1 Falasia vayaene Satiusi vayaene Yisasina meye-vataga hisayafe mage huya me hae “Kagaya ikapinagati tokiya avame yana hugeta agamano.” huya hae. 2 Hageno Yisasia mage huno hie “Unena tamakaya mage nehae ‘Ikamoa haesa hianagino ega kanale yage falote hugahie.’ hutama nehae. 3 Natepiti hetitama mage nehae siamoa okomaage huno ikamoa ai-haesa hianagino ‘Menia yasimoene komoene falote hugahie.’ hutama nehae. Tamage tamakaya ikana neagetama ‘Naa hugahie.’ hutama fako nehayanagi meni kanafima falote hia yana age-lama hutama noagae. 4 Tamakaya meni kanafima mainaya veamogatama tusiya hutama kefo veane mainae. Anumaya Kotina tamakaveno hu-neataya veane mainae. Tamakaya ‘Tokiya avame yana hugeta agamano.’ hutama nagaifena hayanagi nagaya nago avame yana ohugahuanagi Yonama hu-tenea tokiya avame yamaage tamave-ligahie.” huno huteno Yisasia amataleno umaine.

5 Yisasienema tokaeya nemaiya anagamoya tikotuna lakaeya vayana amake-kaniya nagoa maya oaliya umainae. 6 Oaliya vageno Yisasia mage huno hama-paiye “Tamakaya Falasia vayamoyaene Satiusi vayamoyaene amakupi hanea yana age-lama ohuya amavayaleti havigema nehaya yana kai hame hale-negia avamete huno halegino alakefa hisia yafena kaye ho.” huno hie. 7 Higeya ani vayamoya amakaiami huge havige huya mage hae “Tagaya maya oalita emainona yafe nehie.” huya amakaiami hae. 8 Hayanagi Yisasia ani vayamoya haya kea ago haviteno amakaife mage hie “Naa higetama ‘Kavetia alita omenone.’ hutama tamakaitamia huge havige nehae. Tamakaya nagaifena osi kanoa havitama tamakupi maletama tamametitia hu-mainae. 9 Tamakesa omalegetama havilama nohao? Faefua (5) mayama faefu tausenia (5,000) vemoya ne-mainaya yafena tamakesa nohavio? Netagetama namagi kupi atalaya maya atupayaga ai-mainone hutama nohavio? 10 Tamakaya sevenia (7) maya kanoa fo tausenia (4,000) vemoya netagetama namagi kupi aitama havate-mainone hutama tamakesa nohavio? 11 Nagaya mayahena tamaha-opainogi. Naa higetama ohavinae? Tamakaya Falasia vayaene Satiusi vayaene amakusafinaga hanea yana agelama ohuneya amavayaleti havigema nehaya yana kai hamemo hale-negia avamete huno halegino alakefa hia yafena kaye ho.” huno hu-maine. 12 Mani kema higeya haviyana Yisasia afaa “Kai hame maya hale-negia yafe tamaugafa kaye ho.” huno ohunegi agaya “Falasia vayaene Satiusi vayamoya nehaya kehe kaye ho.” huno hu-maine.

13 Yisasia Sisalia Filipai kaiyaga uvayi huno agaiaenema tokaeya nemaiya anagafe mage huno hama-vige “Veamoya nagaifena, ikapinagati emainoa kanoa vayamo natenea kanomonihena tae huya nehae?” huno hama-vige. 14 Hamavi-gegeya kenonaa mage huya hae “Nagoa vayamoya kagaifena Yonie, ti fale-neamatea kano, maine huya hageya nagoa veamoya kagaifena Ilaiya maine huya hageya nagoa veamoya Yelemaiya maine huya hageya nagoa veamoya nayo Anumaya Koti aune kanoa fali-mainea kano maine huya nehae.” huya hapai-mainae. 15 Hapaigeno Yisasia amakaifena mage huno hama-vige “Tamakaya nagaifena tae hutama nehae?” huno hamavi-ge. 16 Hamavi-gegeno Saimoni Pitaa mage huno hie “Kagaya Kalaisigae, Anumaya Kotima taugafa ali-gatigahe hu-ga-tenea kano mainane. Haimuaene mainea Anumaya Koti neamoga mainane.” huno hie. 17 Higeno Yisasia Pitafena mage huno hapaiye “Saimonigae, Yona nafanemoga, mani kea hanafe Anumaya Kotia muse hisana yana kamine. Nagola ma mopafi kanomoa ani yana kaveotinegi ikapinaga mainea Nenafa kave-li-maine. 18 Nagaya kaha-nepauve kagaya Pitagae ani kagimo aepaa yafamogae. Kagaya yafa kana nehananagina nagaya mukia amakua naminaya veala mani yafamo agupile no kana huna ki-malenesugeya vayama hamae-nefalisaya tokiyaamia anima ki-malesua nona alino haviya ohugahie. 19 Nagaya Anumaya Kotima kava yagai-mainea kumama yakisana ki nofila kamigahue. Kagaya ma mopafi maineka ‘Ma yana atafa hutama tokiya vaiho.’ huka hisanana Anumaya Kotia agaienena ikapinaga ‘Ani yana atafa hu-liho.’ huno hugahie. Kagaya ma mopafi nago yafema ‘Afaa ataleho.’ hukama hisanana Anumaya Kotia agaienena ikapinaga ania hugahie.” huno hie. 20 Yisasia agaiaenema tokaeya nemaiya anagafe tokiyaage ke huno mage hie “Tamakaya nagoa veala nagaifena ‘Kalaisie, Anumaya Kotima taugafa aligatigahe hutenea kanoa ma maine.’ hutama hama-opaiho.” huno hu-maine.

21 Ani yupa Yisasia agaiaenema tokaeya nemaiya anagafena haenagama falote hisia yamofe aepa heno amave-li-maine. Mage huno hie “Nagaya Yelusalemu visugeya ala vayaene mono note kava vayaene kahegi kema havilinaya anagaene tusia nagata aisia kava hu-nateteya nahaesagena faligahue. Falisugeya komufi he-vai-natesagena tole yupa maina tagufa kanale fali-mainesufitila hetigahue.” huno hu-maine. 22 Higeno Pitaa Yisasina faitega avaleno moteneno aepa heno Yisasife mage hie “Anumaya Kotia ani kavala ohisaya amaku amakesa amamisie. Anumayanimogae kagaila ani kavala hu-okatesae.” huno hie. 23 Higeno Yisasia mai-yahae huno Pitafena mage huno hie “Satanigae mai halenato kagaya nagai nagua ali haviya hugahe nehanagi kagaya Anumaya Koti havimainea aguagesa kanaleya huka nohavinagi vayamoya kaha-paiya amaku amakesa nehavine.” huno hie.

24 Yisasia agaiaenema tokaeya nemaiya anagafena mage huno hama-paiye “Nagoa veamoya nagai nakavema visaya amakesa havinuyahena amaugafama aliya hai yana amakaveno hu-teteya nagaima nagata aisigena falisua kava hisaya amakesa haviteya yafaga yosa kofiya nakave aliya visae. 25 Nagoa veamoya maiyaamima atafa huya ali-talakoma hu-lisayana maiyaamimoa falino afaya hapaegahigi nagoa veamoya nagaifema hamainageya maiyaamima atalesaya veamoya maiyaamia ali-gatisugeya agola aliya maigahae. 26 Nagoa veamoya mukia ma mopafi mone afenoyayaga aliteya maineya falisayana agola maige maige hisaya haimula ago atalenayanagiya ali-mainaya mone afenoamimoa hanaa huno amaya hugahie? Aao amaya ohugahie. 27 Nagaya ikapinagati emainoa kanoa vayamo natenea kanomonia Nenafaa tokiya hale yamaaene Anumaya Kotina ensole vayaamoyaene etena esua kanafina mukia veamoya ma mopalema hu-mainesaya yateti anonaa amamigahue. 28 Tamage-lafa huna tamaha-nepauve nagoa veala malema hetiya mainaya veala aupaa ofaligahayanagiya hagoteya nagaya ikapinagati emainoa kanoa vayamo natenea kanomonina Anumaya Kotia kava yagai-mainea yapi mainena esugeya nagegahae.” huno hu-maine.