1 Poli'na nagra, Anumzamo Agra'a avesite Kraisi Jisasi aposol eri'za vahere hu'nemo'na nerafu Sostenesi'ene.

2 Korinti kumate nemniza Anumzamofo mono nagamotarega, Kraisi Jisasi'ma tmazeri avusese hurmantegeta ruotge (saints) huta mani'naza nagatega nevuno, mika vahe kokankoka mni'ne'za, tagri Rantie hu'za agi nehaza vahetegane, zamagri ene tagri ene Jisas Kraisi'a Rantimofo kea kreneramune.

3 Nafati, Anumzantegati ene, Ranti Jisas Kraistintegati asunkuzane, rimpa fruzamo'a tamagritega vie.

4 Tamagrikura Anumzamofontega musenke huvava nehue, na'ankure Anumzamo'a asunkuzana, Kraisi Jisasimpi tami'ne. 5 Hanki Agripinti, keaga hu'zampine, antahintahizatamifina knare nehutma, maka'zampina eri avi'netaze. 6 Na'ankure Kraisinku'ma huama hu'na tamasmi'noazamo, tamagripina eritamage nese. 7 E'izanku maka Avamupi neramia musezampina atupa nosuta, Rantimo Jisas Kraisi'ma eama hanigu, tamagu'areti aveganentaze. 8 Hanavea tamisigeta refarera uhanatigahaze. Ana hanigetma Rantimofo Jisas Kraisi'ma esia kna zupa hazenke tamia omnegahie. 9 Anumzamo'a ke hunte'nere ana kemofo amage'ante Ne'mo, Agra'a Nemofo Jisas Kraisi Rantimo'ene trogoteta magopi manisunegu, tagia hu'ne.

10 Nenafugata hanaveti'na tamantahinegoe, Rantimofo Jisas Kraisi agifi miko'motma mago tamarimpa ohunte ahunte nehanageno amu'nontamifi atane'zana omneno. Ana hanutma fatgo hutma magoke antahi'zampine, tamagesa antahi'zampinena eri mago hugahaze. 11 Nafuhetane nasareheta, mago'a ke ha'ma amu'nontamifima me'nea zankura, Kloesi nagapinti mago'a vahe'mo'za eme nasmi'naze. 12 Nagra ama kegu nehue, tamagripinti mago'mo huno, Nagra Poli amage'nentoe higeno, mago'mo huno nagra Apolosi amage'nentoe higeno, rumo'a huno, nagra Sifas (Pita) amage'nentoe higeno, eteno rumo'a huno, nagra Kraisi amage'nentoe nehie. 13 Kraisti'a Agra ataneno refako hu'nefi? A'o anara osu'ne. Tamagritekura Poli keka zafarera fri'nefi? A'o anara osu'ne. Tamagra Poli agifi tina fre'nazafi? A'o anara osu'naze. 14 Nagra Anumzamofona muse huntoe, na'ankure mono tina magore hu'na tina freormante'noe. Hianagi Krispusine Gaiusikizni zanagrike fre znante'noe. 15 Ana hu'negu mago'mo'a huno Poli agifi mono tina fregante'noe huno osugahie. 16 Izo, nagra Stefanasi nompi nemaniza naga mono tina frezamante'noe. Ananteti e'neana mago'a vahera mono tina frezmante'nesuo antahinagekani'noe. 17 Ana hu'negu Kraisi'a mono ti frezamantogura huonante'ne. Hianagi knare musenke huama hanane huno hunante'ne. Hagi ama mopafi mreri antahi'zampinti, Kraisi'ma keka zafare fri'nea zamofo hanave'a eriotregahue.

18 Fnanema hanaza vahe'mo'za keka zafamofo nanekegura neginagi naneke hu'za nentahize. Hu'neanagi tagri'ma tagu'vazino tavre'nea vahe'mota, e'i Anumzamofo himamu'e huta nehune. 19 Ana hu'negu, korapa avontafe'ma krente'nefina anage hu'ne, knare antahi'zane vahe'mofo antahi'zana eri haviza nehu'na, antahi ankere vahe'mofo antahi'zana eri atregahue huno hu'ne. (Aisa 29:14)

20 Antahi'zane nera ina mani'ne? Avontafe'ma kre antahi'zane nera ina mani'ne? Ama knafi ke hafra hu nera ina mani'ne? Anumzamo ama mopafi antahi'zane vahera, antahintahi'zazmia zmazeri neginagi nehie. 21 Anumzamofo antahintahimo'a ama hu'negenokino, zmatrege'za ama mopafi vahe'mo'za zmagra'a antahi'zantetira Agrira antahi ama nosaze. Hianagi Anumzamo'a musema nehiana, vahe'mo'za neginagi naneke hu'za nehaza nanekema huama hunke'za zmentinti nehaza vahe zmahoneke. 22 Tmage, Jiu vahe'mo'za avame'za ketete hu'za antahinegazageno, Griki vahe'mo'za antahintahi'zanku nehakrazanagi, 23 tagra Kraisi rugeka zafare ahe'za hanti'naza naneke huama nehunazamo'a, Jiu vahe'mokizmia zmagigo zamino zmazeri tanafahu havegna nehuno, megi'a vahetera neginagi nanekegna nehie. 24 Hu'neanagi, ana Jiu vahe ene megi'a (Griki) vahetera, Anumzamo'ma zamagima hu'nea vahe'mo'za, Kraisi'a Anumzamofo hankavene, antahintahizama'e hu'za nehaze. 25 Na'ankure Anumzamofo neginagizane hu'za, nehaza zamo vahe'mofo antahintahizana agatenereno, Anumzamofo hanave'a omne'ne hazazamo'a vahe'mofo hanavea agatere'ne.

26 Nafuheta kma antahiho, inankna vahe mani'nageno tamagia hu'nefi vahe'mofo zamurera antahi'zane vahera omni'nazane, rama'amota hanave vahera omani'nonane, rama'amota zmagine nagapintira omni'nonanagi, 27 Anumzamo'a, mopafi vahe'mo'za antahintahizmi omane'ne nehu'za, kefenkami netraza vahepi erizana erino, knare antahintahine vahe mani'none haza vahera, Anumzamo'a zamazeri zamagaze nehuno, hanave'a omne'ne huza haza vahepi eri'zana erino, hanave vahere hu'za haza vahera zamagaze erinezmie. 28 Ana nehuno zmagi omnene huza ke fenkami atraza vahepi, Anumzamo'a huvazino zamagine hanave vahera zmazeri zamagaze nehie. 29 E'ina hu'negu mago'mo'a Anumzamofo avufina avufaga mareorigahie. 30 Hu'neanagi, Agrama eri'nea eri'zamo higeta, Krais Jisasimpi mani'naze. Kraisi'a Anumzamofontegati knare antahintahi zantia efore hu'neana, e'i fatgo avu'ava'zane, mani ruotge huno mani'zane, miza hurante Ne' mani'ne. 31 Ana hu'negu Anumzamofo avontafepina anage huno krente'ne, Avufga antemreriku hanimo'a, Ramofoma antahino keno hu'neazanku avufga antemrerigahie hu'ne. (Jer 9:23-24)