1 Ngim inggew cha man-asawan Ananias kan Safira un langilaku si pitacha. 2 Lantuɏagenchaʼn itaɏucha uchum un ngilan chi pitacha ot illiyoy Ananias cha uchum un ngilala ot impeɏangla kan cha apostoles un kalala, “Allaya ngilan chi pitami.”

3 Ot kalan Peter, “Ananias, puggey ipalubus un mangkawachi si Satalas si somsomoklu ya mantuntulli si Ispiritun Apudyus si langitaɏuwanyu si uchum un ngilan chi pitayu 4 Sakbyey un illakuyu pita, uwayu. Ot lagamputyu pun illaku, awed kan chikayu lu simma pionyuʼn koon si ngilala, ked lappun mangipatut kan chikayuʼn idchonyu kan chikami. Puggey un hachigga simsimmokluʼn koon? Chakampun si cha tagu tiluntulliyam, ngim si Apudyus!”

5-6 Chingngeɏn pun Ananias chi imbyegan Peter, kakma latuwang ot latoy. Oli pun ummali cha uchum un bumaru ot bilussungcha lechegla si luput ot illawacha ummoy illobon siya. Ot amod chi ogyat cha losan un inggew si intullongchaʼn lakwa kan siya.

7 Lummaus pu tiɏun uras, gummatong si Safira un asawala ngim achipunla ammu lu silu lakwa. 8 Lagamput pun Peter impaila pilak, ilimusla kan siya, “Ibyegam, ha laoy chi losan un ngilan chi pitayu?”

Summongbyat, “O, lait losan.” 9 Oli pun kalan Peter kan siya, “Payuggey lantuɏagen mangin-in-an chi Ispiritun chi Apu? Chongɏom! Allatchaʼn ased cha ummoy langimbon kan asawam ked umoy chika bo ipasali ilawa.” 10 Ot kakma latuwang si sangwalan Peter ot latoy. Lilumlok pun cha bumaru, intullongcha boʼn latoy siya ot ilachangoycha illawa ot ummoycha illobon si cheeg asawala. 11 Ot losan cha mamati ya losan un langngeɏ si lakwa amod chi ilogyatcha.

12 Si hachiʼn timpu, achu cha lakaskaschaaw un killingwan cha apostoles kan cha achuʼn tagu. Ot pin-a lachagup losan cha mamati si templo un ngadloncha “Kallangan Solomon.” 13 Cha achipun mamati, umogyatchaʼn mitipug kan chicha ngim masmas-om cha tagu kan chicha. 14 Ngim ummachu-achu cha lamatiʼn leɏaki ya byebyai kan Apu Jesus ot lichogacha kan cha mamati. 15 Gapu si kawachin cha apostoles, illiyoy cha tagu cha lasakit si kesa ya imbyelatcha chicha si katlicha ya obokcha, ti kalancha lu lumaus si Peter maaɏungancha si alliliwanla ya cha uchum ked makaan chi sakitcha. 16 Amod cha taguʼn lampeɏpu si ili-iliʼn mampalikwos ud Jerusalem, inggetongcha cha lasakit ya cha laaɏan ot bummaɏucha losan.

17 Ot si hachi, amod chi apos chi kangatuwan un pachi ya losan un kadwalaʼn chogacha un Saduceo kan cha apostoles. 18 Ot ummoycha chilokmaan cha apostoles ot imbyaɏudcha chicha. 19 Ngim si hachiʼn labi, ummoy chi anghel Apudyus ot inwalitla olob chi byabyayɏuchen ot illawala cha apostoles ot kalala kan chicha, 20 “Ingkayu si templo ya ibyegayu kan cha achuʼn tagu chi mipanggop kan Jesu Kristu un mangtod si biyeg ing-inggala.”

21 Wiswisngit pun, tiluttuwan cha apostoles chi imbyegan chi anghel. Lilumlokcha si kallangan chi templo ot illugichaʼn mantudtuchu kan cha tagu.

Oli pun, gummatong chi kangatuwan un pachi ya cha bubuɏunlaʼn Saduceo si lugeɏʼn mammimitingancha ot impaayegcha cha kukunsiseɏ ya losan un pallakayon ta mammimitingcha. Ot lambuuncha si pulis chi templo un umoy mangaɏa kan cha apostoles si byabyayɏuchen. 22 Ngim gummatongcha pun udchi, lappun cha apostoles ud chaɏom ot langulincha kan cha kukunsiseɏ ot imbyegacha, 23 “Gummatong kami pun ud byabyayɏuchen, lichachakig cha olob. Inggew bo cha man-aachug udchi un summisiked si lasin chi sawang. Ngim inwalitmi pun, lappun taguʼd chaɏom.”

24 Chingngeɏn pun chi kapitan cha man-aachug si templo ya ap-apun cha papachi, achipuncha makaskasmok ya laschaawcha lu simma makwa kasin.* 5:24 Ha uchum un piolan uguchon si Greek ked simman lin chi lakwa kan chicha?

25 Oli pun gummatong chi osaʼn lampeɏpu si templo ot imbyegala kan chicha, “Cha taguʼn imbyaɏudyu, awed cha si templon mantudtuchu kan cha tagu.”

26 Ot ummoy chi kapitan pati cha man-aachug illaɏa chicha. Ngim achipuncha pilatut chicha ti umogyatcha kan cha achuʼn tagu pakalawa ta bintukoncha chicha.

27 Ot illiyoycha cha apostoles impasangu kan cha kukunsiseɏ. Ot silukun chi kangatuwan un pachi chicha un kalala, 28 “Bililinmi chikayu un achi kayu mantudtuchu mipanggop kan Jesus, ngim ilam-amodyu impakaammu siya si intilun chi Jerusalem ya pabyasuɏonyu bo chikami un ibyegbyegayu un chikami lamatoy.”

29 Ot summongbyat si Peter ya cha uchum un apostoles, “Masapuɏʼn tuttuwaonmi si Apudyus, chakampun un tagu. 30 Chikayu langtoy kan Jesus, illansayu siya si krus. Ngim si Apudyus un chilaychayaw cha aappumi, siya lalagu kan Jesus kasin 31 ot impangatula siya si machuwalanla ta siya Pangat ya Malagu, taplu idchela cha taguʼd Israel si wayachaʼn mambyabyawi kan cha byasuɏcha ked mapakawancha. 32 Chikami cha tistigu kan cha alla ya Ispiritun Apudyus un illidchola kan cha tumuttuwa kan siya.”

33 Chingngeɏn pun cha kukunsiseɏ hachi, amod chi silangacha ot pionchaʼn otoyon cha apostoles. 34 Ngim inggew chi osaʼn Pariseo un mangngachen Gamaliel, un mistulun chi lintog un mas-oman cha losan un tagu. Summiked ot imbilinla un ilawacha yan akit chicha. 35 Ot kalala kan chicha, “Susulud un iyIsrael, amman taku allechen chi koon taku kan cha allaʼn tagu. 36 Si sin-eɏgew, inggew chi osaʼn leɏakiʼn mangngachen Theudas un ibyegbyegalan langatu siya. Umoy si opat gasut cha leɏakiʼn litun-ud kan siya un disipulusla. Ngim pilatoy cha suɏchachu siya ked cha disipulusla liwatakcha ot hachi alungusla. 37 Lagamput pun siya, inggew bo si Judas un iGalilee un summupling si gubillun chi Rome si timpun chi lampalistaan cha tagu. Achu bo cha litun-ud kan siya. Ngim pilatoycha siya ot cha disipulusla liwatak cha bo. 38 Si sala, ibyegak kan chikayu lu ngay wayawayaan taku ya byeybyey-an taku chicha. Ti lu ha panggopcha willu kooncha ked lampeɏpu si tagu, achipun mituɏuy. 39 Ngim lu lampeɏpu kan Apudyus, achipun taku maabyak chicha, ti Apudyus chi busuɏon taku.” Ot tiluttuwan cha kukunsiseɏ imbyegan Gamaliel.

40 Ot impaayegcha kasin cha apostoles ot impasaplitcha chicha. Ot imbilincha un achipuncha kasin man-ugud mipanggop kan Jesus ot imbukatcha chicha.

41 Ummoyon pun cha apostoles, amod chi galascha ti imbilang Apudyus chicha un kalobbongancha un mapaligatan mipagapu kan Jesus. 42 Ileɏgew un intuytuɏuycha lantudtuchu ya langibyegbyega si templo ya cha achuʼn byebbyeɏoy un si Jesus chi Messiah.