1 Ya꞉su eyo꞉ towo꞉ a꞉la꞉sio꞉, “Waina꞉ i hendeleyo꞉ no꞉no꞉n ne. A꞉la꞉ta꞉ga꞉ ni Dowo꞉ wain egelo꞉lo꞉ bo꞉fo꞉lowa꞉seno꞉ e. 2  Madi 3.10Dowa꞉yo꞉ no꞉no꞉n ele amilo꞉ folo꞉ mo꞉hedab a꞉no꞉ gegedelia꞉sa꞉ga꞉ dila꞉sen. A꞉la꞉ta꞉ga꞉ ele folo꞉ hedab a꞉no꞉ nafale doma꞉kiyo꞉, Dowa꞉yo꞉ ele a꞉no꞉ abol gegedela꞉sen ko꞉lo꞉, tif amio꞉ ele a꞉ma꞉yo꞉ fowo꞉ modo꞉ nolo꞉ helema꞉ib. 3 Ni to ko꞉lo꞉ gimo꞉lo꞉ wido꞉ a꞉ma꞉yo꞉ gio꞉ o꞉ma nafale go꞉go꞉do꞉ ta꞉fo꞉ ko꞉lo꞉lab. 4 A꞉la꞉fo꞉ko꞉lo꞉ gio꞉ neya kuda꞉bi. A꞉la꞉ta꞉ga꞉ nelo꞉ giya kuduma꞉no꞉. I eleyo꞉ gali alilab amio꞉, fowo꞉ mada mo꞉helema꞉ib. Ko꞉sega i eleyo꞉ i amio꞉ kudufo꞉lalega, fowo꞉ o꞉li helema꞉ib. A꞉la꞉do꞉ gan aumbo꞉ gio꞉ ne amio꞉ mo꞉kudufo꞉lalega, fowo꞉ mo꞉helema꞉ib.

5 “Waina꞉ i mo꞉wo꞉ no꞉no꞉n ne a꞉la꞉ta꞉ga꞉ ele a꞉no꞉ gi ko꞉lo꞉lab. Kaluka꞉isale abeyo꞉ neya kudaki, a꞉la꞉ta꞉ga꞉ ne eya kudalega, eyo꞉ fowo꞉ modo꞉ ko꞉lo꞉ helema꞉ib. Gio꞉ ne o꞉lia꞉yo꞉ alobanaga꞉ita꞉ga꞉ mo꞉ege dowalega, giliyo꞉ kelego꞉ imilise nowo꞉ mada mo꞉dimidama꞉ib. 6  Madi 7.19, 13.42Kaluka꞉isale abeyo꞉ ne amilo꞉ mo꞉kudufo꞉lab a꞉no꞉, i ele ko꞉lo꞉ sanditab amilo꞉ olali o꞉leaumbo꞉, eyo꞉lo꞉ sandifa꞉no꞉ ko꞉lo꞉ olalia꞉ib. Ele a꞉no꞉ kegenelia꞉ga꞉, deya gilima꞉ki sandita꞉sen. 7 Gio꞉ neya kudaki, to nilo꞉ wido꞉ a꞉no꞉ gi amio꞉ dowalega, go꞉no꞉ndo꞉ asulab a꞉no꞉ ko꞉lo꞉ dabu ba꞉dalikiyo꞉, gilo꞉ dabu ba꞉dab a꞉no꞉ko꞉ dimia꞉ib. 8  Madi 5.16Gio꞉ fowo꞉ modo꞉ hedab amio꞉, nilo꞉ tili wida꞉sen kalu hendele a꞉la꞉bo꞉ kalaba widaki gab ko꞉lo꞉, man a꞉na ilikiyo꞉ Dowo꞉ wi alano꞉ a꞉na dia꞉ib.

9 “Dowa꞉lo꞉ nemo꞉lo꞉ ha꞉fo꞉ disa꞉ o꞉leaumbo꞉, niyo꞉lo꞉ gio꞉ ha꞉fo꞉wo꞉ disa꞉fo꞉lo꞉l. A꞉la꞉fo꞉ko꞉lo꞉ gio꞉ nilo꞉ ha꞉fo꞉ disa꞉lan man us a꞉na dofo꞉lubi. 10  Yo꞉n 14.15, 1Yo꞉n 2.5Niyo꞉ Dowa꞉lo꞉ ele saefa꞉ a꞉no꞉ kudu ha꞉naki, ene ha꞉fo꞉ disa꞉lan man us amilo꞉ elen o꞉leaumbo꞉, giliyo꞉ nilo꞉ ele saefa꞉ a꞉no꞉ kudu ha꞉nalega, gio꞉ nilo꞉ ha꞉fo꞉ disa꞉lan man us a꞉nami doma꞉ib. 11 Sagalan nilo꞉wo꞉ gi amio꞉lo꞉ dowaki, sagalan gilo꞉ a꞉no꞉ ililima꞉kiyo꞉, to we gimo꞉wo꞉ a꞉na so꞉lo꞉l.

12  Yo꞉n 13.34“Ni ele difa꞉yo꞉ we. Niyo꞉ gimo꞉wo꞉ ha꞉fo꞉ disa꞉ o꞉leaumbo꞉, gio꞉ gegelebo꞉ ha꞉fo꞉wo꞉ a꞉la꞉ka disa꞉la꞉lubi. 13  Yo꞉n 10.11, 1Yo꞉n 3.16Kalu noma꞉yo꞉ ene miliyo꞉ asuwa꞉taki, mela꞉no꞉ enedo꞉ ko꞉ walalega, ha꞉fo꞉ disa꞉lan man a꞉ma꞉yo꞉, ha꞉fo꞉ disa꞉lan man nolo꞉ tininila꞉ ko꞉lo꞉lab. 14  Madi 12.50Giliyo꞉ nilo꞉ gimo꞉lo꞉ ele saefa꞉ a꞉no꞉ ko꞉lo꞉ kudu ha꞉nalega, gio꞉ no꞉no꞉n mili hendele ko꞉lo꞉lab. 15 Madali nanog dian kaluwo꞉ kalu alan enedo꞉ma꞉lo꞉ kelego꞉ dimidab a꞉no꞉ e mo꞉fanda asula꞉sen. Ko꞉sega Dowa꞉lo꞉ to nimo꞉lo꞉ sio꞉ a꞉no꞉ tambo niyo꞉ gimo꞉wo꞉ kalaba wido꞉. A꞉la꞉fo꞉ko꞉lo꞉ niyo꞉ gio꞉ ‘madali nanog dian kalu’ a꞉la꞉bo꞉ wa꞉kabiyo꞉ mada mo꞉so꞉lo꞉l. Niyo꞉ gio꞉ ‘mili’ a꞉la꞉so꞉lo꞉l. 16 Giliyo꞉ ne mo꞉da꞉feyo꞉ ko꞉sega, niyo꞉ gio꞉ da꞉fe alifa꞉. Gio꞉ ha꞉na꞉sa꞉ga꞉ nanogo꞉ diakiyo꞉, fowo꞉ modo꞉ helema꞉ki, a꞉la꞉ta꞉ga꞉ fo a꞉no꞉ dowa꞉i ha꞉na꞉melea꞉ki, a꞉na da꞉fea꞉sa꞉ga꞉ ta꞉fo꞉. Gio꞉ a꞉la꞉dimidalikiyo꞉, giliyo꞉ kelego꞉ o꞉ba꞉le ni wiya a꞉la꞉ta꞉ga꞉lo꞉ dabu ba꞉dab a꞉no꞉, Dowa꞉yo꞉ gimo꞉wo꞉ dimia꞉ib. 17  Yo꞉n 13.34Nilo꞉ gimo꞉lo꞉ ele saeto꞉l we. Gio꞉ gegelebo꞉ ha꞉fo꞉wo꞉ disa꞉la꞉lubi.

18 “Henfelo꞉ kaluka꞉isale iliyo꞉ gimo꞉wo꞉ mo꞉bealega, iliyo꞉ nemo꞉wo꞉ tamin amio꞉ mo꞉beo꞉lo꞉b a꞉la꞉ka asula꞉bi. 19  Yo꞉n 17.14Gio꞉ henfelo꞉ kalu wema꞉ ini so꞉lo꞉le dowo꞉ kibo꞉bowo꞉, iliyo꞉ gio꞉ mada asulumabe. Ko꞉sega gio꞉ henfelo꞉ wema꞉no꞉ma. O꞉leaumba. Gio꞉ henfelo꞉ man we ta꞉foma꞉ki, niyo꞉ a꞉na da꞉fe alifa꞉. A꞉la꞉fo꞉ko꞉lo꞉ iliyo꞉ gio꞉ mada mo꞉beab. 20  Yo꞉n 13.16To nilo꞉ tamin amilo꞉ gimo꞉lo꞉ wido꞉ we a꞉asuluma. ‘Madali nanogdo꞉ dian kalu a꞉ma꞉yo꞉ ene misa꞉ kaluwo꞉ mada mo꞉tininima꞉ib.’ Henfelo꞉ kaluka꞉isale iliyo꞉ tamin amio꞉ nemo꞉wo꞉ hida꞉yo꞉ ko꞉li ko꞉lilo꞉wo꞉ dimi ko꞉lo꞉, gimo꞉wo꞉lo꞉ a꞉la꞉ka dimidama꞉ib. Ko꞉sega to man nilo꞉ wido꞉ a꞉no꞉ iliyo꞉ kudu mio꞉lalega, gililo꞉ to widab a꞉no꞉lo꞉ kudu mia꞉ib. 21 Iliyo꞉ man a꞉no꞉ gimo꞉wo꞉ a꞉la꞉ka dimidama꞉ib mo꞉wo꞉ gio꞉ ni wiya a꞉lab. A꞉la꞉ta꞉ga꞉ iliyo꞉ nelo꞉ iliga꞉fo꞉ kalu a꞉no꞉ mo꞉asulo꞉. 22 Niyo꞉ towo꞉ ilo꞉ amio꞉ mo꞉walama꞉ni mio꞉ kibo꞉bowo꞉, ililo꞉ mogago꞉ dimido꞉ a꞉no꞉ ga꞉li domabe. Ko꞉sega o꞉go꞉ iliyo꞉ ‘Niyo꞉ mogago꞉wo꞉ mo꞉dimido꞉’ a꞉la꞉sa꞉ma꞉no꞉wo꞉ aundo꞉ma dowo꞉. 23  Luk 10.16Kalu abeyo꞉ nemo꞉lo꞉ mo꞉beab a꞉ma꞉yo꞉, Domo꞉wo꞉lo꞉ mo꞉beakigab. 24 Kalu noma꞉lo꞉ tamin amilo꞉ molo ha꞉na꞉no꞉ mo꞉dimida꞉sen a꞉no꞉ niyo꞉ i usamio꞉ mo꞉dimido꞉ kibo꞉bowo꞉, ililo꞉ mogago꞉ dimido꞉ a꞉no꞉ ga꞉li domabe. Ko꞉sega o꞉go꞉ iliyo꞉ molo ha꞉na꞉no꞉ nilo꞉ dimido꞉ a꞉no꞉ ba꞉da꞉sa꞉ga꞉yo꞉, iliyo꞉ Do na꞉n o꞉lia꞉yo꞉ o꞉mo꞉bea꞉lab. 25  Song 35.19, 69.4Man ililo꞉ dimido꞉ a꞉ma꞉yo꞉, Godeya꞉lo꞉ to sa꞉sa꞉lo꞉ da꞉lab we ilili alitakigab, ‘Kalu i wema꞉yo꞉ nemo꞉wo꞉ ba madali mo꞉bea꞉lab.’

26  Yo꞉n 14.26“Gilo꞉ halale alitakilo꞉ asuwa꞉ta꞉ mela꞉no꞉ Mama a꞉no꞉ Do o꞉lia꞉ a꞉lab ko꞉lo꞉, niyo꞉ e gi o꞉lia꞉ melea꞉ki iliga꞉fa꞉no꞉. Mama to hendelelo꞉ sa꞉lan e Do o꞉lia꞉ elen ko꞉lo꞉ mia꞉ib. E yalikiyo꞉ nelo꞉ doba꞉da꞉ sa꞉laki, gimo꞉wo꞉ dinafa fanda walama꞉ib. 27 A꞉la꞉ta꞉ga꞉ nilo꞉ nanogdo꞉ mo꞉mo꞉da dilo꞉ a꞉na a꞉la꞉ta꞉ga꞉lo꞉ mio꞉ a꞉namio꞉, gio꞉ ne o꞉lia꞉ elen ko꞉lo꞉, giliyo꞉lo꞉ nelo꞉ doba꞉da꞉ sa꞉lakiyo꞉, kalu nolbo꞉wo꞉ walama꞉ib.”