108
Egvu-ọma, Dévidi deru
1 Nggụbe Nchileke;
obu shihukwaru mu ike;
k'ọphu bụ lẹ mu e-gude
obu mu l'ọ ha gụa egvu; kụaru ngu nkwa.
2 Unu tehu mụru ẹnya;
unubẹ ogumogu; mẹ ụbo;
kẹle mbẹdua e-gudekwa
egvu gụ-tee nchi-abọhu lẹ mgbẹnya.
3 Mu a-nọdu l'ifu iphe bụ
mbakeshi jaa ngu ajaja; nggụbe Ojejoje.
Mu anọdukwaphu
l'edzudzu ọha gụaru ngu egvu;
4 kẹle n-yemobu ngu ha nshinu.
Ọ tụko imigwe l'ọ ha kakọta l'eli.
Abụbu, ị bụ o-me-g'o-kfuru
atụko akpamigwe dzuru.
5 Koshinu ndiphe ẹge ị hatebe nshinu;
mbụ l'ị nọ-ghataru
akpamigwe anọghata;
tẹ ndiphe mgburumgburu
phụ ẹge ị dụ-be biribiri.
6 Gudenu agburu-ẹhu ngu
dzọfuta ayi.
Nggu aza ayi oku;
k'ọphu ee-shi ẹge ono dzọo ndu i yeru obu.
7 Nchileke nọwa l'ụlo iya,
dụ nsọ kfua okfu; sụ:
“Lẹ ya a-tụ okokooko
gude kee alị ndu Shékemu;
bya ewota nsụda Súkọtu washịa.
8 Gíledu bụ nk'iya;
Manásẹ abụru nk'iya
Ífuremu bụ okpu, ya kpu l'ishi.
Júda abụru mgbọro-eze,
ya apajẹ l'ẹka.
ya apajẹ l'ẹka.
9 Móabu bụ efere, ya akwọje ọkpa;
Édọmu abụru ẹke ya
eyeshije akpọkpa iya dobe.
Ndu Filísutiya;
bẹ ya a-tụru okokooko kpua.”
10 ?Bụ onye e-duru mu
je edobe lẹ mkpụkpu ono,
a kpụru kpụshia ya ike ono?
?Bụ onye e-duru mu duba lẹ Édọmu?
11 Ọ kwa nggụbe Nchileke bụ onye ọbu.
Obenu l'ị jịkawaru ayi.
Ọphu iitsojehedu ndu sọja ayi l'eje ọgu.
12 Yenuru ayi ẹka; t'ayi
mekputa ndu ọhogu ayi;
kẹ l'ẹka ọphu ndiphe
eyetaru madzụ kwa iphe mmanu b'ọ bụ.
13 Obenu lẹ Nchileke -nọduwa
l'ẹke iya nk'ayi;
bẹ ayi e-mekputa-a ndu ọhogu ayi.
Yọ dzọo ndu ọhogu ayi ono pyakapyaka.