68
Egvu-ọma, Dévidi deru nụ onye ishi egvu
1 Tẹ Nchileke zilihu; tẹ ndu
ọhogu iya gbaa nanụ nanụ!
Tẹ ndu ọ dụ ashị shikwa
iya l'ifu gbakashịhu!
2 T'ọ bụkwaru ẹge phẹrephere
ephekashịje ẹnwuru-ọku;
bụ ẹge ii-phekashi ẹphe nanụ nanụ.
Mbụ t'ọ bụru ẹge ụmu,
a ngabẹru l'ọku angazehuje;
bụ ẹge ndu akirishi
a-lakọta l'iyi l'ifu Nchileke.
3 Obenu lẹ ndu doberu
ẹka ndoo a-nọdu ete ẹswa;
ẹhu atsọo ẹphe ẹna l'ifu Nchileke.
Ẹphe e-gude ẹhu-ọtso-ẹna
l'ete ẹswa eteshi iya ike.
4 Unu gụa egvu nụ Nchileke.
Unu gụa egvu gude kele iya ekele!
Unu kutseje onye ono,
nọ l'ụgbo-ịnya iya agba
l'urukpu ono ekutse.
Ẹpha iya bụ Ojejoje.
Unu nọdukwa iya l'ifu tee ẹswa.
5 Nchileke nọ l'ufu iya, dụ nsọ;
mbụ onye bụ iya bụ nna;
ndu nna ẹphe ẹ-ta nọhedu;
bụru onye agbajẹru ụnwanyi,
maa tụfuru ọdzori.
6 Nchileke emeje tẹ ndu nọ
nkịnyi nweru ẹke a-bụru ẹphe ufu.
Oomeje tẹ ndu a tụru mkpọro
nweru onwẹphe
l'ẹhu-ọtso-ẹna.
l'ẹhu-ọtso-ẹna.
Obenu lẹ ndu kwefuru iya
íkè bụ l'alị, anwụ chinwuru
echinwu; bẹ ẹphe ebuje.
7 Nggụbe Nchileke;
teke i duru ndu nke ngu;
je eswee alị, daburu swanmangu;
8 bẹ alị nmaru jijiji; igwe achịa ọbaru-ugbo
l'ifu nggụbe Nchileke.
Ugvu Sáyịnayi anmakọta jijiji l'ifu Nchileke;
mbụ nggụbe Nchileke kẹ Ízurẹlu.
9 Nggụbe Nchileke;
i meru tẹ mini chịa nshinu;
gude iya mee tẹ alị ngu
shihu ike teke ike gvụru iya;
10 ndibe ngu alaa l'alị ono je eburu.
Nggụbe Nchileke eshi l'eze
iphe i nweshiru; nụ ndu ụkpa
iphe mkpa iya dụru ẹphe.
11 Ọ bụ Ojejoje tụru ekemu ọbu;
a dụ l'igwe raa ya arara; sụ:
12 “Ndu eze; mẹ ndu sọja ẹphe; bẹ gbaru igbafu.
Ẹphe gbaru igbafu!”
Ụnwanyi akụru l'ufu;
l'eke iphe a kwaru l'ọkwata.
13 Ndu k'unwoke azẹru
l'ọdu-atụru, dụ l'ọ bụ ẹ́bà
ndo, a wụru mkpọla-ọcha;
bya egude mkpọla-ododo;
mee ẹ́bà iya ono;
yo gbu nwịinwii.
yo gbu nwịinwii.
14 Teke Ọkaribe-Kakọta-Ike
chịkashiru ndu eze l'alị ono;
b'ọ dụlephu l'ọ bụ aka-mini,
dashịru lẹ Ugvu Zalụmonu.
15 Ugvu kẹ Nchileke b'ọ bụ;
mbụ Ugvu Báshanu.
Ọ bụ ugvu, nwegbaaru njakata njakata.
16 Unubẹ eze ugvu, nwegbaaru njakata;
?bụ ngụnu kparu iphe unu
ejiru ugvu Nchileke ijimẹnya;
mbụ ugvu ono,
Ojejoje, bụ Nchileke fọtaru
lẹ ya e-buru; chịa ndu
nk'iya gbururu jeye lẹ gbururu ono.
17 Ụgbo-ịnya kẹ Nchileke;
bụkwa ụnukurunu.
Nnajiufu shi lẹ Sáyịnayi
gude ụgbo-ịnya iya ono,
bụ ụnukurunu ono bya ẹke o doberu nsọ.
18 Teke o gbeshiru lashia l'imigwe;
b'ọ chịtaru igweligwe ndu
ọ lụtaru l'ọgu; kpuaru onwiya.
Ndiphe; mbụ jeyekpo lẹ
ndu shi kwefuru ngu íkè;
nụshiru iya iphe k'ẹwoma;* 68:18 Éfe 4:8.
Ojejoje, bụ Nchileke e-bu l'ẹke ono.
19 T'ajaja bụru kẹ Nnajiufu;
mbụ Nchileke ọphu bụ onye ndzọfuta ayi;
onye evutaje ivu ẹhu ayi mbọku-mbọku.
20 Nchileke ayi bụ Nchileke, adzọje ndzụ.
Yọ bụru l'ẹka Ojejoje,
bụ Nnajiufu ono; bẹ eeshije nahụ anwụhu.
21 Nchileke e-gwe ndu ọhogu iya ishi rakaraka;
mbụ kpua ẹphe akpọ l'ishi;
mbụ ndu emekwadu ẹjo iphe.
22 Nnajiufu sụru: “Lẹ ya e-je Báshanu;
je eduta ndu ọhogu unu.
Ya abaa l'ime ebo
eze ẹnyimu; je eduta ẹphe;
23 k'ọphu unu e-gbu ẹphe pyaapyaa;
nkụta unu ekee anụ ẹphe
ẹge dụ ẹphe mma.”
24 Nggụbe Nchileke;
onyemonye ọbule phụwaru
ẹge ndibe ngu dzeberu awụ
ala; mbụ ẹge ndibe
nggụbe Nchileke, bụ eze mu
dzeberu awụ ala l'ụlo ono, dụ nsọ ono.
25 Ndu agụru ẹphe egvu vu ụzo.
Ndu kẹ nkwa etsoru ẹphe.
Ndu ọphu bụ
ụnwu-mgbọko bụ ọsa bẹ ẹphe ayọ.
26 Unu jaa Nchileke ajaja l'edzudzu ọha!
Unu jaa Ojejoje ajaja l'ẹke
ndu Ízurẹlu dzuru edzudzu!
27 Ndu edu ẹphe bụ ndu ikfu
Bénjaminu, bụ ndu ikfu kẹ nwata.
Ndu ishi k'ikfu Júda;
ndu ishi k'ikfu Zébulọnu;
mẹ ndu ikfu kẹ Náfutali
awụ gidigidi etso ẹphe.
28 Nggụbe Nchileke;
rụkotanu ẹhu!
Koshinu ike ngu Nchileke!
Mbụ ike ono, i gudehawa
mee ire l'okfu ẹhu ayi ono.
29 Ndu eze e-gude k'eze-ụlo ngu,
nọ lẹ Jerúsalemu
bya emeeru ngu iphe-ọma.
30 Baaru ẹjo agiyi ono, nọ l'eji ono m̀bà:
mbụ mba ono, achị ndiphe
l'ọ bụ oke-eswi, eme ẹnari,
achị nwa-eswi ono;
jeye teke onyemonye ọbule
e-wozita onwiya alị;
gudelehaa mkpọla-ọcha wotaru ngu.
Chịkashia ndu ono,
ẹgu ọgu anọduje agụ l'ọ bụ ẹgu nri ono!
31 Ndu anọ-chi ẹnya ndu
Íjiputu a-bya;
ndu Itiyópiya abya
achị-lia ẹka kfuru nụ Nchileke.
32 Unu gụa egvu nụ Nchileke;
unubẹ alị-eze ụnwu eliphe l'unu ha!
Unu gụa egvu gude tua Nnajiufu ẹpha!
33 Unu gụaru iya onye ono,
anọduje l'ụgbo-ịnya iya
agba l'urukpu ndiche ono,
nọ l'ephekerephe ono;
mbụ onye ono, olu iya adaje
l'ọbu egbe-igwe ono.
34 Unu raa ya arara;
mbụ ẹge ike Nchileke habe nshinu;
mbụ onye ọdu-biribiri iya
tụkoru Ízurẹlu sweta;
onye bụ akpamigwe
ekoshije ẹge ike iya ha.
35 Nggụbe Nchileke;
ị dụ biribiri l'ụlo ngu, dụ nsọ.
Ọ bụ nggụbe Nchileke
kẹ ndu Ízurẹlu anụje ndibe
ngu ike mẹ agburu-ẹhu.
T'ajaja bụru kẹ Nchileke!