1 To Yooba iso pa Mose. Iso: “Nu niomŋan zin wal ku Israel ta kam zin ma niomŋan kezem Aikuptu na, kuurpe ituyom bekena kamaŋga mini mi kala pa toono Kanaan. Toono tana, ta muŋgu aŋbuk ka sua ila ki Abaraam, Isak, mi Yakop ma aŋsombe: ‘Nio ko aŋkam toono tiŋgi ma iwe popoŋana tiom len.’✡ Un 12:7, 26:3, 28:13 2 Mi nio ko aŋgo aŋela sa ma imuuŋgu piom be iziiri toono tana ka tomtom bizin ma tila len. 3 Naso kakam toono kizin ta ambaiŋana mi mbuyeeneŋana na ma iwe leyom, be kombotmbot pa. Tamen nio ituŋ, nako irao aŋgaaba yom mi itiŋan tala na som. Pa niom tina wal zorzooroŋoyom kat. Kokena kakam mbulu toro mini mi kapamalmal keteŋ, to aŋkas yom isu zaala lwoono ma kamap.”

4 Zin iwal biibi tileŋ Yooba sua kini mbolŋana tana, to lelen ipata kat mi tikam tiŋiizi biibi. Tabe tiur mburu ambaimbaiŋan ila kulin mini som. 5 Paso, Yooba iso pa Mose ma iso: “So pizin Israel ta kembei: Niom tina, wal zorzooroŋoyom kat. Tana nio ko irao aŋgaaba yom risa na som. Kokena kapas keteŋ, to aŋkas yom lup. Tana kikinke mburu tiom ambaimbaiŋan ma isu lup, mi kombotmbot ma kasa yo be motoŋ iŋgal leyom zaala sa. Ko aŋkam parei piom?”

6 Tana indeeŋe ta zin Israel timaŋga be tizem abal Sinai mi ila na, tiur mburu ambaimbaiŋan ila kulin mini som.

7 Indeeŋe zin Israel tiwwa pa zaala na, sombe tipun su lele pakaana sa, na Mose karau men mi ipamender beeze ta ma ila imbot ndel pizin iwal biibi. Beeze tana, tipaata tisombe lupŋana muriini. Mi wal boozomen ta lelen be tiwi Yooba pa koroŋ sa na, tilala beeze tana, mi tizzo pa Mose. To Mose iwe kwon mi izzo sua kizin ila ki Yooba. 8-9 Mi indeeŋe ta Mose isombe ipa ma ila pa beeze tana na, zin iwal biibi timaŋgaŋga, to timendernder irao beeze kizin kizin kwon, mi tikoror matan pini ma irao ila ma sam lela. Ilela tona, miiri tieene biibi imarmar ma ipakalkaala beeze kwoono, mi ziru Yooba tizzo sua. 10 Mi sombe zin iwal biibi tire miiri tieene biibi tana isu ma ipakaala beeze kwoono, tona tileklek kumbun mi tikamam suŋŋana irao beeze kizin kizin. 11 Mi Yooba ziru Mose tiparre zin mi tizzo sua kembei ta tomtom ru tiparzzo sua pizin i. Mi sombe tiso sua ma imap, na Mose iyooto ma ila pa muriini mini. Tamen silou kini Yosua, ta ki Nun i, ni izemzem beeze tana som. Ni mataana pa ma imbotmbot.

12 Aigule ta na, Mose isu to iso pa Yooba. Iso: “Re. Nu sombe nio aŋkam zin wal tiŋgi ma niamŋan amla pa toono kizin. Tamen asiŋ tau uri be igaaba yo? Ina nu paute yo pini zen. Mi nu sombe kulim irou yo mi lelem be kampe yo. 13 Sombe lelem be kampe yo kat, na so yo pa zaala ku be aŋto. Naso aŋute katu, mi kampeŋana ku imbotmbot se tio totomen. O Yooba, motom iŋgal zin Israel. Pa zin wal ku tau.”

14 Yooba ipekel kwoono ma isombe: “Kopom ru pepe. Lelem ambai. Pa nio ituŋ ko aŋgaabu mi ituru tala.” 15 Mose ileŋ to iso pini. Iso: “Ambai kat. Pa itum sombe gaaba yam som, na leleyam be kam yam ma amzem lele taiŋgi pepe. Ko ambotmbot men ta taiŋgi. 16 Pa sombe itum gaaba yam mi itiŋan tala som, nako amwe raraate kembei tau wal boozomen ta timbotmbot toono i. Mi sombe nu itiŋan, inako zin karkari tiute kat ta kembei: Niam ampa ndel pizin. Paso nu lelem piam, mi kam yam ma amwe lem kek, mi kampeŋana ku imbotmbot se tiam.”

17 Tabe Yooba iso pa Mose. Iso: “Ambai. Koroŋ ta so pa na, nio ko aŋkam. Pa nio kuliŋ irou u, mi leleŋ be aŋkampe u.” 18 Mose ileŋ sua tana, to keteene ise mi iso: “O Yooba, kena swe kat itum pio.”✡ Yo 1:14,18; Kol 1:15; Ibr 1:3

19 Mi Yooba ipekel ma iso: “Nio ko aŋswe kampeŋana tio isu kerem uunu, mi aŋsoyaara zoŋ Yooba mi mbulu tio ila motom. Nio, sombe leleŋ be aŋkampe tomtom sa, na aŋkampe i. Mi sombe leleŋ isaana pa tomtom sa mi leleŋ be aŋmuŋai i, na aŋmuŋai i.✡ Ro 9:15 20 Tamen nu ko irao be re kat motoŋ na som. Pa tomtom sa isombe ire kat yo, inako irre yo mi imeete pataaŋa.✡ Un 32:31 21 Tana leŋ. Mar kolouŋana ma mender sala pat ti. 22 Mi sombe aŋmar kolouŋana mi aŋswe ituŋ ramaki azuŋka tio, nako aŋzeebu lela pat ti kopoono, mi aŋpakaalu pa nomoŋ ma irao aŋkonzaalu ma aŋlae. 23 Tona aŋtatke nomoŋ, mi re ndemeŋ. Mi motoŋ na, tomtom sa irao ire na som.”