WAAJURIKƐBAGA
TA KITABU
Kitabu faamucogo
Ka kaɲa ni nin kitabu ta kuma dɔw ye (1.1,12,16; 2.4-9; 12.9), mɔgɔ caman ta miiriya ra nin kitabu sɛbɛbaga ye masacɛ Sulemani ye. A sɛbɛbaga kɔni b’a yɛrɛ tɔgɔ la ko «Waajurikɛbaga.»
A bɛ i n’a fɔ cɛkɔrɔba dɔ lo min sigira ka miiri, ka jatemina kɛ a ta ko tɛmɛninw na. A ka karan caman kɛ, ka hakiritigiyaba sɔrɔ; nka a k’a ye ko fɛn bɛɛ bɛ tɛmɛ i ko fɔɲɔ: lɔnniya, ani naforo, ani mɔgɔ diyanyafɛnw, o bɛɛ ye gbansan le ye. Adamaden ni a ta hakiritigiya bɛɛ, ko caman bɛ yi, a tɛ se ka o faamu; a tɛ se ka Ala ta kolatigɛninw faamu. Wagati dɔw ra a b’a ye i n’a fɔ kun yɛrɛ tɛ adamaden ta dunuɲalatigɛ ra.
Waajurikɛbaga nana min faamu, o ye ko adamaden tɛ se ka nafa foyi sɔrɔ ni Ala ma min di a ma.
Nin kitabu ta karan kunba ye ko adamaden ka kan k’a jigi la Ala kelenpe le kan. Ka bori naforo nɔ fɛ, walama ka naforo caman lajɛn, walama ka i yɛrɛ sɛgɛ baara ra, walama ka i diyanyafɛnw sɔrɔ, o si tɛ foyi ye, ni i ma Ala sɔrɔ.
Kitabu kɔnɔkow
Adamaden ta dunuɲalatigɛ tɛ foyi ye (1–2)
Ko bɛɛ ni a kɛwagati lo (3.1-8)
Ko bɛnbari caman bɛ kɛ dunuɲa kɔnɔ (3.9–11.6)
Alaɲasiran le bɛ ko bɛɛ ɲa (11.7-10)
1
Kuma damina
1 Nin ye Waajurikɛbaga ta kuma ye, masacɛ Dawuda dencɛ, min tun siginin bɛ Zeruzalɛmu:
Dunuɲa ta kow si tɛ kokura ye
2 Gbansan, ani gbansan, ne Waajurikɛbaga ko ten!
Gbansan, ani gbansan, fɛn bɛɛ ye gbansan le ye!
3 Adamaden bɛ ɲagban min bɛɛ la a yɛrɛ kan dugukolo kan yan,
a bɛ mun nafa le sɔrɔ o ra sa?
4 Duruja dɔw bɛ taga, dɔw bɛ na olugu kɔ,
nka dugukolo b’a nɔ ra tuma bɛɛ.
5 Tere bɛ bɔ, tere bɛ ben;
o kɔ, a bɛ teliya ka sekɔ ka taga a bɔyɔrɔ ra tuun.
6 Fɔɲɔ bɛ fiyɛ ka taga woroduguyanfan na,
ka yɛlɛma ka taga sahiliyanfan na.
A bɛ munumunu, ka munumunu,
ka kɔsegi ka tɛmɛ a tɛmɛsirakɔrɔw fɛ tuun.
7 Bajiw bɛɛ bɛ woyo ka taga kɛ kɔgɔji ra,
nka kɔgɔji tɛ fa ka ye.
Bajiw bɛ deri ka woyo ka taga fan min na,
o bɛ woyo ka taga o fan kelen le ra tuma bɛɛ.
8 Sɛgɛ min bɛ danfɛnw bɛɛ kan,
mɔgɔ da tɛ se ka o bɛɛ ɲafɔ.
Ɲaden tɛ fa flɛri ra,
toro fana tɛ wasa lamɛnni na.
9 Ko minw tɛmɛna kakɔrɔ, o ko kelenw le bɛ nana tuun,
ko minw kɛra kakɔrɔ, o ko kelenw le bɛ kɛra tuun,
ko si le tɛ kokura ye dugukolo kan yan.
10 Hali ni mɔgɔ ka ko dɔ ye, k’a fɔ ko:
«A flɛ, nin ko ye kokura ye!»,
i bɛna taga a sɔrɔ ko o ko tun bɛ kɛra kakɔrɔ
kabini wagatijan tɛmɛninw na.
11 Ko minw tɛmɛna ka ban, an hakiri tɛ to o ra tuun.
Ko minw fana bɛna kɛ tuun,
kɔfɛmɔgɔw hakiri tɛna to o kow ra.
Adamaden ta hakiritigiya tɛ foyi ye
12 Ne Waajurikɛbaga, ne kɛra Izirayɛli masacɛ ye; ne siginin tun bɛ Zeruzalɛmu. 13 Ko o ko bɛ kɛ dunuɲa kɔnɔ, ne ka ne yɛrɛ timinadiya ka ɲininkari kɛ o kow bɛɛ ra kelen kelen, k’a sɛgɛsɛgɛ ni hakiritigiya ye. O ye sɛgɛba dɔ le ye, Ala ka min doni la adamadenw kan.
14 Ayiwa, ne k’a kɔrɔsi k’a ye ko baara o baara bɛ kɛ dugukolo kan yan, ko o bɛɛ ye gbansan le ye; a bɛ i ko mɔgɔ min bɛ borira fɔɲɔ kɔ, ko a b’a mina.
15 Fɛn min kuturunin lo kakɔrɔ, o tɛ se ka lateren.
Fɛn min tɛ yi, o tɛ se ka jate.
16 Ne k’a fɔ ne yɛrɛ kɔnɔ ko: «A flɛ, minw sigira masaya ra ne ɲa Zeruzalɛmu, ne ka ne ta hakiritigiya bonya, k’a caya ka tɛmɛ olugu bɛɛ ta kan. Ne ka hakiritigiya ni lɔnniya caman sɔrɔ.» 17 Ne ka ne yɛrɛ timinadiya, janko k’a lɔn fɛn min ye hakiritigiya ye, ani k’a lɔn fɛn min ye fatɔya ni nalomanya ye. Nka ne nana a ye ko o kow bɛɛ fana bɛ i ko mɔgɔ min bɛ borira fɔɲɔ kɔ, ko a b’a mina. Sabu,
18 Hakiritigiyaba, jusukasiba!
Lɔnniya caman, sɛgɛ caman!