89
Zin Israel lelen iwe ru pa sua mbukŋana ta Merere ikam pa Dabit na
Mboe ki Etan, tomtom kizin Ezra
1 O Yooba, nio ko aŋbombo mboe mi aŋpakurkuru pa uraata ku boozomen ta iswe kembei nu urur lelem pa wal ku mi muŋaiŋai zin.
Mi mbulu ku ta toto sua ku mbukŋana na, kwoŋ ko izzoyaryaara pizin tomtom totomen.
2 Ko aŋzzo ta kembei: Mbulu ku ta urur lelem pa wal ku mi muŋaiŋai zin, inako imbotmbot ma alok.
Mi mbulu ku ta toto sua ku mbukŋana, inako imbol ma imbotmbot kembei ta saamba, mi iseeŋge iseeŋge ma ila.
3-4 Muŋgu nu itum so ta kembei: “Nio aŋpeikat mbesooŋo tio Dabit mi aŋbuk sua pini kek.
Mi aŋpombol sua tana ma imbol kat. Sua ta kembei:
‘Nio ko aŋpamender zin popoŋana ku be tiwe king. Mi zin ko tikam peeze pizin Israel ma alok.
Popoŋana ku ko tiparpekelkel zin, mi timbutultul se king muriini peeze kana, mi tikamam peeze, mi iseeŋge iseeŋge ma ila.’ ”
5 O Yooba, zin wal mburanŋan mi potomŋan ki kar saamba tiwidit urum pa uraata bibip ta kamam na.
Zin tiluplup zin mi tipakurkuru pa mbulu ku ta toto sua ku mbukŋana na. ✡ Tur 4:8
6 Yooba, nu kadom asiŋ? Som. Pa nu lip pa koroŋ boozomen ta timbotmbot saamba na.
Wal saamba kan, kizin tasa irao u som.
7 Nu mburom ilip kat pa zin wal mburanŋan mi potomŋan ta tiluplup zin su kerem uunu ta saamba a. Tanata timototo u mi timbesmbeeze pu.
8 Yooba, nu Anutu mburom keskeezeŋom. Merere toro sa kembei nu na som.
Pa nu mburom biibi. Mi tortooro ŋgar ku som. Nu toto sua ku mbukŋana pa koroŋ ta boozomen.
9 Nu ta mborro tai.
Sombe duubu zoŋo zirzirŋana, na nu rao be kam ma taun isu.
10 Mi muŋgu nu petepaala Rahab uteene ma imeete. * Wal pakan ta tigarau Israel na, tiurla ta kembei: Koroŋ sananŋana ta imbot tai, zaana Rahab. Gorgori ikamam be ipasaana koroŋ ta boozomen. Muŋgu kat, ziru Anutu tiporou ma Anutu ilip. Mi koozi na, Anutu iyaramraami.
Mi nomom mburaanaŋana ta iyaŋgwiiri kom koi bizin ma tiko papirik.
11 Saamba na koroŋ ku. Mi toono tomini, ina koroŋ ku men.
Pa nu ta ur saamba mi toono ramaki koroŋ boozomen ta timbotmbot pa. ✡ Mbo 24:1
12 Nu ur toono ma ila imap su re uunu, mi ila imap su iwaara uunu.
Abal Tabor mi abal Hermon lelen ambai pu mi timbombo mboe be tipakur zom.
13 Nu mburom keskeezeŋom.
Nomom woono na, mburaana ilip kat be ikas kom koi bizin.
14 Peeze ku, ina imender se mbulu ku ta urpewe pataŋana kizin tomtom mi kamam mbulu ndeeŋeŋana men.
Mi mbulu ku ta boozomen izzwe kembei: Nu toto sua ku mbukŋana mi urur lelem pa wal ku.
15 Yooba, zin wal ta tiluplup zin pa suŋŋana, mi kalŋan izalla ma tipakurkuru na, menmeen zin.
Pa wal ta kembei tipa pai kizin pa mat ku leleene, tana nu mbotmbot raama zin mi kampewe zin. ✡ Yo 8:12; 1Yo 1:7
16 Zin tiute mbulu ta kamam na.
Tana aigule ta boozomen, zoŋ ise ma ila zoŋ isula na,
lelen ambai kat, mi tipakurkuru pa mbulu ku ndeeŋeŋana.
17 Nu pombolmbol yam, tanata niyam ise mi zoyam iwe biibi.
Kampeŋana ku, ta ikam yam ma amlip pa koyam koi bizin.
18 O Yooba, nu itum ta pamender king tiam be iwe siŋgiao piam.
Nu Anutu tiam Israel, mi nu potomŋom. Mi nu ta ur king tiam be ikam peeze piam.
Sua mbukŋana ta Merere ikam pa Dabit
19 Zin wal ta tiurur lelen pa Anutu mi titoto mbulu kini na, muŋgu kat ni ipatooŋo zin pa mbulu tabe ni ikam. Iso pizin ta kembei:
“Naŋgaŋ ta, ni imbotmbot la mazwoyom.
Nio ituŋ aŋpeikati be aŋpakuri ma iwe biibi.
Mi aŋpomboli ma ilip pa zin wal malmal kan.
20 Nio aŋdeeŋe mbesooŋo tio Dabit,
mi aŋliŋ ŋgere potomŋana isala uteene kek bekena aŋuri pa uraata. ✡ Ŋgo 13:22
21 Nio kola aŋkiskisi mi aŋpombolmboli.
Mi nomoŋ woono ko isilou i.
22 Ka koi sa ko irao ilip pini na som.
Mi tomtom sananŋana sa ko irao be ikoto i na som.
23 Pa nio ko aŋmuŋmuuŋgu pini mi aŋkazas ka koi bizin.
Zin wal ta so tiurur koi pini na, nio ko aŋpun zin ma timetmeete lup.
24 Nio ko aŋtoto sua ta aŋbuk pini na, mi aŋurur leleŋ pini. Mi ko irao aŋzemi na som.
Ko aŋbotmbot raami mi aŋpombolmboli be iliplip pa ka koi bizin. Tana zaana ko iwe biibi kat.
25 Nio ko aŋkam ma toono kini iwe biibi. Ko ipera pa Tai Mediterenian,
mi ilela pa toono uunu, to ila imiili su yok Euprates.
26 Ni ko iso pio ta kembei: ‘Nu na nio Tamaŋ.
Nu Merere tio mi ulaaŋa tio mbolŋana ta pombolmbol yo mi menderkalkaala yo.’ ✡ Ibr 1:5
27 Mi nio ko aŋkami ma iwe lutuŋ muŋgamuŋga.
Tana ni ko ilip pa king ta boozomen. ✡ Ep 1:20+; Kol 1:18; Tur 1:5
Sua ta Merere imbuk pizin popoŋana ki Dabit
28 Nio ko aŋurur leleŋ pini ma alok.
Mi sua ta aŋbuk pini na, ta kembena. Ko imbol mi imbotmbot ma alok.
29 Mi nio ko aŋpamender wal kini be tikam peeze pizin Israel.
Peeze kizin ko imbotmbot ma alok, kembei ta saamba.
Pa popoŋana kini ko tiparpekelkel zin ma tiwe king, mi timbutultul se Dabit muriini peeze kana, mi iseeŋge iseeŋge ma ila. ✡ Lu 1:33; Ibr 1:8
30 Tamen, sombe popoŋana kini tipizil ndemen pa sua tio,
mi tipa pai kizin ma indeeŋe pa tutu tio som,
31 mi tirepiili tutu tio ta imbot pataaŋa kek na kembei koroŋ sorok,
mi timolo tutu tio,
32 nako aŋbalis zin pa zooroŋana kizin.
Zin ko tire yoyouŋana pa sanaana kizin.
33 Tamen ko irao aŋtatke muŋaiŋana tio pa Dabit mi popoŋana kini na som.
Mi sua ta aŋbuk pini na, irao aŋpizil ndemeŋ pa na som.
34 Pa sua tana, irao aŋrepiili kembei koroŋ sorok na som.
Sua ta ipet pa ituŋ kwoŋ na, irao aŋtooro na som. Som kat.
35 Pa nio Merere potomŋoŋ. Tana sua ta aŋpombol ma imbol kek, nako imbotmbot ta kembei ma alok.
Irao aŋpakaam Dabit pa na som. Som ma som kat.
36 Sua ta kembei: Popoŋana kini ko irao timap na som.
Ko motoŋ pizin ma timbotmbot mi tikamam peeze, mi iseeŋge iseeŋge ma ila.
Peeze kizin ko imbotmbot ma alok, kembei ta zoŋ.
37 Peeze kizin ko imbol ma imbotmbot kembei ta puulu.
Pa Ni ta imbotmbot ta saamba a, irre koroŋ ta boozomen mi itoto sua kini.”
Tiŋiizi pa pataŋana ta ipet pa king
38 Yooba, muŋgu nu so sua ta kembei. Tamen koozi nu ketem malmal biibi kat pa king ta itum roogi mi uri pa uraata na.
Mi lelem pini som, mi pizil kat ndemem pini.
39 Sua mbukŋana ta kam pa mbesooŋo ku na, iŋgi nu reege kek.
Mi kinke mogar kini mi pundu sula toono.
40 Siiri bibip mi mbolŋan ta tiliu kar kini na, nu reege zin ma tisu lup.
Mi pasaana ruumu kini mbolŋan ta boozomen ma borok su toono.
41 Tana wal boozomen ta tiwwa len sorok ma timar na, tikemem len koroŋ kini.
Mi wal ta tigarau i na, tirepilpiili i mi tikamam ŋeu pini.
42 Yooba, nu ta pombol king tiam ka koi bizin ma timaŋga pini mi tilip pini.
Tana kam ma zin ta boozomen menmeen zin.
43 Mi pimiili Dabit zaaba kini ma imiili mini mi ipasaana itunu.
Pa indeeŋe ta ni ikam malmal na, nu pomboli som.
44 Tana koroŋ kini ndabokbokŋan ta zaana biibi pa na, nu tatke pini.
Mi muriini peeze kana na, nu reege ma borok su toono.
45 Ni naŋgaŋ kaibiim. Tamen nu kami ma isaana ma iwe kolman karau men.
Tana pamiaŋi biibi kat.
Suŋŋana pa ulaaŋa
46 O Yooba, ŋiizi na motom mar piam mini?
Ko ketem malmalŋana ku imbotmbot se tiam ma alok?
47 Yooba, lelem isaana piam.
Motom ŋgal. Niam tomtom ambotmbot su toono ma molo som.
Nu itum ta mbuuzu yam pa toono ma ampet. Ko uraata ku tana iwe koroŋ sorok? ✡ Mbo 39:5
48 Asiŋ ta irao imeete som mi imbot mataana iyaryaara men isu toono ti?
Asiŋ irao itatke itunu pa meeteŋana mburaana? Som. ✡ Mbo 49:7+
49 Yooba, muŋgu nu toto sua ku mbukŋana mi urur lelem pa wal ku. Tamen buri na, muŋaiŋana ku ila parei?
Sua ku mbukŋana ta kam pa Dabit mi pombol ma imbol kat na, parei ta toto mini som?
50 O Yooba, motom iŋgal yam mbesooŋo ku.
Pa iŋgi zin karkari tipamiaŋ yam,
mi tirepilpiili yam ma leleyam isaana kat.
51 Yooba, re king ta itum roogi mi uri pa uraata na.
Lele swoi ta ni isombe ila pa i, na kom koi bizin tipasomi,
mi tigibgiibi sua repiiliŋana pini.
52 Tapakur Yooba pa kampeŋana kini totomen.
Ŋonoono kat.