1 Ya꞉kob e hen a꞉no꞉ ta꞉ta꞉ga꞉ ha꞉na꞉sena, Godeya꞉ ma꞉mula꞉ kalu iyo꞉ ya꞉ga꞉, Ya꞉kobo꞉ a꞉na galili. 2 Ya꞉kob eyo꞉ ma꞉mula꞉ kalu ba꞉dakiyo꞉ a꞉la꞉sio꞉, “Hena꞉ usamilo꞉ Godelo꞉ dowa꞉sen heno꞉ wilo꞉ka꞉.” A꞉la꞉sa꞉la꞉sa꞉ga꞉ hen a꞉no꞉ Mahanaim* Mahanaim a꞉la꞉do꞉ sa꞉lab a꞉ma꞉ ha꞉go꞉ we, kalulo꞉ kegea꞉sa꞉ga꞉lo꞉ alila꞉sen hen a꞉la꞉. wikilo꞉.

3 Ho꞉len a꞉namio꞉ Iso꞉ e Seil hen, Idom hen us a꞉na sen ko꞉lo꞉, Ya꞉kob eyo꞉ tolo꞉ sa꞉ma꞉no꞉ kalu nolo꞉ ene ao Iso꞉lo꞉wa iliga꞉fo꞉. 4-5 Ya꞉kob eyo꞉ aomo꞉wo꞉ sa꞉ma꞉ni hamana꞉kiyo꞉, kalu i o꞉mo꞉wo꞉ a꞉la꞉sio꞉, “Gio꞉ ha꞉na꞉sa꞉ga꞉, ni misa꞉ kalu Iso꞉wo꞉ galiliakiyo꞉, to we ni nao wa꞉la꞉bo꞉wo꞉ a꞉la꞉sa꞉la꞉bi, ‘Gi nanogdo꞉ dian kalu Ya꞉kob eyo꞉ towo꞉ a꞉la꞉saga꞉fo꞉, “Ne Labando꞉wa mageso꞉ ha꞉na꞉ga꞉lo꞉ seno꞉, o꞉go꞉ a꞉ma꞉la꞉ yo꞉l. Niyo꞉ sibiyo꞉lo꞉ goudiyo꞉lo꞉, kaowo꞉lo꞉, donkiyo꞉lo꞉, a꞉la꞉ta꞉ga꞉ nanog kaluka꞉isaleyo꞉lo꞉ modo꞉ tililia꞉ yo꞉l ko꞉lo꞉, ni misa꞉ kalu giyo꞉ nemo꞉wo꞉ sagalo꞉ doma꞉ki, niyo꞉ to we gemo꞉ saga꞉to꞉l.” ’ Gio꞉ a꞉la꞉sa꞉la꞉bi.”

6 To a꞉no꞉ sama꞉kiyo꞉ iyo꞉ iliga꞉fo꞉ ko꞉lo꞉, iyo꞉ a꞉ma꞉la꞉ ya꞉ga꞉yo꞉, Ya꞉kobo꞉wo꞉ a꞉la꞉sio꞉, “Nio꞉ gi gao Iso꞉lo꞉ ba꞉ba꞉ni ane ko꞉lo꞉, e gelo꞉ ba꞉ba꞉ni yaki a꞉la꞉ta꞉ga꞉ e o꞉lia꞉yo꞉ kaluwo꞉ 400 a꞉la꞉fo꞉ a꞉no꞉lo꞉ yab.” 7 Ya꞉kobo꞉ to a꞉no꞉ da꞉da꞉sa꞉ga꞉, e mada kele asulaki, tagio꞉ alan dowo꞉ ko꞉lo꞉, ene so꞉lo꞉wo꞉lo꞉, sibiyo꞉lo꞉, kaowo꞉lo꞉, ka꞉molo꞉lo꞉ tambo usa aloba꞉da꞉sa꞉ga꞉, hen a꞉la꞉ya ta꞉fo꞉. 8 Mo꞉wo꞉ eyo꞉ a꞉la꞉asulo꞉, “Iso꞉ e ya꞉ga꞉yo꞉, alobanalia꞉ difa꞉ so꞉lo꞉ no o꞉lia꞉ bubalega, nowo꞉ dalale hamana꞉ki” a꞉la꞉asula꞉sa꞉ga꞉ alobo꞉no꞉.

9 A꞉la꞉ta꞉ga꞉ Ya꞉kob eyo꞉ a꞉la꞉dulugu sio꞉, “Yawe, ni ma꞉mu Ablaham o꞉lia꞉ ni do Aisa꞉g o꞉lia꞉ma꞉ Godeyo꞉ ge ko꞉lo꞉, tamin amio꞉ giyo꞉ nemo꞉wo꞉ a꞉la꞉sio꞉, ‘O꞉go꞉ ge go꞉la꞉ hendeya ha꞉na꞉ga꞉, go꞉no꞉n so꞉lo꞉lo꞉ sab a꞉na a꞉ma꞉la꞉ ha꞉na꞉bi. A꞉la꞉gakiyo꞉ niyo꞉ ge nafale mesea꞉ki ta꞉fa꞉no꞉.’ 10 Ne nafa kaluma, ko꞉sega giyo꞉ ha꞉fo꞉ disa꞉lan man o꞉lia꞉ man nafale a꞉no꞉lia꞉yo꞉ nemo꞉wo꞉ dimida꞉sen. Ne no꞉no꞉n heno꞉ ta꞉fo꞉ ha꞉naki, ho꞉n Yodan a꞉no꞉ ta꞉notakiyo꞉, i dom ko꞉ dia꞉sa꞉ga꞉ ane ko꞉sega, giyo꞉ ne asufa꞉ ko꞉lo꞉, o꞉go꞉ ne a꞉ma꞉la꞉ yakiyo꞉, kelego꞉wo꞉ modo꞉ ko꞉lo꞉ a꞉la꞉ aloba꞉da꞉sa꞉ga꞉ mio꞉. 11-12  Mo꞉mo꞉ 22.17Tamin amio꞉ giyo꞉ nemo꞉wo꞉ dinali sa꞉lakiyo꞉, ‘Niyo꞉ ge asuwa꞉taki, gilo꞉ so꞉wa sa꞉la꞉la꞉i ha꞉na꞉lab i a꞉no꞉ ho꞉n amilo꞉ sa꞉ o꞉ngo꞉ fa꞉la꞉doma꞉ki ta꞉fa꞉no꞉ ko꞉lo꞉, iyo꞉ mo꞉agelema꞉ib.’ Giyo꞉ a꞉la꞉dinali sio꞉ ko꞉lo꞉, o꞉go꞉ niyo꞉ gemo꞉wo꞉ a꞉na dulugu so꞉lo꞉l. Nao Iso꞉ e yakiyo꞉, nelo꞉, ga nilo꞉wo꞉lo꞉, so꞉wagalin o꞉lia꞉yo꞉ babuma꞉ni mia꞉nigab a꞉no꞉ ne tagilab ko꞉lo꞉, Yawe giyo꞉ ne asuwa꞉taki gasilia꞉bi.”

13 Ya꞉kob eyo꞉ Godemo꞉wo꞉ a꞉la꞉sa꞉la꞉sa꞉ga꞉, hen a꞉naka ali. Kea꞉fo dowabiki, ao Iso꞉mo꞉ boba dimia꞉no꞉ a꞉la꞉liki, no꞉ fofo꞉ elo꞉ tililia꞉ mio꞉ a꞉no꞉ alobo꞉no꞉. 14-16 Boba a꞉no꞉ ko꞉lo꞉ dimidaliakiyo꞉, goudi malayo꞉ 200 a꞉la꞉fo꞉, goudi deyo꞉ do꞉la꞉fo꞉ a꞉la꞉, sibi malayo꞉ 200 a꞉la꞉fo꞉, sibi deyo꞉ do꞉la꞉fo꞉ a꞉la꞉, ka꞉mol mala bolo꞉ na꞉seno꞉ inso꞉ o꞉lia꞉yo꞉ 30 a꞉la꞉fo꞉, kao malayo꞉ 40 a꞉la꞉fo꞉, kao deyo꞉ do꞉la꞉fo꞉, donki malayo꞉ do꞉la꞉fo꞉ a꞉la꞉, a꞉la꞉ta꞉ga꞉ donki deyo꞉ do꞉la꞉fo꞉ a꞉no꞉ aloba꞉da꞉la꞉ga꞉, no꞉ ko꞉li ko꞉lilo꞉ a꞉no꞉ nanogdo꞉ dian kalu ko꞉li ko꞉lilo꞉ o꞉mo꞉ tili dofo꞉melea꞉ki, alobanalifa꞉. Ya꞉kob eyo꞉ nanogdo꞉ dian kalu imo꞉wo꞉ a꞉la꞉sio꞉, “Giliyo꞉ no꞉wo꞉ tamin doba꞉da꞉ tililia꞉ga꞉ ha꞉nakiyo꞉, no꞉ ko꞉li ko꞉lilo꞉ us a꞉namio꞉ fogo꞉ dia꞉ta꞉liki a꞉la꞉ga꞉i ha꞉na꞉bi.” 17-18 Ya꞉kob eyo꞉ no꞉lo꞉ tamin amilo꞉ tililia꞉ga꞉lo꞉ ha꞉nab kalu o꞉mo꞉wo꞉ a꞉la꞉sio꞉, “Iso꞉wo꞉ ge galiliakiyo꞉, eyo꞉ gemo꞉wo꞉ dabu ba꞉dalikiyo꞉, ‘Ge abe nanog kaluwo꞉? No꞉ fofo꞉ we abeno꞉wo꞉? A꞉la꞉ta꞉ga꞉ no꞉ we o꞉ba tililia꞉ ha꞉naya?’ a꞉la꞉bo꞉ gemo꞉wo꞉ dabu ba꞉dalikiyo꞉, giyo꞉ emo꞉wo꞉ a꞉la꞉sa꞉la꞉bi, ‘No꞉ fofo꞉ we tambo gi nanog dian kalu Ya꞉kob eno꞉ ko꞉lo꞉, gemo꞉ boba ge dima꞉ki iliga꞉fo꞉ ko꞉lo꞉, Ya꞉kob e ni fa꞉sa yab’ a꞉la꞉sa꞉la꞉bi.” 19 Ya꞉kob eyo꞉ tamin amilo꞉ no꞉lo꞉ tililia꞉ ha꞉nab kalumo꞉wo꞉ a꞉la꞉sa꞉la꞉sa꞉ga꞉, kalu a꞉ma꞉ fa꞉s amilo꞉ ha꞉na꞉li, ha꞉na꞉li a꞉la꞉lab i o꞉mo꞉wo꞉lo꞉, “Iso꞉wo꞉ galiliakiyo꞉, to imilise weno꞉ko꞉ sa꞉la꞉i ha꞉na꞉bi. 20 A꞉la꞉ta꞉ga꞉ to a꞉la꞉do꞉ sa꞉ma꞉no꞉wo꞉ giliyo꞉ ga꞉lila꞉so꞉bo, ‘Gi nanog dian kalu, Ya꞉kob e ni fa꞉sa yab’ a꞉la꞉ salita꞉ga꞉ ha꞉na꞉bi,” a꞉la꞉sio꞉. Mo꞉wo꞉ Ya꞉kob eyo꞉ a꞉la꞉asulo꞉, “Boba kelego꞉ we e ko꞉le ba꞉dakiyo꞉, kulufa꞉yo꞉wo꞉ ga꞉lilaki sagalema꞉ib ko꞉lo꞉, na꞉no꞉ galiliakiyo꞉ sifo꞉fo꞉go꞉ kolalaki sagalema꞉iba꞉le?” Ya꞉kob eyo꞉ a꞉la꞉asulaki dimidalia꞉ga꞉ iliga꞉fo꞉. 21 A꞉la꞉dimidalia꞉ga꞉, boba kelego꞉ Iso꞉mo꞉lo꞉ dimia꞉no꞉ a꞉no꞉ tamina iliga꞉ta꞉ga꞉yo꞉, e o꞉g a꞉namio꞉ a꞉naka ali.

22-23 O꞉g nulu us a꞉namio꞉, Ya꞉kobo꞉ dasila꞉sa꞉ga꞉, inga a꞉la꞉yo꞉lo꞉, nanog ga a꞉la꞉ elo꞉ di a꞉no꞉lo꞉, kalu so꞉wa kelen a꞉la꞉fo꞉ a꞉no꞉lo꞉ tambo tililia꞉sa꞉ga꞉, ene kelego꞉ tambo a꞉no꞉lia꞉yo꞉ Yabog ho꞉n a꞉no꞉ ta꞉noma꞉ki iliga꞉takiyo꞉, Ya꞉kob e ina꞉li a꞉naka dowo꞉. 24-25  Hos 12.3-4Ya꞉kob e nulu a꞉namio꞉ ina꞉li dowabikiyo꞉, kalu nowo꞉ elo꞉wa fa꞉la꞉dowakiyo꞉, e ta꞉lia꞉sa꞉ga꞉ fafula꞉fo꞉liki ani tandea꞉leno꞉, ho꞉lema꞉no꞉wo꞉ ko꞉na꞉ma dowabiki, kalu a꞉ma꞉yo꞉ Ya꞉kobo꞉ mo꞉tininima꞉no꞉ dowabi, eyo꞉ Ya꞉koba꞉ kola꞉kiya golabiki, kola꞉kiyo꞉ a꞉na helefo dowo꞉. 26 A꞉la꞉dimida꞉sa꞉ga꞉yo꞉ kalu a꞉ma꞉yo꞉ a꞉la꞉sio꞉, “Ho꞉le bidab ko꞉lo꞉, giyo꞉ ne fagega꞉foma.” Ko꞉sega Ya꞉kob eyo꞉ a꞉ma꞉la꞉bo꞉ a꞉la꞉sio꞉, “Niyo꞉ ge o꞉semo꞉ fagega꞉fa꞉no꞉. Giyo꞉ ne nafale mesea꞉ki dinali sa꞉lalikiyo꞉, niyo꞉ ge a꞉na fagega꞉fa꞉no꞉.” 27 A꞉la꞉sa꞉labiki kalu a꞉ma꞉yo꞉ emo꞉wo꞉ a꞉la꞉dabu ba꞉ba꞉, “Ge wiyo꞉ o꞉ba꞉le?” Ya꞉kob eyo꞉ a꞉ma꞉la꞉bo꞉ a꞉la꞉sio꞉, “Ne Ya꞉kob.” 28  Mo꞉mo꞉ 35.10A꞉la꞉sa꞉labiki kalu a꞉ma꞉yo꞉ a꞉la꞉sio꞉, “Ge Gode o꞉lia꞉ kalu i o꞉lia꞉lo꞉ ani tandea꞉leno꞉ gi tinio꞉ ko꞉lo꞉, ge wiyo꞉ Ya꞉kob a꞉la꞉bo꞉ wa꞉kabiyo꞉ mo꞉sa꞉ma꞉ib. O꞉go꞉ gi wiyo꞉ Isolael† Isolael a꞉la꞉do꞉ sa꞉lab a꞉ma꞉ ha꞉go꞉ we, Gode o꞉lia꞉lo꞉ ani tandeo꞉ kalu. wikili alito꞉l.” 29  Het 13.17-18To a꞉no꞉ da꞉da꞉sa꞉ga꞉, Ya꞉kob eyo꞉ a꞉la꞉sio꞉, “Kalu Alan, gi wiyo꞉ sa꞉ma꞉no꞉wo꞉ o꞉liyo꞉?” A꞉la꞉sa꞉labiki kalu a꞉ma꞉yo꞉ a꞉la꞉sio꞉, “Wi nilo꞉wo꞉ waima꞉ni dabu ba꞉daya?” A꞉la꞉ta꞉ga꞉ kalu a꞉ma꞉yo꞉ Ya꞉kobo꞉ e nafale mesea꞉kiyo꞉, a꞉na dulugu sio꞉. 30 A꞉la꞉go꞉ko꞉lo꞉ Ya꞉kob eyo꞉ a꞉la꞉sio꞉, “Ne Godeyo꞉ migi kudu ba꞉ba꞉, ko꞉sega ne mo꞉sowo꞉.” A꞉la꞉fo꞉ko꞉lo꞉ eyo꞉ hen a꞉no꞉ Beniel‡ Beniel a꞉la꞉do꞉ sa꞉lab a꞉ma꞉ ha꞉go꞉ we, Godeya꞉ wo꞉lokan. wikilo꞉. 31 Ofo꞉ fa꞉la꞉dowabikiyo꞉, Ya꞉kob e Beniel hen a꞉no꞉ ta꞉ta꞉ga꞉ ha꞉nakiyo꞉, e kowo꞉ giliga꞉i ane. 32 A꞉la꞉go꞉ko꞉lo꞉ Isolael kaluka꞉isale iliyo꞉, o꞉g nulu a꞉namilo꞉ kalu a꞉ma꞉lo꞉ Ya꞉koba꞉ kola꞉ki amilo꞉ moma kudu alifelo꞉ amilo꞉ golo꞉ a꞉no꞉ asulakiyo꞉, iliyo꞉ no꞉ kola꞉ki amilo꞉ moma kudu alifelo꞉ a꞉no꞉ mo꞉na꞉sen ko꞉lo꞉, o꞉go꞉lo꞉ iliyo꞉ man a꞉no꞉ ko꞉lo꞉ kudu ha꞉naki mo꞉na꞉lab.