11
Kolomongo Awili 11-16 YESUSI MINDILI NOMBA KOLOPALIE, LOMBOROPA OLA MOLOPA MULU KOLEANA KELEPA PURUMU TEMANEMO
11:1-11 Ye Nomi Kingi Te Kolea Tenga Suku Pumbe Purumu Kinie Teringi Mele Yesusi Jerusalleme Suku Pumbe Purumu Kinie Aku Siku Teringi Temanemo* Mateyu 21:1-11,14, LLuku 19:29-38.
1 ⸤Yesusi kinie yu lombili andolime kinie⸥ eno kolea awili Jerusalleme nondoko ongo, ma pangi te ‘Ma Pangi Unjo Ollipi Ponie’ nili akune lemo kolea kanga talo, Betepasi kinie Betaniselonga oringi. Kanu kinie Yesusini yu lombili andoli ye talo lipe mundupelie,† bokumunge alsena anjokondo “10. disaipel”. 2 elondo nimbendo: “Ne kolea kanga kanokombelena pukululie kongi dongi walo te, yembo te yunge bulu mingine walsikele kepe naa molopa andorumumu ka teko panjingemo ne sukundu molomba kanongele, kanumu puku posiku yando mengo wangili pale. 3 Posingele teko molongele kinie yembo tene elondo “Aku nambemune tekembeleye?” nimu liemo elone i siku niengili: “Awilimu‡ bokumunge alsena anjokondo “6. bikpela”. yu ‘Dongimuni mepili.’ nimu-ne ombo likimbulu. Yu dongi walomo altopa nondopa yando lipe mundumbe.” niengili.” nimbe elo lipe mundorumu.
4 Lipe mundorumu yeselo pukulu, kongi dongi walo te, ulke kerepulune ka teko panjeringimu kanokololie kongi kanumu puku poseringili. Aku siku tengele teringili kanokolie 5 akune angilieringi yembo marene elondo “Kongi dongi walomo nambemune posikimbiliye?” ningu walsiku pilieringi kinie
6 elone, Yesusini ‘i siku i siku niengili.’ nirimu mele niringili kinie “Kapola, ⸤dongi walomo⸥ mengo pangili.” niringi.
7 Kanu kinie elone kongi dongi walomo Yesusi molorumune mengo ongololie, enone enonga mulumbalema kulku dongimunge bulu mingine ola pauwe toringi kinie Yesusi kanune ola molorumu. 8 Yembo awisilini enonga mulumbalema kulku yu ombá aulkena pauwe toliku puku, marene unjo kipiyala poniena puku kipiyala gomo langoko liku yu ombá aulkena pauwe toliku puringi. 9 Kumbi leko puringi yembomane kepe akiliku puringi yembomane kepe naka leko unjo ambololiku pukulie ningendo:
“ ‘Yunge imbi ola molopili.’ niemili!
‘Pulu Ye Yawene lipe mundorumu-ne
yunge kongonomo tendemba okomo yemo§ bokumunge alsena anjokondo “28. nem”.
molopa kondopili!’* Konana 118:25-26.
10 Olionga anda kolepa ye nomi kingi Depisi⸤ni
kalopa lsimu yemo⸥
ye nomi kingi molomba tekemo yemo† bokumunge alsena anjokondo “20. kingdom”.
Pulu Yemone tepa kondopa
‘Yu tondolo pupili.’ nipili.
Mulu koleana ola yu imbi ola molopili!”‡ ungu pulu te Konana 148:1-2 molemonje?
niliku puringi.
11:11,15-18 Ulke Tembelena Bisinete Teko Kou Liku Moloringi Yema Yesusini Topa Makororumu Temanemo§ Yesusini aku sipe mele wale talo terimu. Ou kumbi lepa terimu temanemo Jono 2:13-22. Pe wale talo sipe terimu temane ya molemomo Mateyu 21:12-13, LLuku 19:45-46(-48).
11 Kanu kinie Yesusi Jerusalleme suku pupelie Pulu Yemo popo toko kaloringi ulke tembelena pupe akune suku ⸤teko moloringi ulume⸥ pali kanorumu, nalo kolea ipu lierimu-ne kanopalie ⸤‘Isili-ou ulu te naa teambo.’ nimbe⸥ yu lombili andoli ye engaki rurepo kinie ⸤Jerusalleme⸥ ulsukundu puku, kolea kanga Betani ⸤pengé⸥ puringi.
11:12-14,20-26 Yesusini Unjo Piki Te Iri Torumu Kinie Kolorumu Temanemo* Mateyu 21:18-22.
12 Ipulueli-ou ⸤Jerusalleme nondopa lierimu⸥ kolea kanga Betani munduku siye kolkolie ⸤kelko Jerusalleme punge puringi kinie⸥ Yesusi yu engele terimu. 13 Kanu kinie yu unjo piki te gomo tepa angilierimumu sulu tepa kanopalie ‘Mongo te tomunje.’ nimbe nondopa pupe kanorumu nalo, piki mongo torumu walemo ou wendo naa orumumunge unjo mongo topa te naa perimu, gomoma mindi terimu kanorumu. 14 ⸤Gomo mindi terimu kulu⸥ kanopalie “Nu altoko yembomane nonge mongo te naa tani!” nirimu. Aku nirimumu yu lombili andolimene pilieringi.
15 Jerusalleme kamu oringi kinie Yesusi yu Pulu Yemo popo toko kaloringi ulke tembelena ⸤“Juda yembo naa molemele yemboma ‘Pulu Yemo popo tamili.’ ningu maku tolemele kolea” niringi akune⸥ suku pupe kanopalie akune melema makete teko moloringi yemboma kinie, melema topo toko liku moloringi yemboma kinie, akume kanopalie eno pali topa makoropa, kou mone lupe lupema alowa teko anjo siringi yembomanga poloma kinie, kera waembono makete teko manie moloringi poloma kinie, lipe topele topa, topa bulu-balu sipelie, 16 yembomando nimbendo: “Yemboma kou mone linge makete tenge melema kolea tenga lupe makete tenge pungendo ulke tembele palana naa pangi. ⸤Anekale teko pangi.⸥” nirimu.
17 Eno mane sipelie nimbendo: “Pulu Yemonga bokune ungu te isipe nilimo:
‘Yembomane nanga ulkemondo
“Koleamanga pali yembo talapemane† bokumunge alsena anjokondo “2. arapela lain”.
Pulu Yemo kinie ungu nilimolo ulkemo.” ninge.’‡ Aisaya 56:7.
kanumu eno naa pilimeleye?
Ungu aku sipe molemo nalo enone iulkemo
‘wa nolemele yemboma lopi teko molemele ulkemo’ mele§ Jeremaya 7:11.
ningu pilkulie aku siku telemele.” nirimu.
18 Yesusini aku nirimu kulu pilkulie Pulu Yemo popo tondoringi ye awilime kinie, Pulu Yemonga ungu manemanga pulume pilku mane siringi yema kinie,* bokumunge alsena anjokondo “34. pris”, “41. saveman”. eno yu toko kondonge aulke te kororingi. We yemboma yuni mane sirimu mele pilkulie mini-wale mundoringi kulu kanokolie kanu Juda yembomanga ye awilimene yu pipili kolko yu toko kondonge aulke te kororingi.
19 Pe ipupene, kolea kala tomba terimu kinie ⸤Jerusalleme⸥ ulsu pupe ⸤tenga† Betaninje (inie yakondo 11:11). pe-porumu⸥.
11:20-26 (inie yakondo 11:12-14,20-26.)
20 Ipulueli-ou, ⸤unjo piki angilierimu koleana⸥ ongo pukulie kanu unjo pikimu kamu pulu pali kolorumu kanoringi. 21 Aku sipe terimu mele Pitane kanopalie ⸤Yesusini unjomondo oleangakondo nirimu mele⸥ kelepa pilipelie yundu nimbendo: “Rapai,‡ ungu pulumu Ungu Mane Silimu Jono 1:38*. kána! Iunjo piki nuni ⸤oleanga⸥ iri tonumu ⸤walsikele⸥ kolomu.” nirimu.
22 Yesusini topondopa nimbendo: “Pulu Yemone nanga ungumu sike pilimbe⸤monga nimbo mele ‘Paa sike wendo ombá.’ ningu⸥ tondolo munduku piliengi! 23 Nane eno paa sike nimbu sikirumu: Yembo tene ‘nane nimbo mele paa sike wendo ombá.’ nimbe konopu talo tepa naa pepili ne ma pangimundu “Ungú toko nomu kusana sukundu pu!” nimbé kinie yu nimbé mele paa sike wendo ombá. 24 Akumunge eno isipu nimbu siembo: ‘Olio ⸤Pulu Yemone paa sike lipe tapondombamonga ‘Teamili.’ nimolo mele sike manda aku sipu temolo.’ molo ‘Nimolo kinie sike aku sipe wendo ombá.’ ningu⸥ tondolo munduku pilkulie Pulu Yemo kinie ungu ningu mawa tenge mele pali Pulu Yemone sike tendembamonga kanu ulume sike wendo ombá.” nirimu.§ Jemisi 1:5-8.
25 “ ‘Ulu pulu keri temulume olionga Lapa, mulu koleana molemomone ‘We manie pupili, siye kolambo.’ nipili.’ ningu, Pulu Yemo kinie ungu ningu angilkulie yembomane eno teko kenjingemonga konopu keri panjiku molonge ulume ‘We manie pupili. Siye kolamili.’ niengila.* Mateyu 6:14-15. 26 (Nalo yembomane eno teko kenjinge ulume ‘We manie pupili.’ ningu siye naa kolongi liemo enonga Lapa, mulu koleana molemomone kepe enone ulu pulu keri tengema ‘Manie pupili.’ naa lanimbe siye naa lakolomba.)”† akumu pilipe konginjeli pelemo yembo marene pilkulie ningendo: “Ou Giriki ungune naa molorumu. Pe Giriki ungune Mateyu 6:15 kanoko ya we manda manjiku toringi.” nilimele. nirimu.
11:27-33 Yesusi Namba Sirimumunge Kerepale Niringi Temanemo‡ Mateyu 21:23-27, LLuku 20:1-8.
27 Jerusalleme altoko oringi kinie Yesusi yu ulke tembelena suku andorumu kinie ye mare, Pulu Yemo popo tondoringi ye awilime kinie, Pulu Yemonga ungu manemanga pulume pilku mane siringi yema kinie, Juda yembomanga tapu yema kinie,§ bokumunge alsena anjokondo “34. pris”, “41. saveman”, “16. hetman”. 28 eno ongo yu walsiku pilkulie ningendo: “Nu namba nambolka nambamo likulie ikongonomo telenoye? Nawene ikongonomo ‘Te-pou.’ nimbe nu nambamo sipe lipe mundorumuye?” niringi.
29 Yesusini enondo topondopa nimbendo: “Nane eno ungu te walsipu piliembola. Pe nane eno walsimbo mele na sumbi siku topondoko ningi liemo ‘Na ikongonomo teambo.’ nimbe namba sirimumunge pulumu eno nimbu simbola. 30 ⸤Nane isipu eno walsipu pilkiru:⸥ Ou ⸤No Lindeli⸥ Jono omba yemboma no linderimu kinie yu mulu koleana molemo yemonga kongonomo tendembando yemboma no linderimu molo ya mana yembomanga kongonomo tendembando yemboma no linderimuye? ⸤Nawene “Tei.” nirimu-ne terimuye?⸥ Ningu siee.” nirimu.
31 ⸤Yuni aku sipe walserimu mele pilkulie⸥ enone enono kerepale ningulie ningendo: “Yuni walsikimu mele olione topondopo, ‘⸤Jono⸥ yu mulu koleana ⸤molemo yemonga kongono tendembando yemboma no linderimu⸥.’ nimulu liemo yuni oliondo nimbendo: ‘Aku liemo eno Jonone nirimu ungumu nambemune ‘Iungumu sike.’ ningu naa pilku lsingiye?’ nimbé. 32 Molo olione nimolondo: ‘Yu mana yembomanga ⸤kongono tendembando yemboma no linderimu⸥.’ nimulu liemo “We yembomane olio tongenje.” ningu aku siku ningendo pipili koloringi. We yembomane ‘⸤No Lindeli⸥ Jono yu paa sike Pulu Yemone ungu umbu tondorumumu pilipe yemboma nimbe sirimu ye te molorumu.’* bokumunge alsena anjokondo “35. profet”. ningu pilimele kene olio nambe-emolonje?” ningu enono aku siku kerepale niringi.
33 ⸤Enono aku siku anjo yando kerepale ningulie⸥, Yesusindu topondoko ningendo: “⸤Nuni walsikinu mele⸥ olio naa pilkimulu.” niringi.
Aku siku niringi kinie pilipelie Yesusini enondo nimbendo: “Kapola. ⸤Nane eno walsikiru ungumunge ungu te topondoko naa nikimilimunge⸥ enone na walsikimili ungumunge ungu te topondopo, nando ikongonomo ‘Te-pou.’ nimbe na lipe mundupe namba sirimu yemonga imbimu eno naa nimbu simbola.” nirimu.
*^ Mateyu 21:1-11,14, LLuku 19:29-38.
†11:1: bokumunge alsena anjokondo “10. disaipel”.
‡11:3: bokumunge alsena anjokondo “6. bikpela”.
§11:9: bokumunge alsena anjokondo “28. nem”.
*11:9: Konana 118:25-26.
†11:10: bokumunge alsena anjokondo “20. kingdom”.
‡11:10: ungu pulu te Konana 148:1-2 molemonje?
§11:10: Yesusini aku sipe mele wale talo terimu. Ou kumbi lepa terimu temanemo Jono 2:13-22. Pe wale talo sipe terimu temane ya molemomo Mateyu 21:12-13, LLuku 19:45-46(-48).
†11:17: bokumunge alsena anjokondo “2. arapela lain”.
‡11:17: Aisaya 56:7.
§11:17: Jeremaya 7:11.
*11:18: bokumunge alsena anjokondo “34. pris”, “41. saveman”.
†11:19: Betaninje (inie yakondo 11:11).
‡11:21: ungu pulumu Ungu Mane Silimu Jono 1:38*.
†11:26: akumu pilipe konginjeli pelemo yembo marene pilkulie ningendo: “Ou Giriki ungune naa molorumu. Pe Giriki ungune Mateyu 6:15 kanoko ya we manda manjiku toringi.” nilimele.
‡11:26: Mateyu 21:23-27, LLuku 20:1-8.
§11:27: bokumunge alsena anjokondo “34. pris”, “41. saveman”, “16. hetman”.
*11:32: bokumunge alsena anjokondo “35. profet”.