1 Ma e humalia behee ma ga danggee adu gi di Goe, meenei Dimaadua,

ge daahili e hagalaamua do ingoo, go di God di Gowaa Aamua,

2 gei e hagadele di hai o do aloho dee modu i nia luada huogodoo,

mo do manawa dahi i nia boo huogodoo,

3 ngaadahi mo nia lee o nia uga o nia mee hai daahili, mo di lee o di ‘harp’.

4 Meenei Dimaadua, au hegau maaloo dangihi guu hai au gi tenetene.

Idimaa go au mee ala ne hai, au e daahili tenetene.

5 Meenei Dimaadua, au mee ala ne hai le e humalia huoloo!

Au mee ala e hagamaanadu Kooe le e donu ngadaa ginai gimaadou!

6 Deenei di mee a digau dadaulia e deemee di iloo ai,

ge digau ala e de kabemee e deemee di modongoohia, dela boloo:

7 Digau huaidu le e mee di tomo be nia geinga,

ge digau ala e hai nadau mee hala le e mee di maluagina,

malaa digaula e daaligi gi daha,

8 idimaa Kooe, meenei Dimaadua, dela di tagi aamua ga hana hua dono hagaodi ai.

9 Meenei Dimaadua, gimaadou e iloo bolo o hagadaumee la gaa mmade,

gei digau huaidu huogodoo la ga magedaa.

10 Goe guu hai au gi maaloo gadoo be di kau llamu dauwa.

Goe gu haga humalia au gi di tenetene damanaiee.

11 Au gu gidee di hagamagedaa o ogu hagadaumee,

gei gu longono eau nia tangitangi o digau ala ne hai di huaidu mai gi di au.

12 Digau ala e haihai nia mee donu la gaa tomo hagadubuagina gadoo be nia niu.

Digaula gaa tomo gadoo be nia laagau ‘cedar’ o Lebanon.

13 Digaula e hai gadoo be nia laagau e dogi i lodo di hale a Dimaadua,

e tomo hagadubuagina i lodo di Hale Daumaha o tadau God.

14 Digaula gu mmaadua ge huwa daulogo hua igolo,

gei e tomo halatee i nia madagoaa huogodoo be nia laagau hoou dogo tomo aga.

15 Deenei le e hagamodongoohia bolo Dimaadua le e donu,

deai di mee e hala i baahi dogu Hagaloohi ai.