9
God Noa mampe sauawa itun
1 Tane God Noa ita obampa do osouwo sau euda itune wanase, “E tawo ema osowe otootoitane uaraitane e os uduuduitana.✡ Bumpai 1.28 2 Ne pue debamau ita kerakera uduudu da tetelala, nene ita do esa bedewe wanwanlala uduudu dewamopo e saantompa ita do onioniau apanawa wanaite oniamona mukawa eneedina. 3 Moia inawaau ema uduudu waimoia ipa e nanaa. Mapo nana uduudu inilala eneena rua.
4 Tane ne anaanaedina e moia osina do mai naa ipawa ina osina bedewe winede.✡ Liwai 17.10-14
5 Ne osina anaanawa badowa itudina, naita pue apana adepio osinapa nosepituapio bolepia ne pue sa ando matangelasapa. Tane apana enepie sowa bosapia sipoa ne apana sa matangelasapa. 6 Ipawa God inainamba rua apana dewasan. Sa baiwa apana mida soa bosapia apana sa do bosapu.✡ Ekisod 20.13; Bumpai 1.26
7 Ita e obana do otootoitane tawo osowe uaraitane e os uduuduitana.✡ Bumpai 1.28
8 Ita God osowe Noa ita me obampa do mampo wanase, 9 Asisuitana! Ande ne sauana badowa itudina e ita e bedeawoa muntompa mampo 10 ita pue inawaa uduudu, nene daitada do pue duwa wanwanlala ita pue dobinoa e do waa bedewee nolena ita ando muntompe waimompa do manlawo itudina. 11 Ne sauana badowa itudina e manlawo, ne mai osowe abaia wapaaubepo nitu uduudu inawaa tawo osowe waimoia ita do tawo kadimopi, dia.
12 Ita God wanase, Ne sauana eueuwa itudina e ita ne sawanambo ita nitu uduudu inawaa e do wainilana manalawo. Ita do apana ando muntompa do mampo sauantedina. 13 Ne sauana badowa eueuwa wari giou bedewe itupa ne ita nitu uduudu inawaa waimoia sawanambo. 14 Ne walama isiwa tawo osowe giou dewasapino odompa ita giou sa bedewe wari segalempa. 15 Ita ne sauana ema nuaituneampa, e ita ne, do nitu uduudu wanwanlala daitada sawanambo. Abaia mai osowe nosepie nitu uduudu inawaa waimoia kadimopi, dia. 16 Tane wari giou bedewe segalempo ewape ne sauana winakasala God ita nitu uduudu tawo osowe inawaa wanwanlala sawanambo winedia insepa. 17 Sa baiwa God Noa diene wanase, Ema ipa ne sauana eueuwa ne ita nitu uduudu inawaa tawo osowe wanwanlala do sawanambo itudina.”
Noa obampa
18 Tane Noa obampa do waa bedewe waimoie nomoiena ipa: Sem, Iapet ita Am. Ita Am me ipa bola Kanaan apanawa mambu. 19 Apana ema natadea ipa Noa obampa mo bedeuwoe apana muntone uarantone tawo uduudu bedewe alentuwan.
20 Tane Noa me ipa irai dewalala me wain iraiwa aina apanawa. 21 Ita Noa wain wadene nane ua koakoaleno nikoakoa ape bedewe ituleidie. 22 Tane bola Kanaan apanawa mambu Am mamba Noa nikoakoa ituleidio ewene nosene alene sosowa benemamon. 23 Ita Sem Iapet nata epe etane gara debama wadane awanapu osowe epanadoe adiwoadiwo antone mambu rupusaiena ita mambu mai ewapona emau nambesane ene anton.
24-25 Tane Noa ua koakoalena dialeno enenwisene me otopa ompa ebowa Am dima me mampe dewasana umanawa etene saua kadiwa otopa sa Kanaanwa mambu osowe itune wanase,
“E ipa Sem ita Iapet nata nolau dewalala,
diapanaida segaita.”
26 No Iawe Sem Godiwa wadaposisata. Ita do sau euda otopa Sem osowe itune wanase,
“Iawe God sauwa euda e osoawo winepi
ita Kanaan apanawa e nolaa dewalala segantopu.”
27 Tane God sau euda Iapet osoawo itupie bolaa debamasapi,
ita do me Sem apewa ita nitu uduudu me mampea bopawa osowe waimpa.
Ita bola Kanaan apanawa mo nolau dewalala segalepi.
28 Tane abaia debama dialeno aupe Noa waina enawa 350 waden. 29 Noa waine odena enawa ita abaia dialeno waina awodealena enawa 950 wadeno ita me bolen.