DƆNKIRIW TA DƆNKIRI
KITABU
Kitabu faamucogo
Dɔnkiriw ta dɔnkiri kɔrɔ ye ko dɔnkiriw bɛɛ ra ɲumanman, min ka di ni a tɔw bɛɛ ye. Dɔw b’a wele ko masacɛ Sulemani ta dɔnkiri. Mɔgɔ caman fana b’a miiri ko a sɛbɛbaga ye masacɛ Sulemani ye, sabu ale tɔgɔ le fɔra kitabu damina na.
Kanuɲɔgɔn fla ta ko le bɛ nin kitabu kɔnɔ, kanbelen dɔ ni a ta sunguru; olugu jarabira ɲɔgɔn na; o bɛ ɲɔgɔn tando, ka ɲɔgɔn ladiya ni o darakumaw ye. O mɔgɔ fla bɛ kuma ka ɲɔgɔn sɔn, walama o bɛ kelennakuma kɛ, walama o bɛ ɲɔgɔn ko fɔ o teri dɔw ye, o b’a fɔ minw ma ko «Zeruzalɛmu sunguruw».
Nin kitabu faamucogo ma nɔgɔn; tuma dɔw kuma min bɛ fɔ, i t’a lɔn ni o ye kanbelen, walama sunguru kan ye. O kosɔn an ka kuma dɔw kɛ kanbelen ta ye, ka dɔw kɛ sungurunin ta ye, hali ni heburukan kitabu m’a kɛ ten.
Mɔgɔw ka nin kitabu faamu cogo caman na: Dɔw ko, ko nin kitabu ye Ala ni a ta mɔgɔw ta kanuya tagamasiyɛn le ye, dɔw ko, ko Matigi Ala ni a ta jɔnw ta jɛnɲɔgɔnya* tagamasiyɛn lo, dɔw ko, ko Matigi Yesu ni lanabagaw ta kanuya tagamasiyɛn lo.
Nka an ka kan ka nin kitabu kumaw ta i n’a fɔ a sɛbɛra cogo min na; o kɔrɔ ye ko cɛ ni muso ta kanuɲɔgɔnya ko bɔra Ala yɛrɛ le ra. Cɛ ni muso ye ɲɔgɔn kanu, walama ka jarabi ɲɔgɔn na furu ta sira fɛ, o tɛ baasi ye, o ka ɲi.
O ra, an bɛ se k’a fɔ ko nin kitabu kunba yɛrɛ kɛra kanuya ye, ka kaɲa ni nin kumaw ye:
«Hali jiba tɛ se ka kanuya tasuma faga,
ji si tɛ se k’a datugu» (8.7).
Kitabu kɔnɔkow
Dɔnkiri fɔlɔ (1.1–2.7)
Dɔnkiri flanan (2.8–3.5)
Dɔnkiri sabanan (3.6–5.1)
Dɔnkiri naaninan (5.2–6.3)
Dɔnkiri loorunan (6.4–8.4)
Dɔnkiri wɔɔrɔnan (8.5-14)
1
Kanuɲɔgɔnmanw ta baro
1 Dɔnkiriw bɛɛ ta dɔnkiri. Sulemani ka min sɛbɛ.
(Sunguru kumakan)
2 Ne mɔmɔ! Ne fari yɔrɔ bɛɛ saaro!
Sabu i ta kanuya ka di ka tɛmɛ duvɛn kan.
3 I munturu kasa ka di.
I tɔgɔ bɛ i ko turu kasadiman min kasa bɛ yɔrɔ bɛɛ labɔ.
O kosɔn, i ko ka di sungurudenw ye.
4 Ne mina, ka gban i kɔ, an ye bori!
Masacɛ, ne ladon i ta bon kɔnɔ!
An ye ɲagari ka ninsɔndiya ɲɔgɔn fɛ!
An ye kanuya diyabɔ ka tɛmɛ hali duvɛn kan.
Sunguruw jo lo ka ɲabɔ i fɛ.
5 Zeruzalɛmu sunguruw, ne finnin lo, nka ne cɛ ka ɲi,
i ko Kedari ta fanibonw,
i ko Sulemani ta masaso bondarafaniw.
6 Aw kana ne ta finya flɛ,
tere le ka ne fin.
Ne balemacɛw le dimina ne kɔrɔ,
ka ne bla ko ne ye rɛzɛnforow kɔrɔsi.
O ra, ne ma ne yɛrɛ ta foro kɔrɔsi.
7 E, ne jusukun bɛ ele min kanu, a fɔ ne ye:
ele bɛ taga ni i ta bɛganw ye min, o ye taga bin ɲimi?
Aw bɛ sigi yɔrɔ juman ka nɛnɛkiri tere fɛ?
Ni ne ka o lɔn, ne tɛna to ka yaalayaala tuun ka lamini
i tɔɲɔgɔnw ta bɛganw kɔ gbansan.
(Kanbelen kumakan)
8 E, musow bɛɛ ra cɛɲuman, ni ele ma o lɔn,
bɔ ka tugu bɛganw nɔ fɛ,
ka taga ni i ta badenninw ye,
o ye taga bin ɲimi sagagbɛnbagaw ta fanibonw kɛrɛ fɛ.
9 E, ne kanuɲɔgɔn, ne bɛ i ta cɛɲa suma
ni masacɛ Farawona ta wotorosamasow le ye.
10 I dafuruw cɛ ka ɲi i ta tororanɛgɛ fla cɛ ma,
i kankala cɛ ka ɲi i ta kannanɛgɛ cɛ ma!
(Sagagbɛnbagaw kumakan)
11 An bɛna tororanɛgɛ saninlamanw le gbasi i ye,
ka o ɲɛgɛn ni warigbɛ ye.
(Sunguru kumakan)
12 Ka ne ta masacɛ ni a jɛnɲɔgɔnw siginin to,
ne ta turu ka yɔrɔ bɛɛ kasa diya.
13 Ne jarabi bɛ i ko kasadiyanan, min bɛ bɔrɔnin kɔnɔ.
A lanin bɛ ne sin fla cɛ ma.
14 Ne jarabi bɛ i ko jabifiyeren,
min bɛ Ɛni Gedi rɛzɛnforow cɛ ra.
(Kanbelen kumakan)
15 E, i cɛ ka ɲi sa, ne kanuɲɔgɔn, i cɛ ka ɲi!
I ɲakisɛw cɛ ka ɲi i ko tugani!
(Sunguru kumakan)
16 I cɛ ka ɲi, ne jarabi, i ko ka di ne ye;
an ta lanan bɛ i ko binkɛnɛ.
17 An ta bon yiriw ye sɛdiriyiri cɛɲuman le ye,
a kogow ye sipɛrɛsi yiriɲumanw le ye.