Ngwujaꞌri ngwanni ngwullu je
Butruj giꞌra geꞌte
Änï kitabanu
Ngwujaꞌri ngwanni ngwuru giꞌra ngwullu je Butruj ngwondacung ngwe ngwïkïrïjïnä ngene ngwucaar je “Ngwüjï ngwanni ngwäbrä je Ngwaalu,” ngwanni ngwubadalu mbüny mbüny kängïr ngwaalu ngwudi gen gweneno gicaar Türkïyä. Yanni yiru giꞌra gidi ngwujaꞌri yiru ndi orꞌtemaji ngwüjü ngwanni ngwadi uli ngwujaꞌri ngwee ngwübïnäär jälü aar mbuji yiꞌrendenya yani ämnï Ngwaalu gwegen. Butruj gwubupa nding je diwayiniyi Yicu gwe gwanni gwayu ngwüꞌdïꞌrï mana na ngwujaꞌri ngwe ngwüngün gwanni gwaru nggwe gwadi oꞌra, nunnu a ngindenga ätï geꞌtajing. Ngwujaꞌri ngwee aar ämnï aar orꞌtemaji giyiꞌrendeny yegen, aar ïcïnänü ndi ari ïdäjï gwuru gwani ꞌdidanu gwudi ämnï Ngwaalu gwegen a la aar je be ätädä guꞌru “komon gadi ge Yicu Kirictu ꞌtädälü” (1.7).
Orꞌtemaji gwe nggwee kaji gidi dïrbä, Butruj gwüpäcä ꞌto ngwüjälü ngwanni ngwadi uli ngwujaꞌri ngwee ndi aar elelle nono ngwüjü ngwudi Kirictu.
Yajang yidi ngwujaꞌri
1. Aganni (1.1–2)
2. Ange gwuru ndi geꞌtaji (1.3–12)
3. Elelle gwudi ngwüjï ngwujuꞌru ngwudi Ngwaalu (1.13—2.17)
4. Gwuji gora gidi yiꞌrendeny yidi Kirictu (2.18–25)
5. Ru dïkïrïjïn na yiꞌrendeny (3.1—4.19)
6. Ola gwani lanni lati okta giꞌdonga gidi Ngwaalu (5.1–11)
7. Aganni gwudi mïꞌrä (5.12–14)
1
Aganni
1 Äny gwani Butruj gwuru dooꞌra dükäjär didi Yicu Kirictu, ngwujaꞌri ngwee ngwükäcï nje ngwüjü ngwanni ngwäbrä je Ngwaalu ngwobadalu ngwuru ngwïrnü poor ngwaalu ngwee ngwani Buntuj, Galatiya, Gäbüdükïyä, Ajiya na Bïjïnïyä. 2 Ngwanni ngwäbräär je anaku lïngïdï gu Ngwaalu ngwuru Papa ꞌtuꞌtu gwerre ngwuje juꞌriyi Lïgïꞌrïm le nunnu aar ꞌdengenaci Yicu Kirictung ngwuje gwürä yïn ye yüngün.
Ara je gu yïmïꞌrü ji ara je gu adatalu ji gwïrälü.
Näjï Ngwaalinga gwani geꞌtaji gwanni gwumidu
3 Ar näjï Ngwaalinga ngwuru Papa gwudi Deleny dege dani Yicu Kirictu. Ndi ari ndi ïnä gwüngün gwanni gwupa ꞌdengge, a lima lïngïnï lïngïnïng gwanni gwuyang ndi geꞌtaji gwanni gwumidu ꞌdïꞌrï gwe gwudi Yicu Kirictu giyiꞌranyanu. 4 Aar nje änïjï giyuꞌrinanu yanni yati ꞌti ꞌdigiꞌru aꞌtur aar ralu aar medadi. Giyo yïrïmïtïjärä je kerala 5 ngaa lanni letadu gu yiima yidi Ngwaalu ämnïng gwe gwalu ꞌdünggüngün ꞌdi a gilang gwanni nggwo mama, ngwa ji ngwüꞌtädälü komon nggäꞌdï gidi gwodaning. 6 Jayar banu gwulleny gwani ngwujaꞌri ngwee, a be gweneno, mïmïnnï nono gwonyadu yiꞌranu gwa je mbuji gaji gooko. 7 Ya je mbuji giyee nunnu aar inggidi ndi ari ꞌdiꞌdidanu ämnï Ngwaalu gwalu gwanni gwupana guꞌru gidab danni dati medadi danni dati aar gwalli nono lïgä le nunnu aar ombaji ndi ari diru ꞌdidanu. Ämnï Ngwaalu gwalu gwuru gu no, ndi ari ngwümbüjïnï gwuru ꞌdidanu ndi orta, ndi näjï na ndi denya, ma ji ma Yicu Kirictu ꞌtädälü. 8 Gwaꞌti aang änggädï, ngaa be ämnï. Gwaꞌti aang änggädï gwenene, ngaa be ämnäcï lijayanu gwulleny lonyadu gu näjï gwupa. 9 Ndi ari ngaa gilo ndi ape guꞌru gidi ämnï Ngwaalu gwalu, gwani gilang gwudi lingeno lalu.
10 A gwani gilang nggwee, ngwïjïr ngwanni ngwondaja gïyïmïꞌrü yanni yadi ara je Ngwaalu ükäcä, yïmïnäär jälü gwulleny aar ye arngani guꞌru gipa. 11 Aar bupi ndi ari ye lenge gaji aar ye lenge ngwujaꞌri ngwanni ngwinggida je Lïgïꞌrïm lidi Kirictu lanni liju ꞌdenggenanu. Anni ondajing gwani yiꞌrendeny yanni yadi mbuji Kirictung, a gwani näjï gwupa gwanni gwadi gwuja.
12 Ngwaalu ngwondaca ngwïjïrä ndi ari ngwaꞌti äpïjä yigoꞌro yegen yiiru, ara je be äpïjï yiiru. Anni ondacaar yiꞌral ye yanni yima je ꞌdingini gweneno. Ngaa liꞌdingina ngwujaꞌri ngwee ngwanni ngwondaca je ngwüjï, ngwujaꞌri ngwanni ngwujaw ngwani Yicu Lïgïꞌrïm le lanni Lijuꞌru lükäjïnä kerala. ꞌDi ndi ari yïꞌrr ꞌto yïjädï ndi ombaji yiꞌralanu giyee.
Juꞌrar
13 Yäy gu no, jar balu ngwäy ngwe ngwudi yigor yalu aang arngani gwani yiiru. A geꞌtaji gwalu ꞌdar jada gïyïmïꞌrü yanni yadi ara je Yicu Kirictu ätädä mung ꞌtädälü. 14 Nono yïjü yiꞌdengenaca Ngwaalinga, aaꞌti ba be ngaa loꞌraci elelleng gwudi amiꞌra gwudi lingeno gwele gwuju yogo ye gwerre. 15 Ngaa be juꞌri anaku juꞌrung gu gwanni gwurnida je, no juꞌrar be giyiꞌral ꞌdar yanni yata je ärrï. 16 Ndi ari yüllïnä no yaru nu, “Juꞌrar, anaku juꞌriny gu.” 1.16 Ngwullawi 11.44–45; 19.2; 20.7
17 Ndi ari anni urnidangaa Ngwaalinga ngwuru Papa gwanni gwati ꞌti utu ngwüjänü ndi pï yelenya yüngün, elellar elelleng gwudi ngwüjï ngwuru ngwïrnü ngene gïdïdlä ara je yedeny eny. 18 Ngaa lïlïngïdï ndi ari laꞌta je üꞌrädälü kay ganni gaꞌti ätï midinganu gïgätïjänärä je mbumbunga lalu ngwong ngwe ngwanni ngwati dudi nono buta na dab, 19 ara je be üꞌrälü yïn ye yidi Kirictu yanni yiru guꞌru, gwuru Girany ganni gijaw nono gaꞌti rngü. 20 Gwäbräär ꞌtuꞌtu gwerre dïdlä daꞌtina gïꞌtïnä, gwuma aar be ꞌtäjälü kaji nggee gidi gwodaning gwani nga nga. 21 Nginde gwe, ngaa lima ämnï Ngwaalu ngwanni ngwüꞌdïꞌrïyälü giyiꞌranyanu ngwünäjï, a gu no, ämnï Ngwaalu na geꞌtaji gwalu nggwo gwüjädï Ngwaalu.
22 Gweneno anni ma aang gäꞌrïnï yigoꞌro yalu ꞌdengenaji gwe ꞌdidanung nunnu ngaa ätï ämnïng ngwengga ꞌdiꞌdidanu, ämnäjïdär gwulleny ꞌtuꞌtu giyigoranu. 23 Ndi ari ngaa lima lïngïnï lïngïnïng gwanni gwuyang ngaa läꞌtüdï yuula yanni yati änï, ngaa be ru yuula yanni yati ꞌtüdä, midi gwe na mätïnälü gwe gwudi ngwujaꞌri ngwudi Ngwaalu. 24 Ndi ari yüllïnä yaru nu,
“Midi gwudi ngwüjï ꞌdar gwuru nono yanya,
na näjï gwegen gwuru nono yibobo yidi dïdäny.
Yanya yati undi na yibobo yati ayi nono aar miꞌriꞌti,
25 a be ngwujaꞌri ngwudi Ngwaalu ngwati jalu pupud.” 1.25 Ajaya 40.6–8
A ngwujaꞌri ngwuru ngwee ngwanni ngwondacara je ngwe.