoono mataana kana, ta tisu lup. ✡ Kam 12:29

37 To Yooba iyaaru zin Israel ma tizem Aikuptu, mi tila raama mburu milmilŋan kizin Aikuptu ta tiurpe pa silba mi gol na.

Mi timap ma tipa ambai men mi tila. Kizin tasa imborene som. ✡ Kam 12:35

38 Indeeŋe zin Aikuptu kan tire zin Israel tizem zin mi tila na, lelen ambai kat.

Pa timoto zin tau!

39 Yooba ikam miiri tieene ma iwe ur pizin pa aigule.

Mi mbeŋ na, you miaana iyaryaara mi iurur mat pizin. ✡ Kam 13:21

40 Indeeŋe zin tiwi i pa kan kini na, ni ikam man kiau mi kini saamba kana pizin.

Tana tikam ma tikan ma kopon bok. ✡ Kam 16:13+

41 Ni ipetepaala pat, mi yok ipet pa.

Yok tana irereere ma biibi pa lele magargaaraŋana ta ka yok somŋana na. ✡ Kam 17:6; 1Kor 10:4

42 Yooba ikam mbulu ta boozomen tana paso,

mataana iŋgalŋgal sua kini potomŋana ta imbuk pa mbesooŋo kini Abaraam na.

43 Tana Yooba iyaaru zin wal kini ta itunu ipeikat zin na, ma tizem Aikuptu,

mi tila raama menmeen zin, mi timbombo mboe pakurŋana.

44 Mi ni ikam toono kizin karkari pa wal kini ma iwe len.

Tana timbot se wal pakan uraata kizin tieene.

45 Mbulu ta boozomen tana, Yooba ikam pizin, bekena tito tutu kini ta imbot pataaŋa kek na,

mi mataana iŋgalŋgal sua ta ni ikam pizin.

Haleluya!