1 Iliga꞉felo꞉ kalu o꞉lia꞉ tilidabu kalu Yudia hen amilo꞉ sen nol o꞉lia꞉yo꞉, Yu kaluma nolo꞉ Godeya꞉ towo꞉ tilidabuka꞉ a꞉la꞉sa꞉labi dabu. 2-3  Ilig 10.28, Gala 2.12A꞉la꞉fo꞉ko꞉lo꞉ Bida e Ya꞉lusalem ha꞉na꞉ga꞉ fa꞉la꞉dowabikiyo꞉, tilidabu kalu do꞉go꞉fo꞉ hege gedeo꞉ iliyo꞉ Bidamo꞉wo꞉ gadi sa꞉laki a꞉la꞉sio꞉, “Ge do꞉go꞉fo꞉ mo꞉hege gedeo꞉ kaluwa꞉ aya siliki, ma꞉no꞉ gegele na꞉len.” 4-5  Ilig 10.9-48A꞉la꞉sa꞉labiki, Bida eyo꞉ dimido꞉ fa꞉la꞉dowo꞉ o꞉leaumbo꞉ kalu imo꞉wo꞉ tambo fanda sa꞉laki a꞉la꞉sio꞉, “Ne Yoba amisa꞉na siliki dulugu sa꞉la꞉len amio꞉, ne ho꞉le ba꞉dakiyo꞉, Hebeneyo꞉ kolaeta꞉sa꞉ga꞉, kelego꞉ nowo꞉ helebeso꞉g alano꞉ o꞉ngo꞉ ko꞉lo꞉ migif fa꞉la꞉da꞉in ami ta꞉lidota꞉ga꞉, ololo to꞉lola꞉i tindabi ba꞉ba꞉. 6 Helebeso꞉g us amio꞉ no꞉ fofo꞉wo꞉lo꞉, no꞉ mo꞉fofo꞉wo꞉lo꞉, sowa꞉yo꞉lo꞉, o꞉ba꞉yo꞉lo꞉ ko꞉li ko꞉lilo꞉ Godeya꞉lo꞉ na꞉so꞉boka꞉ a꞉la꞉likilo꞉ saefa꞉ a꞉no꞉ a꞉na delena ba꞉ba꞉. 7 A꞉no꞉ ba꞉da꞉sa꞉ga꞉yo꞉, to nowo꞉ a꞉la꞉sio꞉, ‘Bida, ge dasima! No꞉ we yasala꞉sa꞉ga꞉ maiya!’ 8 A꞉la꞉sa꞉labiki, niyo꞉ a꞉ma꞉la꞉bo꞉ a꞉la꞉sio꞉, ‘Alan, ne a꞉la꞉bo꞉ mada mo꞉dimidama꞉no꞉! Yu kaluwa꞉ ele difa꞉ usamilo꞉ “Na꞉so꞉boka꞉” a꞉la꞉do꞉ saefa꞉ a꞉no꞉ niyo꞉ mada mo꞉na꞉sen.’ 9 A꞉la꞉sa꞉labikiyo꞉ to nowo꞉ nemo꞉wo꞉ wa꞉ka a꞉sio꞉, ‘Godeya꞉lo꞉ gemo꞉lo꞉, “we nafa ko꞉lo꞉ o꞉li na꞉bika꞉” a꞉la꞉do꞉ sio꞉ a꞉no꞉, giyo꞉ ma꞉no꞉ a꞉no꞉ Gode siwa꞉l amio꞉ mogago꞉ a꞉la꞉likiyo꞉ sa꞉la꞉so꞉bo’ a꞉la꞉sio꞉. 10 A꞉la꞉dimida꞉leno꞉ otalen fa꞉la꞉dota꞉ga꞉, wigibo a꞉naka kelego꞉ a꞉no꞉ Hebene halona a꞉ma꞉la꞉ susululiabi ba꞉ba꞉. 11 Wigibo a꞉naka, kalu otalen, Konilias elo꞉ Sesalia a꞉la꞉ta꞉ga꞉lo꞉ iliga꞉fo꞉ a꞉no꞉ a nilo꞉ sen a꞉na fa꞉la꞉dowo꞉. 12 A꞉la꞉ta꞉ga꞉ Godeya꞉ Mamaya꞉yo꞉ nemo꞉wo꞉ a꞉la꞉sio꞉, ‘Ge i o꞉lia꞉ ha꞉nakiyo꞉, kele asula꞉likiyo꞉ ha꞉na꞉so꞉bo’ a꞉la꞉sio꞉. A꞉la꞉ta꞉ga꞉ tilidabu kalu do꞉go꞉fela꞉fo꞉ we ne o꞉lia꞉ ha꞉na꞉sa꞉ga꞉, Koniliasa꞉ a usa ane. 13 Konilias eyo꞉ elo꞉ amilo꞉ fa꞉la꞉dowo꞉ a꞉no꞉ nemo꞉wo꞉ a꞉la꞉malolo꞉ meabe. Ma꞉mul kaluwo꞉ Koniliasa꞉ aya fa꞉la꞉dota꞉ga꞉ ilikiyo꞉, emo꞉wo꞉ a꞉la꞉sio꞉, ‘Saimon Bida a꞉no꞉ wena mena꞉ki, o꞉go꞉ giyo꞉ kalu nolo꞉ Yoba amisa꞉na iliga꞉foma. 14  Ilig 16.31Eyo꞉ to nafayo꞉ gimo꞉wo꞉ sa꞉ma꞉ mia꞉ib ko꞉lo꞉, gi o꞉lia꞉ gi ayamilo꞉ so꞉lo꞉ sab a꞉no꞉lo꞉ a꞉ma꞉la꞉ gasiliakilo꞉ nafale mesa꞉no꞉ to a꞉no꞉ walama꞉ib.’ 15  Ilig 2.4Ma꞉mul kaluwa꞉yo꞉ to a꞉no꞉ Koniliasmo꞉wo꞉ sio꞉ ko꞉lo꞉, ne a꞉na ha꞉na꞉sa꞉ga꞉yo꞉, niyo꞉ towo꞉ halaido꞉ mo꞉mo꞉da wida꞉sen amio꞉, Godeya꞉ Mamayo꞉ tamina nilo꞉ amilo꞉ mio꞉ aumbo꞉, ilo꞉ amio꞉lo꞉ a꞉la꞉ka mio꞉. 16  Ilig 1.5A꞉la꞉gabikiyo꞉, niyo꞉ Ya꞉suwa꞉lo꞉ nimo꞉lo꞉ tamin amilo꞉ sio꞉ a꞉no꞉ a꞉asulo꞉. Eyo꞉ tamin amio꞉ a꞉la꞉sio꞉, ‘Yo꞉na꞉yo꞉ ho꞉ndeya to꞉lola꞉len ko꞉sega o꞉go꞉ giliyo꞉ Godeya꞉ Ene Mamaleya to꞉loma꞉ib.’ 17 Tamin amio꞉ nio꞉ Ya꞉su Kelisowa tilida꞉dabikilo꞉ Godeya꞉lo꞉ boba nimo꞉lo꞉ dimi a꞉no꞉, o꞉go꞉ imo꞉wo꞉lo꞉ dimi ko꞉lo꞉, Godeya꞉lo꞉ dimidab a꞉no꞉ niyo꞉ waga ka꞉ma꞉no꞉wo꞉?” Bida eyo꞉ a꞉la꞉sio꞉. 18  Ilig 13.48, 14.27Yu amilo꞉ tilidabu kaluka꞉isaleyo꞉ to a꞉no꞉ da꞉dakiyo꞉, iyo꞉ wa꞉kabiyo꞉ mo꞉kele asulaka, Godeya꞉ wiyo꞉ ko꞉lo꞉ dulugu sa꞉lakiyo꞉ a꞉la꞉sio꞉, “O꞉go꞉ Yu kaluka꞉isalema i a꞉no꞉lo꞉ asugo꞉ nodola꞉sa꞉ga꞉ mela꞉no꞉wo꞉ dima꞉ki, Gode eyo꞉ fogo꞉ hendele dimilo꞉ka꞉” a꞉la꞉sio꞉.

19  Ilig 8.1-4Sitifendo꞉ sa꞉ndab ho꞉len a꞉namio꞉, hida꞉yo꞉ alan fa꞉la꞉dowo꞉ a꞉ma꞉ ilikiyo꞉, tilidabu kaluka꞉isaleyo꞉ dalalelia꞉ga꞉, nolo꞉ Fonisia hen a꞉na, nolo꞉ Saibulus hen a꞉na, a꞉la꞉ta꞉ga꞉ nolo꞉ Antio꞉g amisa꞉n a꞉na ane. Iyo꞉ ha꞉na꞉siakiyo꞉, Godeya꞉ to nafayo꞉ Yu kaluka꞉isalemo꞉ ka wida꞉li ane. 20 A꞉la꞉ta꞉ga꞉ Saibulus o꞉lia꞉ Sailini amilo꞉ tilidabu kalu nolo꞉ Antio꞉g amisa꞉na ha꞉na꞉siakiyo꞉, Ya꞉su Alana꞉ to nafa a꞉no꞉, Yu kaluka꞉isalema imo꞉wo꞉lo꞉ wido꞉. 21 A꞉la꞉fo꞉ko꞉lo꞉ Alana꞉ halaido꞉wo꞉ i amio꞉ asulo꞉wa dofo꞉liki wido꞉ ko꞉lo꞉, kaluka꞉isaleyo꞉ modo꞉ ko꞉lo꞉ tilida꞉da꞉sa꞉ga꞉, Ya꞉su Alan e ko꞉lo꞉ kudu ane.

22  Ilig 4.36Amisa꞉n a꞉namilo꞉ fa꞉la꞉dowo꞉ a꞉no꞉ Ya꞉lusalem tilidabu kaluka꞉isaleyo꞉ dabu ko꞉lo꞉, iliyo꞉ Banabaso꞉ Antio꞉g a꞉na iliga꞉fo꞉. 23 E a꞉na fa꞉la꞉dowaki ba꞉ba꞉yo꞉, Godeya꞉lo꞉ kaluka꞉isaleyo꞉ asuwa꞉takilo꞉ ha꞉fo꞉ disa꞉la꞉lab a꞉no꞉ ba꞉da꞉ga꞉yo꞉, e sagalakiyo꞉, iyo꞉ Alan o꞉lia꞉ tambo ege dowaki, asugo꞉ himuwa oga꞉dita꞉ga꞉ doma꞉ki, eyo꞉ towo꞉ halale salifa꞉.

24 Banabas e kalu nafa, a꞉la꞉ta꞉ga꞉ tilidabu elo꞉wo꞉ halaido꞉ a꞉la꞉ta꞉ga꞉ Godeya꞉ Mamayo꞉ eyamio꞉ wa꞉lifo꞉liki wido꞉ ko꞉lo꞉, kaluka꞉isale modo꞉wo꞉ asugo꞉ nodola꞉sa꞉ga꞉, Ya꞉su Alan e ko꞉lo꞉ kudu ane. 25-26  Ilig 9.30A꞉la꞉ta꞉ga꞉ Banabas e So꞉l kelema꞉ni ane. E Tasus amisa꞉n a꞉na ha꞉na꞉sa꞉ga꞉, So꞉lo꞉ a꞉na galili ko꞉lo꞉, Antio꞉g amisa꞉na a꞉ma꞉la꞉ tililia꞉ mio꞉. A꞉la꞉yo꞉ dona imiligo꞉ tilidabu kaluka꞉isale o꞉lia꞉ silikiyo꞉, kaluka꞉isale modo꞉mo꞉ wida꞉len. A꞉la꞉fo꞉ko꞉lo꞉ kaluka꞉isale a꞉namilo꞉ sen a꞉ma꞉yo꞉ Ya꞉sulo꞉ kudu ha꞉nab kaluka꞉isale a꞉no꞉ “Keliso kaluka꞉isaleka꞉” a꞉la꞉liki Antio꞉g a꞉na mo꞉mo꞉da wikilo꞉.

27 Ho꞉len a꞉ma꞉ imilib amio꞉, Godeya꞉ tolo꞉ dinali sa꞉lan kalu nolo꞉ Ya꞉lusalem a꞉la꞉ta꞉ga꞉ Antio꞉g a꞉na ane. 28  Ilig 21.10Kalu i a꞉no꞉, nowo꞉ wiyo꞉ Agabus ko꞉lo꞉ Godeya꞉ Mamaya꞉ halaido꞉wo꞉ eya dowaki ho꞉le ba꞉dakiyo꞉, e kalu kegeo꞉ siwa꞉la kagayaki a꞉la꞉sio꞉, “Henfelo꞉ wenamio꞉ maiyo꞉wo꞉ alan fa꞉la꞉doma꞉ib” a꞉la꞉sio꞉. Eyo꞉ a꞉la꞉saefa꞉ ko꞉lo꞉, Kalodius e Lom hendo꞉ bo꞉fo꞉lab ho꞉len a꞉namio꞉, dinali sio꞉ a꞉no꞉ hendele fa꞉la꞉dowakiyo꞉, maiyo꞉wo꞉ alan dowo꞉. 29 A꞉la꞉fo꞉ko꞉lo꞉ tilidabu kaluka꞉isale iliyo꞉ towo꞉ saetakiyo꞉, moleyo꞉ enedo꞉ asulab au kegea꞉sa꞉ga꞉yo꞉, Yudia hen amilo꞉ ao i sab nolo꞉ asuwa꞉fa꞉niki kegeo꞉. 30  Ilig 12.25Kegea꞉la꞉ga꞉, Ya꞉lusalem misa꞉ kalulo꞉wa dia꞉hamana꞉ki, Banabas dia꞉ So꞉l dia꞉yo꞉ a꞉na iliga꞉fo꞉.