ZEKHARIAH
(The Book of Zechariah)
Zekhariah Cabu Kawng
Tonghma Zekhariah lohng he Babylon lamkah aka mael Judah rhoek taengah Pathen ol a thui. A thawnpuei Haggai bangla a pilnam te Pathen uepnah neh bawkim koep thoh ham a thui pah. Zekhariah amah hmai kah Israel tonghma rhoek bangla Judah rhoek kah thothueng a dueng neh, mawtkung rhoek kah langyanah om ham te a thui. Pilnam thaphohnah hamla Zekhariah loh Boeipa lamkah mangthui parhet a hmuh. Pathen kah lungnah a cak sak tih, Jerusalem neh pilnam te a tungaep. Israel kah thangpomnah neh thadueng lamhmai te koep a thoelh. Zerubbabel te Judah khoboei la om vetih Joshua te khosoih la om ni. Cabu pabae dongah tah hmailong thunkha dantatnah khaw, pilnam a hlawt vetih koep a culuinah kawng, Israel boeilu a thaphohnah kawng, Jerusalem te Boeipa kuepkolnah hmuen la a omnah kawng a thui.
Sawt Yoeihnah
I. Yutnah ham khuenah 1.1-6
II. Hmailong kah Messiah ram painah1.7—8.23
A. Mangthui Parhet rhoek 1.7—6.8
1. Cuihla ding kah hlang 1.7-17
2. Kii pali neh kutthai 1.18-21
3. Mikrhael rhui neh hlang 2.1-13
4. Khosoih puei ciimnah 3.1-10
5. Hmaitung neh cayol 4.1-14
6. Cayol aka ding5.1-4
7. Huta neh cangnoek 5.5-11
8. Leng pali 6.1-8
B. Khosoih ham kah rhuisam miknoek 6.9-15
C. Khotue oldawt hlatnah 7.1—8.23
1. Dawtnah neh Pathen kah hlatnah 7.1-14
2. Hmailong kah Jerusalem a thohnah8.1-5
3. Palestine La maelnah 8.6-8
4. Khohmuen neh pilnam kah khobuhnah 8.9-23
III. Hnophueih neh messiah ram 9.1—14.21
A. Hnophuei a pacuek. 9.1—11.17
1. Tarhoeknah 9.1—10.12
2. Hnawtnah11.1-17
B. Hnophueih pabae. 12.1—14.21
1. Hlawtnah neh Israel namtu 12.1—13.9
2. Messiah manghai thangpomnah 14.1-21
1
Yutnah hamla Khuenah
1 Ezra 4.24—5.1; 6.14Darius kah a kum bae, a hla rhet vaengah, Iddo koca Berekiah capa tonghma Zekhariah taengah BOEIPA ol cet tih, 2 “BOEIPA he a thintoek tih na pa rhoek taengah thinhulnah om. 3 Te dongah amih te thui pah. Caempuei BOEIPA loh he ni a thui. He tah caempuei BOEIPA kah olphong ni. Caempuei BOEIPA loh, ‘Kai taengla ha mael uh lamtah nangmih taengla ka mael ni,’ a ti. 4 Na pa rhoek bangla om uh boeh. Amih te tonghma lamhma rhoek loh a khue uh tih, ‘Caempuei BOEIPA loh he ni a thui na longpuei thae lamloh mael uh laeh. Na khoboe neh na khoboe thae rhoe mah,’ a ti. Tedae hnatun uh pawt tih kai taengah a hnatung uh moenih. He tah BOEIPA kah olphong ni. 5 Na pa rhoek te melae? Tonghma rhoek khaw kumhal ah hing uh nim? 6 Ka ol neh ka oltlueh he ka sal tonghma rhoek ka uen dae ta. Na pa rhoek loh kae uh pawt tih nim a mael uh? Te vaengah, ‘Mamih kah longpuei bangla mamih taengah saii ham neh mamih kah khoboe bangla caempuei BOEIPA loh a mangtaeng tih mamih taengah a saii tangloeng coeng,’ a ti uh,” a ti nah.
Hlaem kah Mangthui
7 Darius kah a kum bae nah, hla hlai khat, Shebat hla hnin kul hnin li vaengah, BOEIPA ol te Iddo koca Berekiah capa tonghma Zekhariah taengla cet tih a thui.
Marhang Hlang
8 Olp 6.4; Olp 6.2“Khoyin kah ka hmuh dongah hlang te marhang ling dongah tarha ana ngol. Anih te cuihal ding kah a cok ah pai. A hnukkah marhang rhoek tah a ling, a pol neh a bok om. 9 Te vaengah, ‘Ka boeipa balae he?’ ” ka ti nah.
Te vaengah kai taengah aka cal puencawn loh kai taengah, “Amih rhoek balae ti khaw kamah loh nang kan tueng eh,” a ti.
10 Te phoeiah cuihal ding kah aka pai hlang loh a doo tih, “He rhoek he diklai ah pongpa hamla BOEIPA loh a tueih coeng,” a ti. 11 Te vaengah cuihal ding kah aka pai BOEIPA puencawn te a doo uh tih, “Diklai ah ka pongpa uh coeng dae diklai pum kah khosa khaw mong ngawn ke,” a ti uh.
12 Te dongah BOEIPA kah puencawn loh a doo tih, “Caempuei BOEIPA aw, Jerusalem neh Judah khopuei rhoek te me hil nim na haidam pawt ve? Te te kum sawmrhih kosi na hong thil coeng,” a ti nah.
13 Te dongah BOEIPA loh kai taengah aka cal puencawn te hloephoelhnah ol then ol neh a doo.
14 Te phoeiah kai taengah aka cal puencawn loh kai taengah, “Khue lamtah, ‘Caempuei BOEIPA loh he ni a thui. Jerusalem ham ka thatlai tih Zion ham khaw thatlainah len. 15 Tedae kai he namtom hlang aka lawn taengah thinhul bat la ka thintoek. Ka thintoek khaw yol dae amih loh boethae te a koei uh.
16 Te dongah BOEIPA loh he ni a thui. Jerusalem la haidamnah neh ka mael ni. A khuiah ka im a sak ni. He tah caempuei BOEIPA kah olphong ni. Jerusalem te rhilam rhui ka toe ni,’ ti nah.
17 “Koep pang lamtah, ‘Caempuei BOEIPA loh he ni a thui. Ka khopuei rhoek ah hnothen neh baesawt pueng ni. BOEIPA loh Zion te koep a hloep vetih Jerusalem te koep a coelh ni,’ ti nah,” a ti nah.
Ki Pali neh Kutthai
18 Te phoeiah ka mik te ka huel tih ka sawt hatah ki pali lawt ka hmuh. 19 Te dongah kai taengah aka cal puencawn te,
“Balae he?” ka ti nah.
Tedae kai taengah, “He ki rhoek loh Judah, Israel neh Jerusalem a thaek,” a ti.
20 Te phoeiah BOEIPA loh kai te kutthai pali n'tueng. 21 Te vaengah,
“Amih aka lo long he balae a saii eh?” ka ti nah.
Te dongah, “He rhoek kah ki loh Judah te a thaek uh tih hlang ol bangla a lu khaw dangrhoek thai pawh. Tedae Judah khohmuen aka tlai thil tih aka thaek ki, namtom kah ki te omtoem ham neh amih te lakueng sak hamla ha pai uh,” a ti.