3 Yod hanr liq
Awg meh he lehq phehq peg che awg lawn
Yod hanr kae pe lar che ha lehg che bon khuhd mar par sar lar teq pa haq Ar siq muhd mig khuhn cawg che Khreq yad awg mor teq mor khuhn mad haq yug vid che yaog. Che ve awr lehr su haq nex te gad vix che Dar yawd tar raz meh che Khreq yad awg mor u ve khuhn ve awg hox te ghad haq te lehq yaog. Chaw che phad vawr, te pong te lex lehq Yod hanr kae pe che chaw teq pa haq haq yug vid che ced caor yad teq pa haq liz, Khreq yad awg mor awg khuhn ghaq tuhz vid che yaog.
Buhq var he lehq buhq che awg yand
Liq che ve te koz haq buhq che awg yand awr lehr, 1 Yod hanr he lehq 2 Yod hanr liq haq buhq che te yand thad huh lehax A.D. 90 khuhq kheh thad huh buhq lar che yaog. 2 Yod hanr he lehq 3 Yod hanr liq haq yug lehq tehz daq ngawx ver, liq che ve ni koz koz haq cuh yad Yod hanr buhq lar che yaog lehz sir gha che yaog. Awg yand u ve khuhn, Yod hanr yawd a saq kehx lehq mawd vehr phawd awr gaeg lehq, Khreq yad awg mor awg khuhn awg hox chaw mawd te chehd che yaog. Kheh te cheaq te lehq, yawd 2 Yod hanr liq he lehq 3 Yod hanr liq haq buhq che te yand, awg kawd tanr buhq kig huh liz, a yad u ve haq yehd lehq koz buhq lar che yaog. Yod hanr liq che ve ni koz awg khuhn tawd khuhd sur daq che yehd lar che tawd khuhd teq pa vawr, che kheh yaog: “Awg cehg mag cawd che awg khuhn haq pehnd che” (2 Yod hanr liq ka nad nux 1 he lehq 3 Yod hanr liq ka nad nux 1), “Awg cehg mag cawd che awg khad haq kae che” (2 Yod hanr liq ka nad nux 4 he lehq 3 Yod hanr liq ka nad nux 4). Liq che ve ni koz awg khuhn awg leh med ve tawd khuhd liz sur daq che yaog.
A yed ir che awg lawn he lehq awg lawn kha peg
Yod hanr yawd liq che ve te koz haq buhq lehq yawd ved awg chawd Gar yuq meh che Khreq yad awg mor awg khuhn awg hox te chehd che haq fe vid che yaog. Gar yuq a vix a nax haq ga vid che awg lawn haq, Yod han liq che ve buhq lehq Gar yuq haq chid muh lehq awg bon ir khuhd yaw vid lehq, awg ghad pid che yaog. Kheh te lehq, Yod hanr yawd awg hox te lehq seh kae che haq maq na yug lehq tawr chehd che Dar yawz tar raz haq liz ded lar che yaog. Yod hanr koz che yawd te pawz kawq lag ver, Dar yawz tar raz haq yawd kha sehax a yed yug tug yaog lehd koz lar che yaog.
Awg lawn nux
1. Awg kawd ve tawd (1-2)
2. Gar yuq haq chid muh che (3-8)
3. Dar yawz tar raz haq ded che (9-10)
4. Gar yuq haq awg ghad pid che (11)
5. Der mer triq daq che hend yug tug phehq che (12)
6. Awg leh med ve tawd (13-14)
1
Awg chawd haq duhd nuhd che tawd
1 Ngag awr lehr awg hox chaw mawd phehq lehq haq che Gar yuq nawg haq liq buhq ax che yaog. Awg cehg mag cawd che ted ceng awg khuhn ngag nawg haq haq che yaog. 2 Haq che awg chawd-og, co ha phawd awr ve awg ceng nawg kha peh cawg che heh, awg ceng gha lia khuhn nawg kha peh vad-ag cawg tug he lehq chehd sa cawg sa tug ngag bon lawg chehd che yaog. 3 A vix a nax teq pa lag lehq awg cehg mag cawd che bon khuhd awg khuhn nawg kae chehd che awg lawn i hehd sax khiz khanr cheaq te lehq, ngag ha lehg jad che yaog. Awg lawn ghod ver nawg awg cehg mag cawd che awg khad haq awg cehg mag kae che yaog. 4 Ngag ved awg yad awg dug teq pa awg cehg mag cawd che awg khad haq kae chehd che haq ngag gha kad lehq ha lehg jad che yaog. Che haq keh lex lehq ir che ha lehg che ted ceng ar liz mad cawg.
Gar yuq su haq ngawx haq sax vid che
5 Haq che awg chawd-og, a vix a nax teq pa haq nawg mad mawg maq sir daq jaw liz kha nehax ngawnx lehq haq sax vid che awr lehr, nawg Ghig sa awg khuhn kar tiq yeg jad che chaw yaog. 6 Nawg ved haq pehnd che awg lawn Khreq yad awg mor mehz khuhd suhr i hehd sax khiz khanr peor. Ghig sa haq kenr daq che heh nawg i hehd haq awg ghud med awr ga pe vid ver daq jad che yaog. 7 Awg lawn ghod ver, Yer suq Khreq awg pun i hehd bon ca tuhz mar kae lehq bid saz a naz chaw teq pa ga vid che haq i hehd mad haq yug. 8 Kheh te cheaq te lehq awg cehg mag cawd che awg pun chaw che teq pa geh teq geha a nig kanx te gha tug, a nig i hehd haq kha nehax ga vid cawd che yaog.
Dar yawz tar raz su haq tawr chuhd kheh che
9 Khreq yad awg mor haq ngag liq a cehax buhq fea peor. Kheh ma khuhd nig hehd awg khuhn su haq keh ir gad che Dar yawz tar raz te ghad awr lehr ngag hehd khuhd maq na. 10 Kheh te che haq te lehq ngag lag ver, yawd te chehd che teq pa haq ngag kawq duhd nuhd vid tug yaog. Yawd haeg che tawd haq yaw lehq ngag ved awg lawn ma hez che teq pa haq koz chehd che yaog. Che kheh lehax te che haq yawd ni khaz maq suh ser, a vix a nax teq pa haq yawd mad haq yug che lehax ma hez, haq yug gad che chaw teq pa haq tawr chuhd lehq Khreq yad awg mor khuhn ghaq kog vid che yaog.
Der mer triq awg pun sax khiz khanr che
11 Haq che awg chawd-og, haeg che awg khad haq taq kae-og. Daq che awg khad haq kae-og. Daq che haq te che chaw te ghad awr lehr Ghig sa ve chaw phehq che yaog. Haeg che haq te che chaw te ghad awr lehr Ghig sa haq mad mawg jaw che yaog. 12 Chaw awg gha lia Der mer triq awg pun sax khiz khanr che yaog. Yawd awg cehg mag cawd che awg khad haq ghaq kae che ted ceng liz yawd awg pun sax khiz khanr che yaog. Ngag hehd liz sax khiz khanr lehq sax khiz u ve awr lehr awg cehg mag cawd che yaog lehz nawg sir che yaog.
Awg leh med ve tawd khuhd
13 Ngag nig hehd haq liq buhq ax tug kha peh cawg liz, liq koz he lehq nag meq tag yug buhq che haq maq te gad. 14 Maq muh tand ver, nawg haq gha mawg daq lehq mehz khuhd tawr daq lar che khuhn, awd nag tawd gha yaw daq tug haq ngag duhd law chehd che yaog. 15 Nawg geh duhd sa gad sa che cawg vid-oq. Awg chawd teq pa nawg haq haq pehnd che khuhn sanr fea che yaog. Nawg liz nawg geh chehd che awg chawd te ghad peg te ghad haq ngag hehd sanr fea che haq pehnd che khuhn kawq koz vid ser.