89
Ẹ́vù, Etanu, bụ o-shi-l'eri Zera raru
1 Mu a-gụ egvu gude kfua ẹge
n-yemobu Ojejoje habe.
Mu a-gụ iya jeye lẹ tutu yoyo.
Mu e-gude ọnu mu kfua
t'ọgbo, nọnu maru l'ị bụ
o-me-g'o-kfuru.
o-me-g'o-kfuru.
2 Mu a-ra iya arara;
lẹ n-yemobu ngu a-nọ jeye lẹ tutu yoyo.
Ọ bụ ẹge-a akpamigwe ngụru angụru-a
bụ ẹge iphe i kfuru angụjeru.
3 Ị sụru l'onye ị fọtaru;
bẹ nggu l'iya gbawaru ndzụ;
l'i riru Dévidi, bụ nwozi ngu angụ; sụ:
4 “L'ii-me awa iya t'ẹ b'ọ chịhu
achịhu jeye tẹ tutu yoyo;
nggu emee aba-eze iya
t'ọ ngụru angụru tsube
l'ọgbo sweru ọgbo.”
5 Imigwe l'ọ ha atụ ọnu
ẹge ị dụ-be biribiri
nggụbe Ojejoje.
nggụbe Ojejoje.
Ookoshikwaphu l'ị bụ
onye evudoshije ike l'ẹke
ndzuko ngu nọ.
6 Mbụ; ?bụ onye lẹ ndu,
bụ l'imigwe bẹ aa-tụru yeru Ojejoje.
?Bụ onye lẹ ndu nọ l'imigwe;
bẹ aa-tụru yeru Ojejoje?
7 Ẹke ndu dụ nsọ k'imigwe
dzukoru bẹ aatsụjekwa Nchileke egvu.
Ọ kakọta ndu nọ-pheru iya
mgburumgburu ọdu egvu.
8 Nggụbe Ojejoje;
nggụbe Nchileke,
bụ Ọkaribe-Kakọta-Ike;
?bụ onye dụ l'ọ bụ nggụbedua.
Ị ha nshinu;
nggụbe Ojejoje.
nggụbe Ojejoje.
Ẹge ono bẹ ovudoshi ike
l'iphe ị vudo nọ-pheru ngu mgburumgburu.
9 Oke eyii eze ẹnyimu bụ nggu b'ọ nọ l'ẹka.
Ẹjo akpara-mini bụ nggu atụzitaje iya.
10 Réhabu b'i gudewaru;
yọ daburu l'ọ bụ onye
e gburu egbugbu.
I gudewa ike ngu chịa
ndu ọhogu ngu;
ẹphe agbaa nanụ nanụ.
11 Igwe l'ophu bụ nke ngu.
Eliphe l'ophu abụru nke ngu.
Ọ bụ nggụbedua tụru ọkpa
mgboko l'ọ ha;
yẹle iphe bụ iphe nọ iya nụ.
12 Ụzo isheli; l'ụzo ọhuda bụ
nggụbedua meru iya dobe.
Ugvu Tábọ yẹle
Ugvu Hẹmonu anọduje
agụ egvu ẹhu-ọtso-ẹna
teke ẹphe nụru ẹpha ngu.
13 Oshi-ẹka ngu bụ agburẹhu kpụu.
Ẹka ngu shihuru ike;
ẹka-ụtara ngu aka.
ẹka-ụtara ngu aka.
14 Odobe-ẹka-ndoo yẹle ikpe,
vudo nhamụnha b'e gude
tọo ntọ-l'alị aba-eze ngu.
Ị kpajẹru n-yemobu;
mẹ ovudoshi ike l'iphe
i kfuru ye;
i kfuru ye;
yo vutaru ngu ụzo l'iphe bụ iphe iime ememe.
15 Ọnu-ọma bụ kẹ ndu,
mụtawaru t'ẹphe kpọ-kuje ngu;
mbụ ndu bụ iphoro,
shi l'ẹke nggụbe Ojejoje nọ;
bẹ ẹphe egudeje eje.
16 Ẹphe egudeje ẹpha ngu ete
ẹswa mkpụrumkpuru.
Ẹphe anọduje akpọ-ku ngu
l'ị bụ onye doberu ẹka ndoo.
17 Kẹ l'ọ bụ nggu bụ ike,
dụ biribiri, ẹphe nweru.
Ọ bụ okfu l'ayi nọ ngu l'obu
meru iphe iimeje tẹ ike ayi kangoo.
18 Nggụbe Ojejoje; ọ bụ nggu;
bẹ nụru ayi onye mgbochita.
Ọ bụ onye nsọ kẹ ndu
Ízurẹlu; bẹ eze ayi shi l'ẹka.
19 O nweru teke i gude àphụ̀
zia ndu nke ngu ozi;
sụ: “L'i mewaru tẹ
agburu-ẹhu kalẹru onye sọja lanụ.”
Nggu abyawa l'ẹke ndibe
ngu nọ; bya afọta onye lanụ;
mee ya t'ọ bụru onye
ndiphe a-nọdu akwabẹ ugvu.
20 L'ị phụwaru nwozi ngu,
bụ Dévidi.
bụ Dévidi.
L'i wowaru manụ ngu,
dụ nsọ wụa ya l'ishi.
21 Sụ l'ọ bụ ẹka ngu;
bẹ ii-gude mee ya;
yọ ngụru angụru;
mbụ l'ọ kwa nggụbe Nchileke
emeje tẹ ike ka iya adụdu.
22 Ẹ to nwedu ndu ọhogu iya,
a-dụ ike kebuta iya t'ọ tụjeru ẹphe ụtu;
ọphu ndu akirishi 'ahadu iya.
23 Ndu achị iya nụ;
bẹ ịi-nọdu iya l'ifu dzọpyashia;
chitsushikota ndu ọ dụ ashị.
24 N-yemobu ngu yẹle ovudoshi ike
l'iphe i kfuru; bẹ e-swijeru iya.
Yọ bụru ẹpha ngu;
bẹ oo-gude ike iya kangoo.
25 Alị-ezi iya; bẹ ii-me tọ jaa ajaja;
mbụ t'o shi lẹ eze ẹnyimu;
saa jeye lẹ Ẹnyimu Yufurétusu.
26 Ọo-nọduje araku ngu; sụ:
“L'ọo nggu bụ nna iya;
bụru Nchileke iya;
bụkwaruphu
agbara-mkpuma, adzọfutaje iya nụ.”
27 Nggụbedua l'onwongu
e-me iya; t'ọ bụru ọkpara ngu;
mbụ t'ọ bụru iya a-katsụa
l'iphe bụ ndu eze, nọ lẹ mgboko-a.
28 N-yemobu ngu l'ẹke, ọono a-bụru ojejoje.
Ọgba-ndzụ nggu l'iya ta
byadụ bya amịnga amịnga.
29 Awa iya bẹ ii-me;
t'ẹphe ba achịhu achịhu
gbururu jeye lẹ gbururu.
Alị-eze iya bụ ẹge igwe
a-nọ-bebe bụ ọo-nọ-bebe.
30 “Ọ -bụru l'ụnwu iya
jịkaru ome ekemu ngu;
jịka otso iphe ị tụru ọkpa iya;
31 ọ -bụru l'ẹphe dakaru ome-l'alị,
ị tụru doberu ẹphe;
jịka ome iphe ị sụru t'ẹphe meje;
32 bẹ ii-gude mgbọro-ígwè
hụ̀a ẹphe àhụ̀hù;
mbụ gude ẹchachi hụ̀a ẹphe
k'iphe dụ ẹji, ẹphe eme.
33 Ọle tịi hakwanu ẹphe oyeru obu;
ọphu ịi-hadu ovudoshi ike,
l'iphe i kfuru l'ii-me.
34 L'ẹ ndzụ, nggu l'ẹphe gbaru b'ẹ tii mebyidu;
ọphu ịigba-nwedu iphe
shiwa ngu l'ọnu lụfuta.
35 L'i gudewa kẹ l'ị dụ nsọ
ria angụ ugbo lanụ sefu ẹka;
l'ẹ to nwedu l'ị dzụaru Dévidi ẹjo-ire;
36 l'awa iya a-nọ gbururu jeye gbururu;
l'ọ bụ ẹge ẹnyanwu a-nọ-bebe;
bụ ẹge alị-eze iya a-nọ-bebe.
37 L'ii-me iya t'ọ nọo gbururu
jeye lẹ gbururu l'ọ bụ ọnwa,
bụ iphe agba ekebe
l'akpamigwe l'ị bụ
o-me-g'o-kfuru.”
o-me-g'o-kfuru.”
38 Obenu l'onye ono,
ị wụru manụ l'ishi ono;
b'ị jịkawaru; gbado iya.
Ẹhu eghuwa ngu
eghughu l'ẹke ọono.
39 I jịkawaru ndzụ,
nggu lẹ nwozi ngu gbaru;
wotawa okpu-eze iya gwọo l'alị.
40 Ụpho-mkpuma iya l'ọ ha;
b'i tsukposhikotawaru;
tsuwaa ụlo-mgbochi iya yọgiriyogiri.
41 Ndu l'eswe esweswe
gwowaru iphe ya tụtu-a.
Ndu obutobu iya bụ-wa iya;
bẹ ẹphe egudeje eme iphe ọchi.
42 I mewaru tẹ ndu ọhogu iya mekputa iya.
I mewaru t'ẹhu tsọ ndu ọhogu iya ẹna.
43 I mewaru; ogu-mbeke ya;
yọ swịkobe aswịkobe;
bya emee t'ọo dụjehe ike
vudoshia ike l'ifu ọgu.
44 I meru; ugvu, o nweru arụshihu;
mewa aba-eze iya;
yọ gwọo l'alị.
45 I meru iya;
yọ kahụ lẹ nwokoro;
bya emeru iphere
kpua ya l'ọ bụ
uwe-nlọkpuru.
uwe-nlọkpuru.
46 Nggụbe Ojejoje;
?bụ teke ole;
bẹ ọo-dụ ẹge-a dụ-bebe.
?Ii-domiwaru onwongu jeyewaru tọo?
?Bụ teke ole;
bẹ ẹhu-eghughu ngu e-nwu
l'ọ bụ ọku nwubebe?
47 Byiko; nyatakwa ẹge
ndzụ mu dụ-be mkpirikpi;
kẹle madzụ, i meru, bụ iphe mmakanụ.
48 ?Bụ onye a-nọ ndzụ
t'ẹ b'ọ nwụhuhe anwụhu?
?Bụ onye a-dụ ike dzọo
onwiya; t'ẹ b'ọ laa maa.
49 Nggụbe Nnajiufu;
?bụ awe b'i dobehunuru
eze n-yemobu obu ngu ono;
mbụ n-yemobu ono,
i gude kẹ l'ị bụ
o-me-g'o-kfuru ribuaru
Dévidi l'angụ ono?
50 Nnajiufu; nyatakwa ẹge
e metabewaru nwozi ngu iphe-iphere;
mẹ ẹge mu tatabewaru nshi
l'ọchi, ndiphe achị mu;
51 mbụ ewena, ndu ọhogu
nggụbe Ojejoje anọduje aja onye ono,
ị wụru manụ l'ishi ono
ewena l'ẹkemeke ọbule,
ọ tụru ọkpa iya.
ọ tụru ọkpa iya.
52 T'ajaja bụru kẹ Ojejoje jeye lẹ tutu yoyo!
Ono kwa ẹge ọ dụ;
bụru ẹge ono b'ọ dụ.