11
Ebhe atima opolofeta bhisi
1 Pɨpɨta-a, u aha mbamba mʉma bini. A adʉ maka ndula u apipima ’he ne e-o. U atsia apa mʉma me: «Nʉ pima ’ngbé ’tɨ Ebhe di ne misa natsulu enʉ pɨ Ebhe-o. Mʉ tsia ko di alo gba okpála ɨnde ngadhɵgɵ Ebhe bhʉ́ ’ngbé ’tɨ gba anɨ-o. 2 Engʉ́ bini, ꞌo mbadhasʉ na ’ngbé ’tɨ Ebhe-e lɨ ngongo. Mo opíma de, anga Ebhe apʉ nanɨ bhobhomʉ-o pɨ okpála ɨnde ne omaYuda ade-o. U adédele gʉdhʉ na bubu gba Ebhe-e ngʉbula epe ndjɨkpa badha ne ká bhisi. 3 Ma atíma obhʉlʉ nakpo ’ngʉ́ gba ma bhisi-e me u nde adyɨ bongo na talia. Ma atíma uo ngʉ́ nakpokpo engʉ́ gba Ebhe. U akpókpo ’ngʉ́ ango-o ngʉbula ekpɨ́ kɵtɵ bini, kámá bhisi ne ndjɨkpa madhɨa.»
4 Obhʉlʉ nakpokpo ’ngʉ́ bhisi bhomʉ-o, a ko ondula na olive bhisi di ne otala bhisi ɨnde ngalʉ kala Ngámá na doto-o. 5 Lɨ kpála le namene uo sisiti-e, djua kóto bhʉ́ ’bhɵ uo, ɨ tsia bhíli obhʉlʉ yala gba uo-o. A bhomʉ-o lele maka u abhɵ́lɵ bhʉlʉ yala gba o lɨe-o. 6 A bhʉ́ uo ne angu nagbite kokpɨ́ ngʉbula me ebha adhɨ́-ɨ de, nakolo lɨ ’kpɨ́ ɨnde u andjía nakpokpo engʉ́ gba Ebhe-e lɨe-o. A di bhʉ́ uo ne angu nadji engu me akolo ngʉte. A bhʉ́ uo ne angu natʉ pɵdjɵ pɨ́ doto me ndʉ olɨkabhu ngangá mene doto lɨ ndʉ nedhɨnga hana ɨnde u akʉnda lɨe.
7 Nedhɨnga u andjía nakpokpo ’ngʉ́ lɨ Ebhe atima uo ne e lɨe, enʉ ɨnde adʉ bhʉ́ tsu ’dú-o há ’gʉ́ ne uo. Anɨ há angu uo, anɨ tsia bhíli uo. 8 Kuo uo atígala lɨ ’ngbé ’hi kpadjɨ na ’ngbé gʉdhʉ ɨnde u agɨ nanɨ Ngámá gba uo lɨe lɨ kulusi-o. U agisila lɨ gʉdhʉ ango-o ꞌɨlɨ. U agisila lɨlɨ me Sodomo, ɨ dʉ di-e Edjipeto. 9 U zɨ́ba de me okpála zɨ kuo uo-o de. Okpála na ndʉ bɨlɨ hana, ne ndʉ opiga hana, ne ndʉ okongʉ́ hana adʉ́ ago natsia okuo uo ngʉ́ okpɨ́ bata ne ndundu. 10 Okpála na doto akpí djalɨ lɨ nakpi ka uo-o. U améne anokomɨa na djalɨ, u tsia dʉ́ apʉ ’he sʉnda o. U améne mo-o anga opolofeta bhisi bhomʉ-o amene uo kpékpéke naali.
11 Engʉ́ bini, pɨta ekpɨ́ bata ne ndundu bhomʉ-o, ewo bini na mʉkobho ayie agba Ebhe alɨ bhʉ́ uo, u atsia ayie bhʉ́lá. Abhomʉ-o, ’ngbé tsʉlʉ na ngbéngbé atɨ pɨ́ okpála bhende adʉ natsia uo-o. 12 Opolofeta bhisi bhomʉ-o atsia adje eli na kpékpéke ɨnde ayie abhʉ́lá. Eli ango-o apa pɨ uo me: «Yi ꞌʉ ei!» U atsia aꞌʉꞌʉ abhʉ́lá bhʉ́ ndindi me obhʉlʉ yala gba uo nde ngatsia uo. 13 Bha bhʉ́ nedhɨnga bhomʉ-o, kpéke adjigidjo adyɨkɨ bɨlɨ, té gʉdhʉ-o atuko. Ɨ dʉ me u nde agbo bhʉsʉ gʉdhʉ-o ne ndundundu ndjɨkpa-a, akʉnda napa me adjigidjo bhomʉ-o adyɨkɨ bini bhʉ́ káká. Abhomʉ-o, okpála kɵtɵ mananɨka amu ka adjigidjo ango-o. Obhe atigala-a, tsʉlʉ abedhe uo bedhe. U atsia adhɵgɵ Ebhe ɨnde abhʉ́lá-o.
14 Lɨkabhu bhe na bhisi-e akodho ’kpɨ́ akodho. ꞌE-e! Bhe na bata agó mbɨa ɨnde?
Andjelu na mananɨka-a aꞌu totɨ gba e-o
15 Abhomʉ-o, andjelu na mananɨka-a aꞌu totɨ gba e-o. Oandjelu atsia asʉla abhʉ́lá kpekpeke me:
«Naʉ na doto ɨbili sakpa ngámá gba ya,
ne Masɨya gba e-o.
Ngámá gba ya-a aʉ́ dʉdʉma ne dʉdʉma!»
16 Obhelesɨ okpála ndjɨkpa bhisi ne ká badha ɨnde adʉlʉ pɨ́ odabɨlɨ na ngámá gba o kala Ebhe-e atʉtʉ bhʉ́la o ne kuto. U atsia adhɵgɵ Ebhe, 17 u apa me:
«Ebhe Ngámá Apɨ́ ’Kpɨ́, ngamʉ kpála ɨnde ʉʉ,
ɨnde adʉ di nanɨ ʉʉ,
ya ngatoko mʉ,
anga mo opana angu gba mʉ,
ndʉ ’ngʉ́ hana agie lɨe sakpa mʉ.
Mo otsia aʉ ngámá pépé.
18 Opiga na doto azɨ nanɨ mbʉtʉ lɨ mʉ naali,
la mbɨa ɨnde-e,
ke ’ngʉ́ gba mʉ-o ago pɨ́ uo ago.
Nedhɨnga nakodho ’ngʉ́ gba okpála ɨnde amu-o akolo.
A ko nedhɨnga ɨnde mo ogíe bádha ’ngʉ́ lɨe
pɨ obalise gba mʉ opolofeta
di ne ndʉ okpála gba mʉ-o hana,
ɨnde di ngamanga mʉ,
ongbengbengbe ne odjedjedje-o.
A ko nedhɨnga ngʉ́ nabhili obhe ngabhɵlɵ doto-o.»
19 Abhomʉ-o, ’ngbé ’tɨ Ebhe ɨnde abhʉ́lá-a abhulu lɨe, u atsia au sanduku na gandja-o.* 11:19 Sanduku na gandja: A ko sanduku ɨnde u abu nanɨ opapala teme ɨnde u aye olɨ́lɨ ndjɨkpa gba Ebhe-e bhʉ́ e-o. Ekpɨ́ andjengene, mʉgbálá asʉla, adjigidjo di ne ɨtɨmelɨ na kpekpeke adhika.
*11:19 11:19 Sanduku na gandja: A ko sanduku ɨnde u abu nanɨ opapala teme ɨnde u aye olɨ́lɨ ndjɨkpa gba Ebhe-e bhʉ́ e-o.