1 పెంతెకొస్తు ఇని పండొయ్‌ నాండిఙ్ ‌యేసుఙ్‌ నమ్మితికార్ విజేరెకూడ్ఃజి ఉండ్రి ఇండ్రొ మహార్‌. 2 వెటనె ఆగాసమ్‌దాన్ ‌ఉండ్రి జాటు వాతాద్. అయ జాటు, పెరి గాలి వానివజ జాటుదాన్ ‌వాతాదె వారు బస్తిమహి ఇండ్రొ నిండ్రితాద్.

3 వారు సుడ్ఃతిఙ్‌ సిసుబొద్దు లెకెండ్‌ తోర్నిక ఉండ్రి వాతాదె ఒరెన్‌ ఒరెన్‌ ముస్కు ఉండ్రె ఉండ్రె కొనెఙ్ ‌డిఃగితె. 4 విజేరె ముస్కు దేవుణు ఆత్మ సత్తు వాతిఙ్‌ వారు, వరిఙ్ ‌నెస్‌ఇ బాసెఙ్‌ వర్గిదెఙ్‌ మొదొల్‌స్తార్. దేవుణు ఆత్మనె నెస్‌ఇ బాస వర్గిదెఙ్‌ వరిఙ్‌ సత్తు సిత్తాన్‌.

5 అయావలె విజు దేసమ్‌కాణిఙ్ ‌వాతిమహి బక్తిమన్ని యూదురు యెరూసలేం పట్నమ్‌దు మహార్‌. 6 యూదురు మంద లోకుర్ యా జాటు వాతిబాన్ కూడిఃతార్. వారు వర్‌గినిక వీరు వ‍న్ని వన్ని సొంత బాసెఙాణిఙ్ వెహారె యా కూడ్ఃజి వాతి మహి యూదురు బమ్మ ఆతార్. “వీరు మాటు వర్గిని బాసెఙ్ వ‍ర్‌గిజినార్‌ కొటె”, ఇజి వెహ్తార్‌. 7 అయావలె వాతి మహికార్ విజేరె ఒదె బమ్మ ఆతారె ఒరెన్‌ వెట ఒరెన్‌ వెహ్తార్‌, “యాక ఎలాగ? వీరు విజేరె గలీలయాదికార్‌ ఆఏరా? 8 గాని మాపు పుట్తిమ‍హి నాహ్కణి ఆఇ ఆఇ బాసెఙ్‌‌ యా గలీలయాదికార్ ‌వర్గిజినార్. యాక మాపు వెంజినాప్. 9-11 పార్తియికు, మదియికు, ఎలామియుకు, మెసొపొతేమియ, యూదయ, కపదొకియ, పొంతు, ఆసియ, ప్రుగియ, పంపులియ, అయ్‌గుప్తు, కురేనె డగ్రు మన్ని లిబియ, రోమ దేసెమ్‌దాన్‌ కూల వాతికార్ (యూదురు, యూదమతం నమ్మితి యూదురు ఆఇకార్‌) క్రేతియురు, అరెబియురు, దేవుణు కిత్తి గొప్ప పణిఙ్‌ మాటు విజెటె పుట్తి బాసాదు వెహ్నిక వెంజినాట్‌. 12 ఒడిఃబిత్తిఙ మన్సు కూడ్ఃఏద్. యాక ఇనిక ఆనాద్‌లెనొ”, ఇజి వారు విజేరె పంబ్ర ఆతారె ఒరెన్‌ వెట ఒరెన్‌ వర్గితార్.

13 సెగొండార్‌ వీరు తియాఙ్ ద్రాక్స రసం ఉటారె సోస్త మనార్‌ ‌ఇజి వరిఙ్‌ సెకాల్‌ కిత్తార్‌.

14 అయావలె పదకొండు మణిసిర్‌ అపొస్తురు వెట మహి పేతురు నిఙితండ్రె అబ్బె కూడ్ఃజి వాతి లోకుర్‌ వెట డటం వెహ్తాన్‌, “యెరూసలేమ్‌దు బత్కిజిని మా ‍సొంత లోకుర్ ఆతి యూదయ లోకాండె, నాను వెహ్నిక నెగ్రెండ వెండ్రు. వీరు విరిఙ్ ‌నెస్‌ఇ బాసెఙ్‌ వర్గితిక మీరు వెహిదెర్. 15 మీరు ఒడిఃబిని లెకెండ్‌ వీరు సోస్తికార్‌ ఆఏర్. పొద్దు సోసి ఏలు అంబెలి వేడఃబా ఆఏద్‌.* 2:15 యూదురు పండొయ్‌ ‌వేడఃదు పెందాల్నె ఉణ్‌ఎర్. పార్దనం వీజితి వెనుక తొమ్మిది గంట వెనుకానె ఉణార్‌ 16 గాని దేవుణు మాటెఙ్‌ వెహ్తి యోవెల్ ప్రవక్త ముఙాలె వెహ్తికదె మీరు సుడ్ఃజినిదెర్.

17 యోవెల్‌ ప్రవక్త ఇనిక వెహ్తాన్‌‌ ఇహిఙ ఆకార్‌ దినమ్‌కాఙ్‌ ‌నాను ఇనిక కిన ఇజి దేవుణు వెహ్సినాన్. విజు లోకాఙ్‌ నా ఆత్మదిఙ్‌ సీన. మీ మరిసిర్, మీ గాడ్సిక్, ప్రవక్తరు లెకెండ్‌ దేవుణు మాటెఙ్‌ వర్‌గినార్‌లె. మీ దఙ్‌డెఃఙ్ ‌దేవుణు బాణిఙ్‌ వాని దర్సనమ్‌కు† 2:17 దర్సనమ్‌కు. దేవుణుబాణిఙ్‌ వాని మాటెఙ్‌ని బొమ్మెఙ్ ‌కలాదు సుడ్ఃతి లెకెండ్‌ తెలివి మహివలె సూణిక‍ సూణార్. మీ డొక్రార్‌బా దేవుణు బాణిఙ్‌ వాని కలెఙ్ ‌సూణార్‌లె. 18 అయ ఆకార్‌ దినమ్‌కాఙ్‌ ‌నా ముస్కు నమకం ఇడ్ఃతి పణి మణిసిరిఙ్‌బా విజేరిఙ్, అయ్‌లి కొడొఃకాఙ్, మొగ్గ కొడొఃకాఙ్‌ నా ఆత్మ సీనా. వారు విజేరె దేవుణు మాటెఙ్‌ వెహ్నార్‌లె. 19 ఆగాసం ముస్కు విజేరె సూణి వజ నాను గొప్ప బమ్మాతి పణిఙ్ ‌తోరిస్న. యా బూమి ముస్కు ఎయెర్‌బా తొఇ పణి నాను కిన. నల, సిసు, కర్నిగోయి బూమి ముస్కు వానెలె. 20 ప్రబు మర్‌జి వాని అయ గొప్ప బమ్మాని దినం వాని ముఙాల పొద్దు సీకటి ఆనాద్‌లె. నెల నల లెకెండ్‌ ఎరాఙ్ ‌ఆనాద్‌లె. 21 అయావలె ఎయెర్‌బా దేవుణు పేరు అసి వన్ని ముస్కు నమకం ఇట్తిఙ వరిఙ్‌ విజేరిఙ్, దేవుణు, తీర్‌పుదాన్‌ గెల్‌పిస్నాన్‌లె.

22 పేతురు మరి వెహ్తాన్‌, “ఇస్రాయేలు లోకాండె, నెగ్రెండ వెండ్రు. నజరేతు వాండ్రు ఆతి యేసు అతికారం దేవుణు బాణిఙ్‌ వాతిక ఇజి దేవుణు రుజుప్‌ కిత్తాన్. ఎలాగ ‌ఇహిఙ, యేసు వెట మీ లొఇ కిత్తి గొప్ప పణిఙాఙ్, ఎయెర్‌ కిదెఙ్‌ అట్‌ఇ బమ్మాతి పణిఙాణ్ ‌రుజుప్ ‌కిత్తాన్. యాక విజు మీరు నెసినిదెర్. 23 యా యేసుఙ్, ఒరెన్‌ మణిసి మీ డగ్రు ఒపజెప్తాన్. యా సఙతి దేవుణు ముందాల్నె నెస్తాన్. యాక దేవుణు ముందాల్నె ఏర్‌పాటు కిత్తి సఙతి. మీరు యేసుఙ్‌ సెఇవరి దర్పుదాన్‌ అస్తిదెరె సిలువ ముస్కు డెఃయ్‌జి సప్తిదెర్. 24 గాని దేవుణు యేసుఙ్‌ సావుదాన్‌ తప్రిసి బత్కిస్తాన్. నండొ మా‍లెఙ్ ఆజి సాతాన్‌ గాని దేవుణు వన్నిఙ్‌ సావుదు డిఃస్ఏతాన్. యేసుఙ్‌ ఎలాకాలం తొహ్సి ఇడ్ఃదెఙ్‌ ‌సావుదిఙ్ ‌అట్‌ఏండ ఆతాద్. 25 యేసు మాటెఙ్‌ దావీదురాజు ముందాల్నె ఈహు వెహ్తాన్‌ నాను దేవుణుదిఙ్‌ ‌ఎల్లకాలం నా డగ్రు సుడ్ఃజి మహ. దేవుణు నా ఉణెర్‌ ‌పడఃక మనాన్. అందెఙె నాను మన్సుదు మాలెఙ్ ఆఏ. 26 అందెఙె నా మన్సుదు నాను గొప్ప సర్ద ఆజిన. నాను సర్ద ఆజి వర్గిజిన. నాను నా ఒడొఃల్‌ దేవుణుదిఙ్‌ ఒపజెప్న. ఎందనిఙ్‌ ‌ఇహిఙ ఒడొఃల్‌ సాతి వెనుక మరి బత్కిన ఇజి నాను నెసిన. 27 ఎందనిఙ్‌ ఇహిఙ నీను నా పాణమ్‌దిఙ్‌ డిఃస్‌ఇ. న‍మ్మిదెఙ్ తగ్నికాన్‌ ఆతి నీ సేవ కినివన్ని పీనుగు సబ్‌జి సొండ్రెఙ్‌ సరి సిఇ. 28 నీను నఙి ఎలాకాలం బత్కిని సరి తోరిస్తి. నీను నా వెట మహిఙ్‌ నాను గొప్ప సర్ద ఆజిన”.

29 “నా తంబెరిఙాండె, నాను దయ్‌రమ్‌దాన్‌ వెహ్సిన, మా అనిగొగొ ఆతి దావీదురాజు సాతండ్రె వన్నిఙ్‌ ముస్తార్. వన్నిఙ్ ముస్తి బాడ్డి ఎంబె మనాద్‌ ‌ఇజి ఏలుబా మాటు నెసినాట్. 30 గాని దావీదురాజు దేవుణు ప్రవక్త. దేవుణు వన్ని పేరు అసి వాండ్రె దావీదురాజు వెట ఒట్టు పొక్తాన్. అక్క ఇనిక ఇహిఙ, దావీదురాజు కుటుమ్‌దాన్‌ ఒరెన్‌ వన్నిఙ్ ‌దావీదురాజు లెకెండ్ ‌రాజు కిన ఇజి. యాక దావీదురాజు నెస్త మహాన్‌. 31 దేవుణు యేసుక్రీస్తుఙ్‌ సాతి వరి బాణిఙ్‌ డిఃస్‌ఏన్‌ ఇజి, యేసుక్రీస్తు పీనుగు సబ్‌జి సొన్‌ఏద్‌ ఇజి దావీదురాజు ముందాల్నె నెస్తాన్. ముందాల్నె నెస్తాండ్రె, యేసు సాతి వెనుక మరి మర్‌జి నిఙ్‌నాన్‌లె ఇజి ముందాల్నె దావీదురాజు వెహ్తాన్‌. 32 యా యేసుఙ్‌ దేవుణు మర్‌జి బత్కిస్తాన్. దన్నిఙ్‌ మాపు విజెపె సాసిర్. 33 అహిఙ దేవుణు యేసుఙ్‌ వన్ని ఉణెర్‌ పడఃకాద్‌ ‌బస్‌పిసి వన్నిఙ్ ఇంక మిస్తి గవ్‌రం ఏలు సిత్తాన్‌. దేవుణు సీనా ఇజి ఒట్టు కిత్తి వన్ని ఆత్మ యేసుఙ్‌ సిత్తాన్‌. ఏలు మీరు సుడ్ఃజినికెఙ్‌ వెంజినికెఙ్ ‌యేసు మ‍ఙి సీనా ఇజి వెహ్తి దేవుణు ఆత్మనె. 34-35 దావీదురాజు వెహ్తిక వన్ని వందిఙె ఆఏద్‌. దావీదురాజు పరలోకమ్‌దు సొన్‌ఏన్. గాని వాండ్రు ఈహు వెహ్తాన్‌, నాను నిఙి ప‍డ్ఃఇ వ‍రిఙ్ నీ పాదమ్‌కాఙ్ ‌ముణుకుఙ్ ‌ఊర్‌జి మాడిఃస్‌పిస్నిదాక నీను నా ఉణెర్‌ పడఃకాదు బసి మన్‌అ ఇజి దేవుణు నా ప్రబు వెట వెహ్తాన్‌.

36 పేతురు మరి వెహ్తాన్‌, “ఇస్రాయేలు కుటుమ్‌దికార్‌ ఆతి మాటు విజెటె యాక అనుమానం సిల్లెండ నెస్తెఙ్‌ వలె. మీరు సిలువాద్ ‌సప్తి యేసుఙ్‌ దేవుణు ప్రబువజ, క్రీస్తువజ ఏర్‌పాటు కిత్తాన్”. 37 యాక వెహారె లోకుర్ ‌వరి మన్సుదు నండొ బాద ఆజి పేతురుఙ్‌ మరి అపొస్తురుఙ్‌ వెన్‌బాతార్, “దాదారండె, ఏలు మాపు ఇనిక కిదెఙ్‌ అట్నాప్?”. 38 అయావలె పేతురు వెహ్తాన్‌, “మీ పాపమ్‌కు విజు ఒప్పుకొడ్ఃజి డిఃసిసీజి, దేవుణుదిఙ్‌ లొఙిజినాప్ ‌ఇజి విజెరిఙ్‌ ‌తోరిస్తెఙ్‌ యేసు, క్రీస్తు ఇజి, వాండ్రు, మీ ప్రబు ఇజి తోరిస్తెఙ్‌ బాప్తిసం లాగె ఆదు. అయావలె మీ పాపమ్‌కు నొరె ఆనె. దేవుణు సీనా ఇజి ఒట్టు కిత్తి దేవుణు ఆత్మ నిఙి దొహ్‌క్నాద్‌లె.

39 దేవుణు సీనా ఇజి ఒట్టు కిత్తి యా దేవుణు ఆత్మ మిఙి, మీ కొడొఃరిఙ్, దూరమ్‌ది వరిఙ్ విజెరిఙ్‌ ‌దేవుణు సీనాన్. వన్ని ముస్కు నమ్మిదెఙ్‌ ‌దేవుణు కూక్ని వరిఙ్‌ విజెరిఙ్‌ ‌దేవుణు ఆత్మ సీనాన్”. 40 మరి నండొ నండొ మాటెఙాణ్‌ పేతురు వరిఙ్ ‌గటిఙ వెహ్తాన్‌. దేవుణుదిఙ్‌ డిఃసి సొని యా సెఇ లోకాఙ్‌ వాని తీర్‌పుదాన్ ‌మీరు గెల్సి సొండ్రెఙ్‌ ఇజి పేతురు వరిఙ్‌ మరి మరి వెహ్తాన్‌. 41 పేతురు వెహ్తి మాటెఙ్‌ నమ్మితికార్‌ బాప్తిసం లాగె ఆతార్. అయా రోజు రమరమి మూండ్రి వేలు లోకుర్‌ యేసుఙ్‌ నమ్మిత్తి వరివెట కూడిఃతార్.

42 వారు అపొస్తురు నెస్‌పిస్తి మాటెఙ్‌ డిఃస్‌ఏండ మహార్‌. వారు యేసుఙ్‌ నమ్మిత్తికార్‌ కూడ్ఃజి మంజిని బాన్ డిఃస్ఏండ కూడ్ఃజి వాతారె ప్రబు ఏర్‌పాటు కిత్తి బోజనం ‡ 2:42 యేసుప్రబు సావు వందిఙ్ గుర్తు కిదెఙ్ మన్ని బోజనంకిజి మ‍హార్. డిఃస్‌ఏండ పార్దనం కిజి మహార్‌. 43 అపొస్తురు దేవుణు సత్తుదాన్‌ నండొ బమ్మాని పణిఙ్ బమ్మాని గుర్తుఙ్‌ ‌కిత్తార్‌. అయావలె విజేరె నండొ బమ్మ ఆతార్. 44 యేసుఙ్‌ ‌నమ్మితికార్ విజేరె ఉండ్రె మన్సు మంజి వరిఙ్‌ కల్గితి మహిక‍ విజు విజేరి వందిఙ్ ‌కర్సు కిత్తార్‌. 45 అక్కాదె ఆఏండ వారు వరి ఆస్తిఙ్‌ పొర్సి ఎయెఙ్ ‌ఎయెఙ్‌ అవ్‌సరం మనాదొ వరిఙ్ ‌సిత్తార్. 46 రోజు తప్‌ఏండ వారు యెరూసలేమ్‌దు మన్ని దేవుణు గుడిఃది డేవాదు కూడ్ఃజి వాజి మహార్‌. వారు విజేరె ఇల్లుదిఙ్ తప్‌ఏండ కూడ్ఃజి వాతారె సర్ద ఆజి బోజనం కిజి మ‍హార్. ఎయెఙ్‌బా అవ్‌సరం మ‍న్ని వ‍రిఙ్ వారు సర్దదాన్‌ ‌సీజి మహార్‌. 47 వారు దేవుణుదిఙ్‌ ‌స్తుతి కిజి మహార్‌. బాన్‌ మహికార్‌ విజేరె యా యేసుఙ్‌ ‌నమ్మిత్తి వరి వందిఙ్ ‘వీరు ఎసొనొ నెగ్గికార్‌’ ఇజి వెహ్తార్‌. రోజురోజు ‌యేసుప్రబు ముస్కు నమకం ఇడ్ఃతి వరి లెక్క వాండ్రు నండొ కిత్తాన్‌.