A Mantul na Pas
anun
o Jon
A wasiso talapor mugu
A pas ri o Jon i tumusi. I tumusi torom ara tene nurnur a risano o Gaius. I watung wakak toromi uni i warut a kum tene pinapam ra det wan nama Wakak na Wasiso. I wasiso kai un ara musano a risano o Diotrepes, ra anun a petutna ke wakak.
A inawan ina Mantul na Pas anun o Jon:
A turturkibin ina buk ri (1-4)
O Jon i gas un o Gaius (5-8)
A petutna anun o Diotrepes ke wakak (9-10)
A petutna anun o Dimitrius i wakak (11-12)
A tintinip na wasiso (13-15)
1
1 Iau, o Jon, a mugumugu, a tumtumus torom ui, o pasang o Gaius, ra a nem mulus ui.
2 Pasang, a wararing un ui, sur anum a wakak na nilaun ma anum a wakak na kinkinis, elar nam a niom ra i laun wakak. 3 A gas doko ra aramano kum tistisindat det wanpat, ma det wasiso kapo un ui lena, u mur a lingmulus ino, ma anum a nilaun i elar nami. 4 Ra a longoro i lena a kum nutnutung, anundet a nilaun i mur a lingmulus ino, a gas doko, ma katu utna melet mo ra in ulabo anung a gasgas.
A warut torom a kum tistisindat ra det wan nama Wakak na Wasiso
5 Pasang, u lingmulus una pinapam ra u pami torom a kum tistisindat, ra det usiro pat torom ui. 6 Ma ara taro tagun det, det wanpat nin, det wasiso kapo torom a taro na lotu una num a marmaris. I wakak ra un warut det nam lako kum utna una nundet a inawan. A petutna ra, o God i gas uni. 7 Det wan nama risan o Karisito, ra ka det los tu warut tan a taro ra ka det nurnur. 8 Lenra, i wakak sur dat in warut a ngas na taro ra, sur dat in papam tomo nam det sur a lingmulus ino in nan sarara.
A nilaun anun o Diotrepes ma o Dimitrius
9 A sa tumus tar a pas torom a taro na lotu una num a tamon, ikut o Diotrepes i ra i nem doko i sur in mugumugu anumot, ke ser longoro met. 10 Ra an nanpat, an inanos mot una kum petutna ra i pampami, a kum sakino wasiso eno i sa watung tari un met. Ma ausur i kut ra, i kai ri, ke ser gas pas a kum tistisindat ra det wanpat nam a Wakak na Wasiso, ma i turbat det ra det nem na gas pas det. Ra taio i nem na gas pas det, o Diotrepes in umana ru i gusun a lotu.
11 Pasang, gong u tamtama ususer una sakino petutna, un muri kut a wakak ino. Osi ra i pam a wakak ino, i anun o God, ma osi ra i pam a sakino, ke tasman o God.
12 A taro rop det watungi un o Dimitrius, lena i ara wakak na musano, ma a lingmulus ino kai i wasiso talapor uni. Met kai met wasiso talapor uni, ma u tasmani lena anumet a kum wasiso i lingmulus.
A ururop na wasiso
13 A susut na utna ra an tumusi torom ui, ikut ka nemi sur an tumtumus torom ui nam in nepen. 14 Ikut a nuki lena milau dar in tamtama tomo, sur dar ut dar in wasiso.
15 A malmal torom ui. A kum paspasam taginin, det pitar anundet a marmaris torom ui. Ra ui kai un pitar anung a marmaris torom a kum paspasandar rop ra det kis tiro iai.