11
UYeesu akʉposheelwa mu Yelusaleemu ku khaluluuto
(Mataayi 21:1-11; Luuka 19:28-40; Yookhani 12:12-19)
1 We bhapalamɨla ku Yelusaleemu, bhakhafikha papɨɨpɨ na khakhaaya akha Betisifaage na kha Besaniya, mwɨ gamba ɨlya Mizeituni, uYeesu akhabhasonteelezya abhalandati bhaakwe bhabhɨlɨ. 2 Akhabhabhʉʉzya akhatɨ, “Bhalaji mʉ khakhaaya ɨkho khe khalɨ pɨlongolela yiinyu. We mwafikha mʉ khakhaaya muula, nalʉbhɨlo bhʉʉlo mʉtɨyaaje ɨnyaana yi ndogomi nkʉnjɨɨle, ye umuntu atapandile naalumo. Mʉyɨsatʉle na kʉyɨleeta ɨpa. 3 Ɨnga umuntu wowonti akʉbhabhʉzɨɨlɨzya akʉtɨ, ‘Khooni khe mʉkʉbhomba shɨnɨɨsho?’ mʉkhatɨnjɨ, ‘ɄMwene akʉyanza, atɨyɨgalʉsye winza panaapa shiniishi bhʉʉlo.’* 11:3 Bhaazya Zakaliya 9:9.”
4 We bhasogola bhaabhala kuula, bhakhayɨlola ɨnyaana yi ndogomi nkʉnjɨɨle panzɨ pa mʉlyango mwɨ dala ɨpɨtɨ, bhakhayɨsatʉla. 5 Abhantʉ bhamu bhe bhɨ́mɨlɨɨye pʉʉpo bhakhabhabhʉzɨɨlɨzya bhakhatɨ, “Mʉkʉbhomba lyoni ɨpo, mʉkʉyɨsatʉla yaashi ɨnyaana yi ndogomi ɨyo?” 6 Abhalandati bhaala bhakhabhaamʉla shishiila she uYeesu ábhabhuziizye kʉtɨ bhakhalongaje. Pe bhakhabhalekha bhasogole ni ndogomi yiila. 7 Bhakhɨnza nɨ nyaana yi ndogomi yiila kwa Yeesu. Bhakhaala amenda gaabho pamwanya pa ndogomi yiila, uYeesu akhazʉbha, akhɨɨkhala pamwanya.† 11:7 UYeesu akhazʉbha, akhɨɨkhala pamwanya Abhamwene bhakhapandaga pa ndogomi mʉ khabhalɨlo akha wutengaanu, bhakhapandaga ifalaasi mʉ khabhalɨlo akha wʉlʉgʉ. UYeesu kʉpanda mu ndogomi we akwinjila mu Yelusaleemu, akhalolesyaga kʉtɨ ʉweene akwɨnza ku wutengaanu ngatɨ wʉ mwene umutonsu. 8 Abhantʉ abhinji bhakhaalaga amenda gaabho mwɨ dala, bhamu bhakhatemaga amazanzala aga makwi mu vwizi, bhakhaalaga mwɨ dala. 9 Abhantʉ bhe bhálongoleeye kwɨlongolela yaakwe na bhaala bhe bhakhalandataga kʉlʉsalo bhakhadandɨzya kʉkhoolela bhakhatɨnjɨ,
“Apalwaje ʉMʉlʉngʉ!‡ 11:9 Apalwaje ʉMʉlʉngʉ Mʉ ndongo ɨya Bhayahuudi bhakʉtɨ Hosaana kwe kʉtɨ tʉtʉʉle.
Asayiilwe we akwɨnza
kwɨ taawa lya Mwene ʉMʉlʉngʉ!§ 11:9 Bhaazya Zabuuli 118:26.
10 Wʉsayaje ʉwʉmwene wa yise wɨɨtʉ uDaudi we wʉkwɨnza!
Mʉpaalaje ʉMʉlʉngʉ ʉwa kʉmwanya.”
11 Pe uYeesu akhinjila mʉ nhaaya ɨya mu Yelusaleemu, akhashɨzanya kʉbhala ku Nyumba iMfinjile.* 11:11 INyumba iMfinjile Bhaazya mu Wilulanyo ʉwa mazwi amajeni. Akhavwenya ivintu vwonti vwe vwámɨle mukaasi muula. Ɨleelo pe kʉkhabha kwafikha shalyabheela, akhasogola, akhabhala ku Besaniya peeka na bhalandati bhaakwe ishumi na bhabhɨlɨ.
UYeesu akuliguna ikwi ɨlya mutiini
(Mataayi 21:18-19)
12 Ɨndaabhɨ yaakwe we bhakʉsogola ku Besaniya, ɨnzala yikhamuluma uYeesu. 13 She alɨ ukutali bhʉʉlo, akhalɨlola ikwi ɨlya mutiini,† 11:13 Ikwi ɨlya mutiini likholiine ni kwi ɨlya mandongomilo kʉ Malɨla. lye lyámɨle na matʉndʉ aminji. Akhabhala kwenya she lɨlɨ na matunda ge geleeye mʉmwo. We aafikha pʉʉpo, akhaaga lɨtalɨ nago khaala, lyoli lijejile ga matʉndʉ meene, kʉnongwa ye akhabhalɨlo akha kwela kháshɨɨlɨ kufikha. 14 Pe akhalɨbhʉʉzya ikwi liila akhatɨ, “Kufuma ʉmʉsanyʉʉnʉ paka wiila na wiila, nʉʉmo umuntu atakhaalye amatunda kʉkwakho.”‡ 11:14 Nʉʉmo umuntu atakhaalye amatunda kʉkwakho UYeesu we akhaligunaga ikwi ɨlya mutiini, akhalangaga uwukuwi ʉwa kʉtɨ, ʉMʉlʉngʉ akhayɨbhalonga aBhayahuudi kʉnongwa ye bhatalɨ na matunda agɨ njendo inyinza. Abhalandati bhaakwe bhakhagɨmvwa amazwi ɨgo ge uYeesu akhalonga.
UYeesu akʉbhabhɨnga bhe bhakhakazyaga mu Nyumba iMfinjile
(Mataayi 21:12-17; Luuka 19:45-48; Yookhani 2:13-22)
15 Bhakhaduuga winza ku Yelusaleemu, pe uYeesu akhinjila mwi linga ilyi Nyumba iMfinjile. We ayinjila, akhabhabhɨnjɨla kunzi bhe bhakhakazyaga na kʉkala ivintu mwi linga ilyi Nyumba iMfinjile. Akhabenulanya ivintalati ɨvwa bhe bhakhavunzanyaaga ɨnhela,§ 11:15 Bhakhavunzanyaaga ɨnhela Yáamɨle mwata ya bhantʉ abhɨ nsɨ nɨ nsɨ kuvunzanya ɨnhela ɨya Bhaluumi ɨnga bhayaaje ɨnhela ɨya Bhayahuudi. Ɨnhela yɨnɨɨyo ye yɨkhanzɨwaaga kufumwa ɨnsonho iyi Nyumba iMfinjile, kʉnongwa ye yɨtakhɨtɨshɨlwaga kufumwa ɨnsonho mu Nyumba iMfinjile ɨnhela ye yáamɨle ni shifwani ɨsha Bhaluumi awe abhalongozi abhanjɨ bhe te Bhayahuudi. akhabenulanya na matengo aga bhe bhakhakazyaga ɨnkʉnda. 16 Khabhɨlɨ atakhamʉlekha umuntu nʉʉmo we apimbile akhantʉ khokhonti akha kʉkazya kʉshɨzya mwi linga ilyi Nyumba iMfinjile.
17 UYeesu mʉ manyɨzyo zyakwe akhalongaga akhatɨnjɨ, “Bhʉlɨ, yitasimbiilwe mu Wusimbe uWufinjile kʉtɨ, ‘Inyumba yaanɨ yɨtɨbhe nyumba ya kupuutila kʉ bhantʉ abhɨ nsɨ zyonti’?* 11:17 Bhaazya Yeesaya 56:7. Ɨleelo ɨmwe muyigalulanyiinye kʉbha ngwenya ya bhabuda!”† 11:17 Bhaazya Yelemiya 7:11. 18 Abhapɨtɨ abha bhapuutili na bhamanyizyi abhɨ ndajɨzyo, we bhɨmvwa zɨnɨɨzyo zye uYeesu akhalonga, bhakhanda kwanza ɨdala ɨlya kʉmʉgoga. Ɨleelo bhakhamwogopaga, kʉnongwa ye abhantʉ bhonti bhakhaswigaga nu winza wɨ manyɨzyo zyakwe. 19 We kwabha shalyabheela, uYeesu na bhalandati bhaakwe bhakhasogola mʉ nhaaya yiila.
Ɨmanyɨzyo ku zyi kwi lye lyumile
(Mataayi 21:20-22)
20 We bhakʉgalʉkha ɨshɨlaabhɨla kʉbhala winza ku Yelusaleemu, bhakhalola ikwi liila ɨlya mutiini lyumile lyonti kwandɨla ku mazi gaakwe. 21 UPeeteli akhakʉmbʉkha izwi lye uYeesu aalonjile, akhamʉbhʉʉzya akhatɨ, “Mumanyizyi, ana lyali kwi ɨlya mutiini lye waaligunile lyumile lyonti!”
22 UYeesu akhabhaamʉla akhatɨ, “Mʉbhe nʉ lwɨtɨkho ʉlwa kʉmʉsʉʉbhɨla ʉMʉlʉngʉ. 23 Nalyoli ɨnkʉbhabhʉʉzya kʉtɨ, umuntu wowonti we alɨbhʉʉzya ɨgamba ili atɨ, ‘Kumpukha ʉsʉmbwe mwa sʉmbɨ,’ lɨnɨɨlyo lɨtɨbhombeshe shɨnɨɨsho ɨnga mʉ mwoyo waakwe mʉlɨ sita kusingaana, lyoli akʉsʉʉbhɨla bhʉʉlo kʉtɨ, lyolyonti lye akʉlɨlonga lɨkʉbhombekha. 24 Ishi leelo ɨnkʉbhabhʉʉzya ɨnkʉtɨ, lyolyonti lye mʉkʉlɨlaabha mu mpuuto, mʉbhanje nʉ lwɨtɨkho ʉlwa kʉsʉʉbhɨla kʉtɨ mʉkʉlɨposheela, ɨpo pe mʉkhayɨposheela nalyoli. 25 Nɨɨmwe we mʉkwɨmɨɨlɨla kupuuta, mʉmʉtʉyɨlaje umuntu wowonti ʉla we abhabhombeeye imbiibhi zimo. Kʉkhonzya shɨnɨɨsho kwe kʉkʉmʉbhɨɨkha uYise wiinyu ʉwa kʉmwanya woope abhatʉyɨlaje imbiibhi zyinyu.” [ 26 Ɨleelo ɨmwe ɨnga mʉtakʉbhatʉʉyɨla abhamwinyu, woope uYise wiinyu ʉwa kʉmwanya te akhabhatʉʉyɨle imbiibhi zyinyu.]‡ 11:26 Umusitaali uwu wʉtalɨɨpo mu wusimbe wumo ʉwɨ maandɨ ʉwa Shiyunaani.
Ɨbhʉzɨɨlɨzyo kʉ zya waamʉlo wa Yeesu
(Mataayi 21:23-27; Luuka 20:1-8)
27 Pe bhakhafikha winza ku Yelusaleemu. UYeesu we akʉjenda mwi linga ilyi Nyumba iMfinjile, abhapɨtɨ abha bhapuutili, abhamanyizyi abhɨ ndajɨzyo na bhasongo bhakhamʉbhalɨla. 28 Bhakhamʉbhʉzɨɨlɨzya bhakhatɨ, “Ganaaga ge ʉkʉbhomba, ʉkʉbhomba kʉ waamʉlo wooni? Wu naanu we akupiiye ʉwaamʉlo wunuuwu?”
29 UYeesu akhabhabhʉʉzya akhatɨ, “Nɨɨne ɨntɨbhabhʉzɨɨlɨzye izwi lyeka. Ɨnga mwanaamʉla, pe nɨɨne ɨntɨbhabhʉʉzye kʉtɨ ɨnkʉbhomba ganaaga kʉ waamʉlo wa naanu. 30 Bhʉlɨ, ʉwaamʉlo wa Yookhani ʉwa kwozya abhantʉ, twenyi mʉmbʉʉzye, wáfumile kwoshi? Wáfumile kʉmwanya awe kʉ bhantʉ?”
31 Pe bhakhazaabhana bhɨɨbho na bhɨɨbho bhakhatɨ, “Ɨnga twamwamʉla kʉtɨ lwáfumile kʉmwanya, atɨtʉbhʉzɨɨlɨzye kʉtɨ, ‘Khooni khe mʉtakhamwɨtɨkhaga?’ 32 Ɨleelo kʉlonga kʉtɨ lwáfumile kʉ bhantʉ, tʉtangasheela.” Bhakhogopaga abhantʉ, kʉnongwa ye abhantʉ bhonti bhámwitishile uYookhani kʉtɨ áamɨle mukuwi we ʉMʉlʉngʉ ámusonteleziizye. 33 Bhakhamwamʉla bhakhatɨ, “Tutamanyile.” Woope uYeesu akhabhabhʉʉzya akhatɨ, “Nɨɨne ɨntakʉbhabhʉʉzya kʉtɨ ɨnkʉbhomba ziniizi kʉ waamʉlo wa naanu.”
*11:3 11:3 Bhaazya Zakaliya 9:9.
†11:7 11:7 UYeesu akhazʉbha, akhɨɨkhala pamwanya Abhamwene bhakhapandaga pa ndogomi mʉ khabhalɨlo akha wutengaanu, bhakhapandaga ifalaasi mʉ khabhalɨlo akha wʉlʉgʉ. UYeesu kʉpanda mu ndogomi we akwinjila mu Yelusaleemu, akhalolesyaga kʉtɨ ʉweene akwɨnza ku wutengaanu ngatɨ wʉ mwene umutonsu.
‡11:9 11:9 Apalwaje ʉMʉlʉngʉ Mʉ ndongo ɨya Bhayahuudi bhakʉtɨ Hosaana kwe kʉtɨ tʉtʉʉle.
§11:9 11:9 Bhaazya Zabuuli 118:26.
*11:11 11:11 INyumba iMfinjile Bhaazya mu Wilulanyo ʉwa mazwi amajeni.
†11:13 11:13 Ikwi ɨlya mutiini likholiine ni kwi ɨlya mandongomilo kʉ Malɨla.
‡11:14 11:14 Nʉʉmo umuntu atakhaalye amatunda kʉkwakho UYeesu we akhaligunaga ikwi ɨlya mutiini, akhalangaga uwukuwi ʉwa kʉtɨ, ʉMʉlʉngʉ akhayɨbhalonga aBhayahuudi kʉnongwa ye bhatalɨ na matunda agɨ njendo inyinza.
§11:15 11:15 Bhakhavunzanyaaga ɨnhela Yáamɨle mwata ya bhantʉ abhɨ nsɨ nɨ nsɨ kuvunzanya ɨnhela ɨya Bhaluumi ɨnga bhayaaje ɨnhela ɨya Bhayahuudi. Ɨnhela yɨnɨɨyo ye yɨkhanzɨwaaga kufumwa ɨnsonho iyi Nyumba iMfinjile, kʉnongwa ye yɨtakhɨtɨshɨlwaga kufumwa ɨnsonho mu Nyumba iMfinjile ɨnhela ye yáamɨle ni shifwani ɨsha Bhaluumi awe abhalongozi abhanjɨ bhe te Bhayahuudi.
*11:17 11:17 Bhaazya Yeesaya 56:7.
†11:17 11:17 Bhaazya Yelemiya 7:11.
‡11:26 11:26 Umusitaali uwu wʉtalɨɨpo mu wusimbe wumo ʉwɨ maandɨ ʉwa Shiyunaani.