Xailongga li ila rangua Yuda hatuminga haringinamdi. Tauxu xailongga li ba,
Hibru
Namua Dibung Mala Na Hibrudi
Lipu buningama bing Yuda tela hatum haringina mana Yesu. Bung mala na Yudadi dahatum haringina mana Yesu. Ne daxap salaga rangua Yesu bixuandi, binabu dibo ba digoxoya mala mana kuboluding muganga mana disabu mana Urana. Binabu mana xailongina, lipu buningama hatanga ba Yesu dali Yudadi hatumingading longgalo, hanaunaungadinga, kuboludinga, haruanga longgalo dahau ba, kuboluding disabu mana Urana manadi. Baing ina naga, yanoa sabanga. Bila balau hatanga ba haruanga longgalo Urana harua mana Lipuxing Mogunganama, ungguti mana Unggutinga Xailongina (Stat) ila sup mana Malakai, Urana Xuang Muganga longgalo daharua mana Yesu. Binabu bo ba dahatum haringina mana Yesu ing ganina, ne Moses kimbo Urana uleginamdi kimbo lipu tela, tegu. Bila balau lipu buningama hatanga ba Yesu lipu aningoxam mana Urana xaung kira, yanoa sabanga sibuna, dali Aron yanoa xaung dali Yudadi lipuxiding hananiangam longgalo. Bung xailonginoa bila niani AD 68.
Lipu Buningama
Lipua bung xailongga li bung yanoa te. Bila niani AD 200 lipu tela yanoa Tertulian bung xailong tela, saing baxanga ba Banabas bung xailongga li. Ning lipu teladi daharua ba Apolos bung. Ne lipu xabiangam longgalo daharua ba lipu buningama bung Urana murunganoa.
Haruanga Tuandi
• Haruanga mugamugangam: Lipua hau Urana haruangang haunua bing Yesu, yanoa sabanga sibuna (1:1-4)
• Yesu Kristo yanoa sabanga sibuna, dali Yudadi mugangading longgalo (1:5–7:20)
• Yesu Kristo lipu hananiangam sabanga sibuna, oxatanoa dali ding longgalo (Hataina 8–10)
• Haruanga harua mana tahatum haringina xaung tali haringina (Hataina 11–12)
• Haruanga kimuam (Hataina 13)
1
Urana Garanoa Yanoa Sabanga Sibuna
1 Waleu sibuna, mana bunging xumana xaung mana daxanga xangxana Urana harua na mugangaradi lipuxing suxunguxunguamdi haruangadingia. 2 Ne hatata mana xaidap subingandi harua nakira Garanoa haruangania, lipua tongtongia axamandi rimania ba, lipua mogu ba xap xalinging longgalo. 3 Garanoa hatanga sibuna Urana ralanoa, saing maxang taining sibuna bila Urana. Libu axamang longgalo duwauyu mana haruangang haringina. Kimuya mana tongtongia daxanga kubolu diang damianganama, rung mari Toxoratamona Haringing Sibuna rimang rimamo rubinia long xaiya. 4 Binabu dali Urana uleginamdi sibuna, namua na yaya xap ba dali yadingdi sibuna.
5 Namua naga Urana harua na Garanoa ba,
“Ung Garagua,
hatata ngasok Tibum.”✡ Olaidi (Buk Song) 2:7
Saing haruanga tela harua mana ba bing:
“Bagula ngawa Tibuna,
saing bagula wa Garagua.”✡ 2 Samwel (2 Samuel) 7:14; 1 Naxuyanga (1 Stori) 17:13
Uleginam baruamta harua bila ba na? Tegu. 6 Xauna, bungina soxi Garang Matuaua mari titia li, harua ba,
“Bing Urana uleginam longgalo disabu mana.”* Haruanga baguli sok mana Hanaunaunga (Lo) 32:43
7 Mana uleginamdi, harua bila li:
“Libu uleginamdi ba duwa bila yanga,
libu lipuxing oxatanamgadi ba duwa bila yap manandi.”✡ Olaidi (Buk Song) 104:4
8 Ning mana Garanoa harua ba,
“O Urana, bagula uwa etuaʼm kabukabum xaitamoxiama bungingbunginalo,
saing bagula uwasa mana Yonggaxima kubolu maringinia.
9 Murum sibuna mana kubolu maringina saing hauxam sibuna mana kubolu diana,
binabu nga Urana ungia ba, ngamatu guxenga yahangama mari maung.
Mana kubolua li ngahatanga ba udali riamdi.”✡ Olaidi (Buk Song) 45:6-7
10 Xauna Urana harua na Garanoa ba,
“O Toxoratamona, mugamugau sibuna utongtongia titi wanggundi,
saing sabalunoa sok rimamia.
11 Bagula disup, ne bagula uwauyu,
bagula didoa bila imang muganga.
12 Bagula ulukidi bila imang maxaxaya,
bagula uhaxuyadi bila lipu tela sau imang hauna.
Ning ung ba uxugia te,
saing subingam te.”✡ Olaidi (Buk Song) 102:25-27
13 Xauna, harua bila li na uleginam tela te bungina harua na Garanoa ba,
“Urung kabukabu yayam wa rimagu rimamo rubinia,
laing ngata bixuamdi
hawa maung.”✡ Olaidi (Buk Song) 110:1
14 Binabu Urana uleginamdi duwa mana baru namuxinta? Duwa aningoningodi dituxu oxatanoa. Urana soxidi bu dahauli lipuadi bagula xapdi muli.