1-2 అయావలె సవులు ఇనికాన్‌ యేసుప్రబు ముస్కు నమ్మితి వరిఙ్ ‌బెద్రిసి మహాన్‌. వరిఙ్‌ మాలెఙ్ కిజి మహాన్‌. వాండ్రు విజేరె పుజేరిఙ ముస్కు పెరి పుజేరిబాన్‌ సొహాండ్రె దమస్కు పట్నమ్‌దు మన్ని యూదురి మీటిఙ్‌ ఇల్కాణి పెద్దెల్‌ఙ సీదెఙ్‌ ‌ఉత్రమ్‌కు లొస్తాన్. ఇని ఉత్రమ్‌కు ఇహిఙ, దమస్కు పట్నమ్‌దు యేసుప్రబు ముస్కు నమకం ఇడ్తికార్ ఎయెర్‌బా మహిఙ, మొగ్గకొడొఃర్‌ గాని అయ్‌లికొడొఃక్‌ గాని వరిఙ్‌ తొహ్సి ఒసి యెరూసలేం పట్నమ్‌దు తతెఙ్‌ సవులుఙ్‌ ‌అతికారం మనాద్‌ ఇజి వెహ్సిని ఉత్రమ్‌కు.

3 విజేరె పుజేరిఙ ముస్కు పెరి పుజేరి సిత్తి ఉత్రమ్‌కు అస్తాండ్రె సవులు దమస్కు పట్నమ్‌దు సొండ్రెఙ్ ‌సోత్తాన్. దమస్కు పట్నం డగ్రు వాజి మహిఙ్ గదెం ఆగసమ్‌దాన్‌ ఉండ్రి గొప్ప జాయ్‌ వన్ని సురులం డెఃయ్‌తాద్. 4 అయావలె సవులు బూమిదు అర్తాన్. అర్తిఙ్, “సవులు, సవులు, నీను ఎందనిఙ్‌ నఙి మాలెఙ్ కిజిని”, ఇజి వన్ని వెట వెహ్ని ఉండ్రి మాట వెహాన్‌.

5 “ప్రబు, నీను ఎయి”, ఇజి సవులు వెన్‌బాతాన్. “నీను మాలెఙ్ కిజిని యేసునె నాను. 6 ఏలు నిఙ్‌జి పట్నమ్‌దు సొన్‌అ. నీను ఇనిక కిదెఙ్‌ ఇజి ఒరెన్‌ నిఙి వెహ్ననాన్‌లె”, ఇజి మాట వెహ్తాన్‌. 7 సవులు వెట సొన్సి మహికార్ ‌జాటు వెహార్‌ గాని ఎయెరిఙ్‌బా తోర్‌ఏతార్. వారు అల్లెత నిహ మహార్‌. 8 సవులు బూమిదాన్ ‌నిఙిత్తాండ్రె బేస్తాన్‌ గాని కణుకు తోర్‌ఏండ ఆతె. అందెఙె వారు వన్నిఙ్ ‌కికాఙ్ ‌అస్తారె దమస్కు పట్నమ్‌దు నడిఃపిసి ఒతార్. 9 వాండ్రు మూండ్రి రోస్కు కణుకు తోర్‌ఏండ మహాన్‌. ఇనికబా తిన్‌ఏండ ఉణెఎండ మహాన్‌.

10 దమస్కు పట్నమ్‌దు యేసుప్రబు సిసూడుః ఒరెన్‌ ‌అననియ ఇనికాన్‌ మహాన్‌. యేసుప్రబు వన్నిఙ్‌ దర్సనమ్‌దు తోరె ఆతండ్రె, “అననియ”, ఇజి కూక్తాన్. కూక్తిఙ్‌ అననియ, “ప్రబువా నాను ఇబ్బె మన్న”, ఇహాన్‌.

11 యేసుప్రబు వన్నివెట, “నీను తినాఙ్‌ ఇజి కూక్ని సరిదు సొన్‌అ. బానె యూద ఇని వన్ని ఇండ్రొ సొన్సి తార్సు పట్నమ్‌దికాన్ ‌సవులు ఇని వన్ని వందిఙ్‌ ‌వెన్‌బాఅ. సవులు పార్దనం కిజి మంజినాన్. ఉండ్రి దర్సనమ్‌దు సవులు ఇనిక సుడ్ఃతాన్‌ ఇహిఙ, 12 అననియ ఇనికాన్‌ ఒరెన్‌ వాతండ్రె వన్ని కణెకెఙ్‌ ‌నెగెండ్‌ కిజి మరి సూణి లెకెండ్‌ ఆదెఙ్‌ వన్ని బురాదు కిక్కు ఇడ్నివజ సుడ్ఃతాన్”, ఇజి వెహ్తాన్‌.

13 దన్నిఙ్‌ అననియ వెహ్తాన్‌, “ప్రబు వీండ్రు యెరూసలేమ్‌దు నిఙి కేట ఆతి వ‍రిఙ్‌ ‌ఎస్సొనొ మాలెఙ్ కిత్తాన్‌‌ ఇజి వన్ని వందిఙ్‌ నాను నండొ వెహ మహ. 14 ఇబ్బె యా పట్నమ్‌దు నీ ముస్కు నమకం ఇడ్తి వరిఙ్ ‌తొహ్సి ఒసి యెరూసలేమ్‌దు ఒతెఙ్‌ ‌వన్నిఙ్ ‌అతికారం సీని ఉత్రమ్‌కు పెరి పుజేరిఙ బాణిఙ్‌ అస్తాండ్రె వాత మహాన్”. 15 యేసుప్రబు అననియ వెట, “నీను సొన్‌అ. యూదురు ఆఇ లోకుర్‌ నడిఃమి, రాజురిఙ నడిఃమి, ఇస్రాయేలు లోకాఙ్‌ నడఃమి నా వందిఙ్‌ ‌వెహ్తెఙ్ ‌నాను వన్నిఙ్‌ ఏర్‌పాటు కిత మన్న. 16 నా వందిఙ్‌ వాండ్రు ఎసొనొ మాలెఙ్ ఆనాన్‌ ‌ఇజి నాను వన్నిఙ్ ‌తోరిస్న”, ఇహాన్‌.

17 అందెఙె అననియ అయ ఇండ్రొ సొహాండ్రె సవులు ముస్కు కిక్కు ఇట్తాన్. “సవులునా, నీను వాతి సరిదు నిఙి తోరె ఆతి ప్రబు ఆతి యేసు నఙి పోక్త మనాన్. నీను మరి సూణి వందిఙ్‌ దేవుణు ఆత్మ సత్తు నీ ముస్కు వాని వందిఙ్‌ నఙి పోక్త మనాన్”, ఇజి సవులు వెట వెహ్తాన్‌. 18 అయావలె వన్ని కణకాణిఙ్‌ పొరొఙ్‌ నన్నికెఙ్ ‌రాల్తిఙ్ ‌సుడ్ఃదెఙ్‌ ‌అట్తాన్. సవులు నిఙితండ్రె బాప్తిసం లాగె ఆతాన్. 19 వెనుక బోజనం కితాండ్రె సత్తు ఆతాన్.

సవులు దమస్కు పట్నమ్‌దు మహి యేసుప్రబు సిసూర్‌ వెట సెగం దినమ్‌కు మహాన్‌. 20 యూదురి మీటిఙ్‌ ‌ఇల్కాఙ్ ‌తిన్నాఙ్‌ సొహాండ్రె యేసునె దేవుణు మరిసి ఇజి యేసుప్రబు వందిఙ్ ‌బోదిస్తెఙ్ ‌మొదొల్‌స్తాన్. 21 అక్క వెహికార్ విజేరె నండొ బమ్మ ఆతార్. యెరూసలేమ్‌దు యేసుప్రబుఙ్‌ నమ్మితి వరిఙ్ ‌పాడుః కిజి మహికాన్‌ ‌వీండ్రెగదె. యేసుప్రబుఙ్‌ ‌నమ్మితి వరిఙ్ ‌తొహ్సి పెరి పుజేరిర్ డగ్రు కూక్సి ఒతెఙ్‌ ‌ఇబ్బెబా వీండ్రు వాత మనాన్‌ ఇజి వెహ్తార్‌. 22 అహిఙ్‌బా పవులు మరి నండొ సత్తుదాన్ ‌బోదిసి మహాన్‌. యేసునె ‌దేవుణు పోక్తి క్రీస్తు ఇజి రుజుప్‌ ‌కిత్తాండ్రె దమస్కు పట్నమ్‌దు మహి యూదురుఙ్ గాబ్ర కిత్తాన్‌. 23 నండొ రోస్కు సొహి వెనుక సవులుఙ్‌ ‌సప్తెఙ్ ‌ఇజి యూదురు ఆలోసనం కిత్తార్‌. 24 గాని వరి ఆలోసనం సవులుఙ్‌ తెలితాద్. వన్నిఙ్‌ సప్తెఙ్‌ ‌వారు రెయువేల పూర్తి పట్నం వెల్లి సొని సేహ్ల* 9:24 సేహ్ల. దమస్కు పట్నం సురుల పెరి గోడ్డః తొహ్త‍ మహాద్‌. గోడాఃదు ప‍ట్నం వెల్లి సొని సేహ్లెఙ్‌ మ‍హె. బానె పట్నం కాప్‌ కినికార్‌ కాప్‌ కిజి మహార్‌ బాన్‌ సుడ్ఃజి కాత మహార్‌. 25 గాని వన్ని సిసూర్‌ రయ్తు వన్నిఙ్ ‌ఒతారె ఉండ్రి గంపదు బసె కితారె పట్నం సురుల మన్ని గోడఃదు మన్ని ఉండ్రి కిటికి బొరొదాన్‌ వన్నిఙ్ ‌అడిఃగి డిఃప్తార్.

26 సవులు యెరూసలేమ్‌దు సొహిఙ్‌ ‌సిసూర్‌ వెట కూడ్ఃదెఙ్‌ ‌సుడ్ఃతాన్. గాని వాండ్రు సిసూర్‌ లొఇ ఒరెన్ ఆఏన్‌ ఇజి వారు ఒడిఃబిత్తారె వన్నిఙ్ ‌వరివెట కూడుఃప్తెఙ్‌ ‌తియెల్ ‌ఆతార్. 27 గాని బరబ్బ ఇనికాన్‌ ‌వన్నిఙ్ ‌అపొస్తురుబాన్ ‌కూక్సి ఒతాన్. సవులు దమస్కు పట్నమ్‌దు సొహి సరిదు ఎలాగ యేసుప్రబు వన్నిఙ్‌ తోరె ఆతాన్‌ ‌ఇజి, ఎలాగ యేసుప్రబు వన్నివెట వర్గితాన్ ‌ఇజి, వెనుక సవులు ఎలాగ దమస్కు పట్నమ్‌దు తియెల్‌ సిల్లెండ యేసుప్రబు వందిఙ్ ‌బోదిస్తాన్‌ ఇజి బరబ్బ అపొస్తురు వెట వెహ్తాన్‌. 28 అయావలె అపొస్తురు సవులుఙ్‌ కూడుఃప్తిఙ్ వాండ్రు వరివెట కూడిఃత మహాన్‌. వరివెట కూడిఃతాండ్రె యెరూసలేమ్‌దు విజు బాడ్డిదు సొన్సి తియెల్‌ ‌సిల్లెండ యేసుప్రబు వందిఙ్ ‌బోదిస్తెఙ్ ‌మొదొల్‌స్తాన్. 29 గ్రీకు బాస వర్గిని యూదురు వెట వర్గితాండ్రె తర్కిస్తాన్. అందెఙె వారు సవులుఙ్‌ ‌సప్తెఙ్ ‌సుడ్ఃతార్. 30 యాక తెలితారె సిసూర్‌ వన్నిఙ్ ‌డిగు మన్ని కయ్‌సరియాదు ఒతారె తార్సు పట్నం పోక్తార్.

31 అయ కాలమ్‌దు యూదయ, గలిలయ, సమరియ దేసమ్‌కాఙ్ ‌మహి దేవుణు సఙం ‌తియెల్ ‌సిల్లెండ సమదానమ్‌దాన్ ‌మహార్‌. సఙం దేవుణుదిఙ్‌ లొఙిజి దేవుణు ఆత్మ సాయమ్‌దాన్‌ సత్తు ఆజి వాతె. నమ్మితికార్‌ నండొండార్‌ ఆజి వాతార్.

32 అయావలె పేతురు నాహ్కునాహ్కు, పట్నమ్‌కుపట్నమ్‌కు సొన్సి లుద ఇని నాటొ దేవుణుదిఙ్‌ కేట ఆతి వరిఙ్‌ సుడిః సొహాన్‌. 33 బానె ఒరెన్ ‌అయ్‌నెయ ఇనికాన్‌ ఎనిమిది పంటెఙాణ్ ‌అసి నిఙ్‌దెఙ్ ‌అట్ఇ వన్నిఙ్ సుడ్ఃతాన్. వాండ్రు కిక్కు కాల్కు అర్తికాన్. 34 పేతురు వన్నిఙ్‌ సుడ్ఃజి, “అయ్‌నెయ, యేసుక్రీస్తు నిఙి నెగెండ కిజినాన్. నిఙ్‌జి, నీ మంసం నీనె పెర్జి ఉండ్రి పడఃకాద్‌ ఇడ్ఃఅ” ఇహాన్‌. 35 వెటనె అయ్‌నెయ నిఙిత్తాన్. లుదా నాటొదు, సారోను దేసమ్‌దు మహికార్‌ విజేరె, వన్నిఙ్‌ జర్గితిక సుడ్ఃతారె యేసుప్రబుఙ్‌ ‌నమ్మితార్.

36 అయావలె యోప ఇని పట్నమ్‌దు తబిత ఇని ఉండ్రి అయ్‌లి కొడొః మహాద్‌. అదిబా యేసుప్రబు సిసూ. గ్రీకు బాసాదు దన్ని పేరు దొర్క. దొర్క ఇహిఙ డుపి ఇజి అర్దం. అది ఎసెఙ్‌బా నెగ్గి పణి కిజి మహాద్‌. సిల్లి వరిఙ్ ‌సాయం కిజి మహాద్‌. 37 గాని అది అయావలె ఉండ్రి కస్టం అస్తాదె సాతాద్. వారు పీనుగుదిఙ్‌ ఏరు వడిఃస్తారె మేడః ముస్కు మన్ని గదిదు తెర్‌ప్తార్. 38 లుద పట్నం యోప పట్నం డగ్రు మహాద్‌. పేతురు అబ్బె మనాన్‌ ఇజి యోపాదు మన్ని సిసూర్‌ వెహారె రిఎర్‌ మణిసిరిఙ్ ‌పోక్సి, “దయ కిజి వెటనె రఅ”, ఇజి కబ్రు పోక్తార్. 39 పేతురు నిఙితండ్రె వరివెట యోపాదు సొహాన్‌. వారు వన్నిఙ్ ‌మేడఃగది లొఇ ఒతార్. అబ్బె ముండ మణిసిక్‌ అడఃబాజి, దొర్క వరివెట మహివలె గుతిస్తి సొక్కెఙ్ ‌పాతెఙ్ ‌తోరిసి వన్ని సురుల నిహె.

40 పేతురు విజేరిఙ్‌ వెల్లి పోక్తాండ్రె ముణుకుఙ్‌ ఊర్‌జి పార్దనం కిత్తాన్‌. పీనుగుదిఙ్ ‌సుడ్ఃజి, “తబిత, నిఙ్‌అ” ఇహాన్‌. అయావలె అది బేస్తాదె పేతురుఙ్‌ సుడ్ఃజి నిఙిత బస్తాద్. 41 పేతురు దన్నిఙ్‌ కిక్కాఙ్ ‌అస్తాండ్రె నిక్తాన్. నమ్మితి వరిఙ్, ముండ మణిసికాఙ్‌ కూక్సి అది బత్కిత్తాద్‌ ఇజి వరిఙ్‌ ఒపజెప్తాన్. 42 యాక యోపాదు మనికార్‌ విజేరె నెస్తారె నండొండార్ ‌యేసుప్రబు ముస్కు నమకం ఇట్తార్. 43 పేతురు యోపాదు సీమోను ఇని ఒరెన్‌ తోల్కు పొర్ని వన్ని‌బాన్ ‌యోప పట్నమ్‌దు నండొ దినమ్‌కు బత్కితాన్.