4
Sadan itoombo Yesu
(Mt 4:4-11; Mk 1:12-13)
1 Bubuŋana Potomŋana izeebe Yesu, to izem yok Yordan, mi Bubuŋana ipaŋgutŋguuti ma ila iwwa pa lele bilimŋana pa aigule tomtooru. 2 Mi Sadan iwedet kini mi itomtoombi. Mazwaana tana, Yesu ikan kini sa som, tabe peteli ma isaana kat.
3 Tana Sadan ipet kini mi iso: “Lak, nu sombe Anutu Lutuunu, na ur sua pizin pat ti, bekena iwe kom kini ma kan.” 4 Tamen Yesu ipekel kwoono ma iso: “Sua imbot pataaŋa kek ta kembei:
Kini men ko irao ikis tomtom sa ma imbot ndabok na som.”✡ Lo 8:3; Yesa 55:1-2
5 Tona Sadan ikami ma tisala lele ta imbot kor kat. To karau men mi iso i pa lele mi toono ta boozomen ma imap. 6-7 Mi iso pini ma iso: “Re. Koroŋ tau ndabokbokŋan mi zanŋan mi mburanŋan taiŋgi, nio ko aŋkam ma iwe lem. Pa koroŋ ta boozomen taiŋgi imar nomoŋ kek. Tana sombe leleŋ be aŋkam pa tomtom sa, na irao aŋkam pini. Mi nu itum tau. Sombe lek kumbum pio mi pakur yo, na koroŋ taiŋgi ko imap ma iwe lem.”✡ Yo 12:31; 2Kor 4:4; 1Yo 2:15+
8 Tamen Yesu ipekel kwoono ma iso: “Sua imbot pataaŋa kek ta kembei:
Lek kumbum pa Merere Anutu ku mi mbeeze pa ni itutamen.”✡ Lo 6:13, 10:20
9 Mi Sadan ikam Yesu ma tila Yerusalem, mi tisala pa Urum Merere uteene, to iso lae pa Yesu ma iso: “Sombe nu Anutu Lutuunu, na mbot ti mi lu u ma sula. 10-11 Pa sua imbot pataaŋa kek ta kembei:
Ni ko iur sua pizin aŋela kini be timboro u mi matan pu.
Mi zin ko tisiibu,
kokena punu se pat.”✡ Mbo 91:11+
12 Tamen Yesu ipekel kwoono ma iso: “Tamen sua lwoono toro iso ta kembei:
Nu irao toombo sorok Merere Anutu ku mburaana pepe.”✡ Lo 6:16; 1Kor 10:9
13 Tana Sadan itoombo Yesu pa zaala ta boozomen ma som, to izemi ma imbot ŋana ri.✡ Ibr 2:18, 4:15
Yesu imaŋga pa uraata kini isu Galilea
(Mt 4:12-17; Mk 1:14-15)
14 Toomboŋana tana imap na, Bubuŋana Potomŋana mburaana izeebe kat Yesu. To imaŋga mi imiili ma ila pa Galilea. Mi uruunu irak ma irao lele. 15 Ni ikamam sua pizin tomtom isu lupŋana muriini kizin kizin, mi iwal biibi ta tileŋ sua kini na, tiwidit uruunu.
Zin Nasaret kan tiurla ki Yesu som mi tirepiili i
(Mt 13:53-58; Mk 6:1-6)
16 Yesu ila kar kini Nasaret. Indeeŋe ta ni musaana mi imar na, imbotmbot kar ta tana. Mi indeeŋe aigule potomŋana tabe keten su pa i na, ilela lupŋana muriini. Pa mbulu kini ta kembeaŋana. Ni ilela, to imaŋga mi imender la iwal biibi matan be ipaata sua.✡ Mt 2:23
17 Mi tisara ro ta sua ki Anutu kwoono Yesaya imbot se na ila kini, to ipeele ma indeeŋe sua ta iso ta kembei. Isombe:
18-19 Merere Bubuŋana mburaana ise tio kek.
Pa ni iroogo yo mi iur yo be aŋla aŋsoyaara uruunu ambaiŋana pizin tomtom ta timbot ŋoobo na.
Mi iŋgo yo be aŋso pizin wal ta timbot la kan koi bizin naman na ta kembei:
“Koyooto ma kala. Kosa sa ipakaala yom mini som.”
Mi zin wal ta matan pisŋan na, iŋgi be matan peere.
Mi zin wal ta tomtom tiseseeze matan mi tikototo zin na, nio aŋmar be aŋtatke zin pa pataŋana kizin.
Mi aŋmar be aŋsoyaara sua pizin tomtom ta kembei: Nol tabe Merere iswe kat kampeŋana kini i, ta ipet kek.”✡ Yesa 61:1+; Yo 3:34; 2Kor 6:2
20 Yesu ipaata sua ma imap, to ilek ro mi iur la ki urum tuunu. Tona mbuleene su be iso ka ŋgar pizin. Tabe zin iwal ta timbot tina tikor matan pini. 21 Mi ni imaŋga pa sua ta kembei: “Sua ta keleŋleŋ i, koozi iur ŋonoono kek.”
22 Iwal biibi tileŋleŋ sua ta ni izzo pa kampeŋana ki Anutu na, tiwit uruunu mi tikam ŋgar boozo pa. To tisu na tiparzzo pizin. Tiso: “Wai, to ti, ni Yosep lutuunu tau. Mi parei ta ni irao izzo sua ta kembei?”✡ Mk 1:22; Yo 6:42, 7:15
23 Tana Yesu iso pizin ta kembei: “Nio aŋute. Niom iŋgi be koso yo pa sua ta gorgori tizzo na ma kosombe: ‘Nu tomtom ta urpewe zin tomtom pa mete kizin na, motom iŋgal be urpe itum muŋgu. Mbulu ta amleŋ nu kamam su kar Kapenaum na, parei ta kam su tiŋgi som? Pa iŋgi sa itum kar ku na.’ ”✡ Mk 1:21+
24 To Yesu iseeŋge sua kini mini ma iso: “Nio aŋso kat piom: Tomtom ta so iwe Anutu kwoono, na itunu wal kini ko tiur lelen pini som.✡ Mt 13:57; Yo 4:44
25 Mbulu ta ipet muŋgu na, motoyom iŋgal som? Indeeŋe gorgor ki Anutu kwoono Ilia na, yaŋ isu som pa ndaama tel mi pakaana. Tana peteele biibi ikam zin. Mi Israel nan na, noroŋa boozomen timbotmbot.✡ 1Kin 17:1, 18:1; Yems 5:17+
26 Tamen Anutu iŋgo Ilia ma ila be iuulu kizin tasa na som. Ni iŋgo i ma ila ki nora ta, ta imbot su kar Sarapet ta imbot lele pakaana ki Sidon na.✡ 1Kin 17:8+
27 Mi indeeŋe gorgor ki Anutu kwoono Elisa tomini na, zin Israel tomtom kizin boozomen ta mbetmbeete sananŋana ikam zin. Tamen Elisa iurpe tomtom kizin tasa som. Iurpe Naeman itutamen ma mete iko pini. Naeman tana tomini, tomtom ki lele pakaana toro zaana Siria.”✡ 2Kin 5:1+
28 Iwal biibi ta timbotmbot lela lupŋana leleene na, tileŋ Yesu sua kini, to keten ibeleu kat. 29 Tana timaŋga mi tiziiri i pa kar, to tiyaaru tataati ma tisala pa lele ndomoonoŋana ta kar kizin imbot pa na. Mi tisombe tipiri i sula pa lele sipkatŋana. 30 Som, mi ni ipa pa mazwan, mi ibeleu ma imar ila lene.✡ Yo 8:59, 10:39
Yesu iziiri bubuŋana sananŋana pa tomtom ta
(Mk 1:21-28)
31 Yesu imaŋga mi isula pa kar ta ki Galilea, zaana Kapenaum. Mi indeeŋe aigule potomŋana tabe keten su pa i na, ni ikamam sua pizin tomtom. 32 Mi zin tileŋ sua ma kwon itaanda. Pa ni izzo katkat sua raama mburaana kembei ta tomtom ta zaana pa uraata kini.✡ Mt 7:28+; Yo 7:46
33 Mi lupŋana muriini leleene na, tomtom ta imbotmbot. Ni, bubuŋana sananŋana izeebi. Tana iboobo mi kalŋaana izalla ma iso: 34 “Aii, Yesu ki Nasaret, nu sombe kam parei piam? Iŋgi mar be pambiriizi yam? Nio aŋkilaalu kek. Nu Anutu tomtom kini potomŋana.”✡ Mt 8:29; Mk 1:24; Yems 2:19
35 Tamen Yesu iŋasaari ma iso: “Hait, mane mi yooto pini!” Tona bubuŋana sananŋana ipalkeete tomtom tana isu iwal biibi keren uunu mi iyooto pini. Mi ikam kosa sa pini som.
36 Zin iwal biibi tire mbulu tina ma timurur pa Anutu mburaana. To tiparso pizin ma tiso: “Iŋgi sua ti pareiŋana? Iŋgi kembei tomtom tiŋgi le mburaana mi zaana be iur sua pizin bubuŋana sananŋan ma tiyooto ma tila len.” 37 Iŋgi uunu tiŋgi tabe Yesu uruunu irak ma irao lele pakaana tina.
Yesu iziiri mete pizin wal boozomen
(Mt 8:14-17; Mk 1:29-34)
38 To Yesu imaŋga ma izem lupŋana muriini tana, mi ilela Simon ruumu kini. Mi Simon rwoono mooribi, ni kuliini ibayou kat ma ikenne. Tabe titaŋroro Yesu be iuuli. 39 Tona Yesu ila ma imender salakaali, mi iyaamba mete tana be iyooto pini. To mooribi tana, burup ma imaŋga, mi ila iurpe kan kini.
40 Rou ma zoŋ isula na, zin iwal tiyyo zin tomtom kizin ta mete matakiŋa ikam zin na, ma tilala kini be iuulu zin. Mi ni iur namaana salakaala zin tataŋa, mi iurpe zin ma nin ambai lup. 41 Mi bubuŋana sananŋan tomini tiyotyooto pizin tomtom, mi kalŋan izalla ta kor a ma tizzo: “Nu Anutu Lutuunu tau.” Tamen ni iyaamba zin mi ipeteke zin be tiswe i pepe. Paso, zin tiute: Ni ta Mesia.✡ Mk 1:24+, 3:11+
Yesu izzoyaryaara sua pizin tomtom
(Mk 1:35-39)
42 Mbeŋbeŋŋana mi Yesu imaŋga ma ila pa lele ta ka tomtom somŋana i bekena itutamen imbot. Mi som. Pa tomtom pakan tiru i ma timar. Beso tindeeŋi na, tisombe tiruuti. Kokena izem zin.✡ Mbo 5:3; Mt 14:23; Mk 6:46
43 Tamen ni imaŋga mi iso: “Som. Nio bela aŋla ma aŋsoyaara uruunu ambaiŋana pa peeze ki Anutu ila kar bibip pakan tomini. Pa Anutu iŋgo yo pa uraata ta kembei.”✡ Lu 8:1; 1Kor 9:16
44 Tana ni iwwa pa lele pakaana ta zin Yuda timbotmbot pa na, mi izzoyaryaara sua lela lupŋana muriini kizin kizin.