Balʉwa wa yɨɓa
nɨnɔ Pɔlɔ ukpikilya ndɨ
Ɓatesalonika
Lɨkpʉmʉka la mambwa
Balʉwa wa yɨɓa nɨnɔ Pɔlɔ ukpikilya ndɨ ɓakilisito ɓa Tesalonika nɨmʉ. Akaʉtʉmbʉlya ɓata ɓɛyɔ Kilisito igoku ndɛkɛ mino, na ɓɛyɔ muliɓo ma ɔɓɨlɨ ka ɓatʉ ɓi nɨɓɔ ɓaɓɨnɨkyana Yeso ika ndɛkɛ gɔnɨ mino. Ɓatʉ ɓemoti-ɓemoti ka gʉɗʉ yi nɨnɔ ɓaɓɨkyaga ɓɛ Kilisito igoniku ndɨ, ɓatʉ ɓagɔgɔ ɓɛ kɛgʉ ɓɛyɔ, luki limoti, lɨsyɛ li a kʉwa ɓuwobi.
Nɨɓɔ ɓaɓɨkyaga ɓɛ lɨsyɛ li a kʉwa ɓuwobi, ɓakapagɨgʉ ɓata kagya ligubo, ɓanaɓɨkya ɓɛ ligubo kɛgʉ na ɨzangɨya. Luki limoti, ɓagaga kalyalya ka ɓatʉ nɨɓɔ ɓagyaga ligubo. Kinili, Pɔlɔ ukpikilya ndɨ ɓɛ mʉtʉ yɨkaka-yɨkaka okwononi kaɨkɔ ɓungu kyɛ alyalyɨ. Ʉɓɨkya gɔnɨ ɓɛ ɓigwinonogi na baya aka, ko ngbingo wa ɓʉkpɛkɨ-kpɛkɨ ɓika kagya ɓʉnza aka.
Yɨgbananaga ya kɨtaɓʉ yi nɨyɨ:
Yuuso 1:1-2
Yigoku ka Yeso oɓungusya ndɛkɛ makpʉmʉka masɨ 1:3-12
Mombukwono-dosu kanigikugʉ mbɛyɨ 2:1-12
Kaigwinonogo yapʉ ka baya 2:13-17
Malʉmba na ligubo 3:1-15
Yuuso ya muliɓo 3:16-18
1
Yuuso
1 Ɨmɨ Pɔlɔ pa imoti na Silivanɔ ɨɓʉ na Timotio, tamumuusogito iɓunu ɓomomosu ɓa Kanisa ya Tesalonika. Tamukpikilyi iɓunu balʉwa yi nɨmʉ, Kanisa nɨyɔ ko Kunzi Obosu na Mombukwono-dosu Yeso-Kilisito. 2 Obosu Kunzi na Mombukwono-dosu Yeso-Kilisito ɓamuɗukilyi ɨzɨyɔ na mazɨyɔ.
Kunzi akɔtʉ ndɛkɛ ngbanga ka ɓambanzʉ
3 Ɓomika-mama, tokwononi kamigisya Kunzi ɨbɨba ɓongbinga ɓasɨ ko bulya kunu. Okwononi tagyɨ ɓɛyɔ kyɛ baya kunu akopingo, na sɨpananɨsɔ nɨsɔ ma nosu luga kunu akaidukulogo ɓɛgɛyɔ. 4 Kinili, ta na ɓugindo ko bulya kunu kambwa wa Makanisa ko Kunzi, ko bulya lɨmbɛngɨ kunu lɨnda na baya kunu gʉtʉgʉ makaigyogyiso na kalya kumbu. 5 Masɨ nɨmɔ akowonisilo ɓɛ Kunzi opungini kakɔ ngbanga ka ɓungbingbili, kyɛ yigyogyiso amuitiso ndɛkɛ ɓʉkwanana kaingyo ka Ɓʉngama kakɨ. 6 A ɓɛyɔ, Kunzi a wongbingbili. Ugyogyisa ndɛkɛ ɓatʉ ɓasɨ nɨɓɔ ɓakamugyogyiso ɓɛgɛyɔ, 7 iɓunu ɓi nɨɓɔ makaigyogyiso, amuyukumisatʉ pa imoti na iɓusu. Agya ndɛkɛ ɓɛyɔ wa Mombukwono-dosu Yeso ipupisa ndɛkɛ mino kʉgʉ wa lɨsyɛ pa imoti na ɓamalaika kakɨ ɓo ngu, 8 odoku ndɛkɛ luga wa lɨɗaɗa lo ɓuku, ugyogyisa ndɛkɛ ɓatʉ nɨɓɔ ɓakyaga kamiba Kunzi na nɨɓɔ ɓakabaɨlyagʉ Mongoni Manza ka Mombukwono-dosu Yeso. 9 Yigyogyisa kaɓʉ ika ndɛkɛ pʉtɨkana ya ɓɛnzɛ na ɓɛnzɛ, ɓakɨnɨgʉ ndɛkɛ miso ka Mombukwono-dosu, ubisa ndɛkɛ ɓyɨ no ngu kakɨ ya ɨbɨba. 10 Ka lɨsyɛ li nɨlɔ odoku ndɛkɛ mino, ɓatʉ ɓasɨ nɨɓɔ ɓa ka mutili kakɨ, ɓabibisatʉ ndɛkɛ na nɨɓɔ ɓaɓɨnɨkyana ndɨ, nɔkʉ ʉdɨka ɓɨdɛ. Iɓunu gɔnɨ mika ndɛkɛ pa imoti na ɨɓʉ kyɛ moɓinikyononi ndɨ mongoni nɨmɔ tamʉɓɨkyaga ndɨ.
11 Kinili, tikaga ɓongbinga ɓasɨ kamʉkʉngʉlya. Takakʉnga Kunzi ambɛ amuitisi ɓatʉ nɨɓɔ ɓokwononi ka ɔɓɨlɨ nɨnɔ amʉmakaga mino. Pisi ko ngu kakɨ, amusingyi kotulyoso mʉsasa kunu manza na ligubo kunu ka baya. 12 Kika ɓɛyɔ, lino ka Mombukwono-dosu Yeso avatʉ ɨbɨba, na ɨyɨ amʉpátʉ gɔnɨ ɨbɨba. Nɨyɔ yasɨ a ɨzɨyɔ ko Kunzi na Mombukwono-dosu Yeso-Kilisito.