1 A kum tistising, mot in tur dekdek una Labino, lenutra a sa inanos tar mot nami. A nem doko mot, ma a nem doko i sur an tama mot, uni mot anung a gasgas ma mot elar nama ikul una nung a pinapam.

2 A saring mur o Ewodia ma o Sintike sur in takai kut a nuknukimur, uni mur anun a Labino. 3 Ma ui kai ara lingmulus na tene pinapam tomo nam iau, a saring ui sur un warut aru ino ri, uni der papam dekdek tomo nam iau sur a Wakak na Wasiso in nan sarara. Met papam tomo nam o Klemen, ma ara taro kai ra a kum risandet i sa kis una buk na nilaun.

4 Mot in ser gas una Labino una kum bungbung rop. Ma an watung meleti lena, mot in gasgas. 5 Mot in ese puaso anumot a wowowon na petutna torom a taro rop. Milau mukut a Labino in nanpat. 6 Gong mot nuknuk mongmongoro sur tu utna. Una kum utna rop, mot in wararing nama niaring na watung wakak torom o God. Ma mot in inanosi una numot a kum nemnem. 7 Ra a malmal anun o God ra i labo sakit tana mananos rop anun a taro, in tamtamabat a balamot ma a nuknukimot, uni mot anun o Karisito Iesu.

8 A kum tistising, a ururop na wasiso ri a tumusi torom mot: A nuknukimot in kis una kum utna ri: asau ra i lingmulus, asau ra di urur uni, asau ra i tokodos, asau ra katu dur uni, asau ra i tamtama wakak ma asau ra a taro det watungi lena i wakak. Ra tu utna in wakak sakit, o ra tu utna di watung ulabo pasi, a nuknukimot in kis uni. 9 Asau ra mot sa ususer pasi gusun iau, o mot sa rakon pasi, o mot sa longoro tari gusun iau, o mot sa tama tari un iau, mot in muri. Ra o God a tene malmal in kis tomo nam mot.

10 A gas doko una Labino, uni uniri, mot sa nuk melet iau. I sa suano i ra ka mot warut iau, ikut, a lingmulus, ka mot dumano iau, ikut katu kisapi sur mot in warut iau. 11 Ka watungi lenri, uni a sibo, awu. Uni a sa ulason pas iau una balano molmol, una kum sau ra an etoromi. 12 A sa tasman a kinkinis na sibo, ma a sa tasmani utkai a kinkinis nama susut na utna. A sa lason sur an balano molmol una a kum ngas na kinkinis ra an etoromi: ra an masur, o an murak, ra a utna in susut tang, o an sibo. 13 A pet lar pas a kum utna rop kibino una Karisito ra i udekdek iau.

14 Ikut i wakak ra mot tur tomo nam iau una kum mamaut ra a taramo i. 15 Mot a taro Pilipai, mot tasmani ut ra a warawai nama Wakak na Wasiso tiro una papor Masedonia ra mot nukpukus. Numur a wan tagitiro o Masedonia, ma kalako taro na lotu det tur tomo nam iau sur det in warut iau nam tu etabor, awu, mot sot kut. 16 Ra a kis tong o Tesalonaika, ausur mot tabor iau ara dino kut, a susut na dino ut mot tabor iau ra a sibo. 17 Ausur anumot a etabor ra a ling suri. A nemi kut sur mot in los a ikul kura numur una numot a wakak na pinapam ra. 18 A sa los pas a kum utna rop ra mot tula i. I labo sakit, ma i labo taun anung a sibo. Ka sibo mo sur tu utna, uni a kum utna ra mot tula i, a sa los pasi tan o Epaproditus. I elar nama etabor torom o God, ra i sangnain wakak, ra o God i gas nami, ma i tokodos toromi. 19 A God anungi in pam sot a kum utna rop ra mot sibo suri, tagun anun a kum wakak na ululeng ra anundati, kibino una Karisito Iesu. 20 Dat in ulabo pas anundat a God a Tamandat, ken rop ma ken rop. Amen.

21 Mot in pitar anung a marmaris torom a taro rop anun o Karisito Iesu. A kum tistising una nurnur ra det kis tomo nam iau, det pitar anundet a marmaris torom mot. 22 A taro anun o God, det rop, det pitar anundet a marmaris torom mot, ma a taro kai anun o God, ra det kis una rumu anun a Sisa, det pitar anundet a marmaris torom mot.

23 A marmaris anun a Labino o Iesu Karisito in kis una niomot. Amen.