1 U ve awg khaz nuhr, teq chi uhd khuhq gaeg lehq, ngag Tid tuq haq sir ve lehq, Bar nar baq* 2:1 Bar nar baq Cuhx kig awr lehr, “Su haq awg ghad pid sehr phad” lehd koz gad che yaog. Te pawz pawz ax ver Yod sehq lehd liz koz che yaog. geh Yer ruq sar lehnr med lo te pawz kawq kae che yaog. 2 Ghig sa pheq mar ax che haq te lehq ngag kae che yaog. Ngag te chehd che kanx he lehq peg lar haz che kanx teq pa kheha maq gha phehq tug, bid saz a naz chaw teq pa haq ngag mar vid che ha lehg che bon khuhd i hehd mehz khuhd suhr ngag koz mar vid che yaog. (Kheh ma khuhd, awg hox teq pa haq lehax ngag koz mar vid che yaog.) 3 Ngag geh teq geha kae che Tid tuq awr lehr, Her lar saq chaw phehq liz, su yawd haq awg gig med maq soer cuh. 4 Yer suq Khreq awg khuhn ngag hehd gha lar che pong che ted ceng haq jaz ngawx lehq ngag hehd haq awg ceg te cuha tug, a vix a nax lehd koz che liz, a vix a nax ma hez che chaw teq pa† 2:4 a vix a nax ma hez che chaw teq pa Khreq yad te lag che bid saz a naz chaw teq pa awg gig med soer cawd che yaog, lehz mar che chaw teq pa haq koz che yaog. ngag hehd geh khuhd gehag lar che yaog. Chaw che teq pa awr lehr, Tid tuq haq awg gig med soer cuh gad che yaog. 5 Kheh ma khuhd, ha lehg che bon khuhd ve awg cehg mag cawd che ted ceng nig hehd awg khuhn lo yeg chehd tug, ngag hehd i hehd ve khuhd haq a cehax liz maq na.

6 Awg hox u ve teq pa awr lehr, ngag mar vid che ha lehg che bon khuhd haq teq chaweh maq thehnr ax.‡ 2:6 teq chaweh maq thehnr ax Duhd khad awg suhx maq pehar ax, lehd koz gad che yaog. (I hehd awg hox te che lehd koz che awr lehr, i hehd a thoq te che chaw phehq liz, ngag awg pun a yed maq ir. Ghig sa awr lehr chaw yad ve mehz khuhd haq maq ngawx.) 7 I hehd teq chaweh maq thehnr ax che awg khod-aq liz, awg gig med soer che chaw teq pa haq ha lehg che bon khuhd mar vid tug Ghig sa Per troq haq chid aq vid lar che heh, awg gig med maq soer che chaw teq pa haq ha lehg che bon khuhd mar vid tug Ghig sa ngag haq chid aq ax lar che yaog lehz, i hehd gha sir gha mawg che yaog. 8 (Awg lawn ghod ver, awg gig med soer che chaw teq pa awg pun kanx te tug Per troq haq cuh yad ve a yad pid sehr phad te ghad awr lehr, bid saz a naz chaw teq pa awg pun kanx te tug ngag haq liz cuh yad ve a yad pehar che§ 2:8 a yad pehar che Kanx te tug Ghig sa kand pax pehar che haq koz che yaog. Rm 1:5 yaog.) 9 Kheh te lehq awg hox te chehd che Yar koq, Ker phaq he lehq Yod hanr teq pa awr lehr, ngag haq pehar che awg bon haq gha mawg che te yand, i hehd Bar nar baq ngag nid-ag haq laq yaq awr pax awr laq kuhr cax ax che yaog. U kheh te che awr lehr, i hehd ngag nid-ag ve kanx haq haq yug lehq awg chawd te daq che awg hez phehq che yaog. Ngag nid-ag awr lehr, bid saz a naz chaw teq pa geh kae lehq, i hehd awr lehr, Yud daq chaw teq pa geh kae tug yaog lehd koz daq lar che yaog. 10 Yer ruq sar lehnr med khuhn har che ghuhd che Yud daq chaw Khreq yad teq pa haq ngag hehd ga vid tug, che ve ted ceng lehax ngag hehd haq i hehd lawg khawx lar che yaog. U kheh te che awr lehr, ngag khar thad liz cud cad lehq te lag chehd che yaog.

11 U ve awg khaz nuhr Ker phaq awr lehr, Anr tiz awr* 2:11 Anr tiz awr Sud riq chaw teq pa ve med nux phehq che yaog. Pawd loq u huh chehd lehq kanx te che yaog. Cy 13:1-4, 15, 34-39 med lo gag vehr che te yand, yawd te ma cawd che ted ceng kha sehax mawg vehr che haq te lehq, ngag yawd haq mehz khuhd tawr daq lar lehq ded vid che yaog. 12 Awg lawn ghod ver, Yar koq chehd huh lag che chaw teq pa mad lag gag ser huh, Ker phaq awr lehr, Yud daq chaw ma hez che Khreq yad teq pa geh awr cad chehd che yaog. Kheh ma khuhd, i hehd lag gag che te yand, awg gig med soer che awg lid haq duhd cawd che chaw teq mor haq yawd kuhz che haq te lehq, Yud daq chaw ma hez che Khreq yad teq pa haq phaz daq lehq, i hehd geh teq geha awr mad kawq cad che yaog. 13 Awg kag awr ve Yud daq chaw† 2:13 Awg kag awr ve Yud daq chaw Khreq yad phehq vehr che Yud daq chaw haq koz che yaog. teq pa liz, yawd geh teq geha ma hez awr te che haq kawq te cheaq te lehq, Bar nar baq liz i hehd geh teq geha te veh che yaog. 14 I hehd awr lehr, ha lehg che bon khuhd ve awg cehg mag cawd che ted ceng awg khad haq thed-e ghad maq kae che haq ngag gha mawg che te yand, i hehd awg gha lia mehz khuhd suhr Ker phaq haq ngag che kheh koz vid che yaog, “Nawg awr lehr Yud daq chaw phehq che liz, Yud daq chaw heh nawg maq te lehq bid saz a naz chaw heh te ver, a thoq te lehq nawg bid saz a naz chaw teq pa haq Yud daq chaw ve awg lid haq te tug, i hehd haq nex te cheawg le,” lehd koz vid che yaog.

15 A nig awr lehr, pawag thad liz Yud daq chaw phehq che yaog. Vend bax yad lehd koz che bid saz a naz chaw phehq che ma hez. 16 A nig yonr che Yud daq chaw phehq che liz, chaw te ghad ghad thed che cawd che chaw phehq vehr che awr lehr, awg lid tawd khuhd haq caz daq che kanx teq pa haq te che haq te lehq phehq che ma hez.‡ 2:16 awg lid tawd khuhd haq caz daq che kanx teq pa haq te che haq te lehq phehq che ma hez Che awr lehr Pawd loq mar che awg khad nux yaog. Rm 3:20, Phi 3:9 Kheh ma khuhd, Yer suq Khreq haq yonr che haq te lehq thed che cawd che chaw phehq vehr che haq a nig sir che yaog. A nig liz, Khreq haq yonr che haq te lehq thed che cawd che chaw phehaq tug, Yer suq Khreq haq a nig yonr lar peor. Awg lid tawd khuhd haq caz daq che kanx teq pa haq cud che awg khuhn thed che cawd che chaw phehaq che ma hez hawg. Awg lawn ghod ver, awg lid tawd khuhd haq caz daq che kanx teq pa haq te che haq te lehq, chaw te ghad-e liz thed che cawd che chaw phehaq tug ma hez. 17 Khreq haq yonr che haq te lehq thed che cawd che chaw phehaq tug a nig ca chehd che te yand, a nig vend bax yad phehq che yaog lehz tuhaz ver, Khreq awr lehr vend bax awg pun kanx te sehr phad phehq che lehq la. Che kheh ma hez hawg. 18 Kheh ma khuhd, ngag phaz kha lar che awg ceng haq ngag kawq ghu te ver,§ 2:18 ngag kawq ghu te ver Awg lid tawd khuhd awr lehr chaw yad haq thaer khuhq vid maq gha che haq sir vehr khaz nuhr, awg lid tawd khuhd haq kawq cud chehd che haq koz che yaog. ngag te yaq sehr phad phehq che yaog lehz kha sehax tuhaz che yaog. 19 Awg lawn ghod ver, Ghig sa awg pun ngag gha teq chehd tug, awg lid tawd khuhd haq te lehq, awg lid tawd khuhd haq ngag suh vehr che yaog.* 2:19 awg lid tawd khuhd haq ngag suh vehr che yaog Awg lid tawd khuhd awg huhx lo ma chehd-og lehd koz gad che yaog. Rm 7:4 20 Ngag Khreq geh teq geha laq kan thag huh khanr suh peor.† 2:20 Khreq geh teq geha laq kan thag huh khanr suh peor Co ha gha teq tug Awg lid awg pir awg gha lia haq kha nehax ghaq te che a saq teq khad haq chid bag lar haz peor lehd koz gad che yaog. 2K 5:17 Kheh te lehq, a meha teq chehd che awr lehr ngag awg ton ma hez, Khreq ngag awg khuhn lo teq chehd che yaog. A meha awg suhr awg sar awg ton khuhn ngag a saq teq chehd che awr lehr, ngag haq haq lehq ngag awg pun yawd awg ton tand peg che, Ghig sa ve Yad phu haq ngag yonr che haq te lehq teq chehd che yaog. 21 Ghig sa ve awg bon haq ngag chid bag lar haz che ma hez. Awg lawn ghod ver, awg lid tawd khuhd haq te lehq thed che cawd che chaw phehaq gha ver, Khreq suh che awr lehr teq chaweh awg bon mad cawg che yaog.