83
Egvu-ọma, Ásafu deru
1 Nggụbe Nchileke;
ba dahụkwa nkịchi.
Ba anọdushinu nwangijinggiji;
nggụbe Nchileke;
ba dashịnu rịgbidingu.
2 ?Ị phụwaru ẹge ndu
ọhogu ngu aphụ temutemu;
mẹ ẹge ndu ị dụ ashị
etsuru ngu ẹka l'ọkpoma.
3 Ẹphe gude ẹregede
l'achị idzu ndibe ngu;
mbụ l'achị iphe ẹphe
e-me ndu nọ ngu l'obu.
4 Ẹphe sụru t'ẹphe bya
t'ẹphe lụa ọha ono;
t'ẹphe mee t'ẹ b'ọ dụhe
onye a-nyatakwadu ẹpha Ízurẹlu ọdo.
5 Idzu bụ ẹphe nanụ
t'ẹphe mee ngu ẹjo iphe.
6 Ndu ono bụ ndu Édọmu;
ndu Ishimẹlu;
ndu Héga; ndu Móabu;
7 ndu Gibalu; ndu Amọnu;
mẹ ndu Amalẹku.
Ndu Filísutiya yịkwa iya phụ;
ndu Táya ayịru iya.
8 Ndu Asiriya byawaru bya etsoru ẹphe
t'ẹphe bụru agbaru-ike ndibe Lọ́tu.
9 Menua ẹphe iphe i meru Mídiya.
Mee ẹphe ẹge i meru Sizéra
yẹle Jabinu l'iku Ẹnyimu Kishọnu;
10 mbụ ndu ono, i meru;
ẹphe abụru kpurupyata lẹ Ẹ́nu-Dọo;
mee ẹphe; ẹphe abụru ọzu wụshiru l'alị ono.
11 Menua ndu oke amadụ ẹphe
iphe i meru Orẹbu;
mẹ Zẹbu;
mẹ Zẹbu;
nggu emekwaaphu ndu
ishi ẹphe iphe i meru Zeba;
mẹ Zalụmuna;
12 mbụ ndu ono, sụjeru:
“T'ẹphe lụta alị Nchileke nweru ono.”
13 Nggụbe Nchileke mu;
menua ẹphe t'ẹphe dụ l'ọ bụ uphuku;
mbụ t'ẹphe dụ l'ọ bụ ẹswa ereshi,
phẹrephere zikashiru.
14 T'ọ bụru ẹge ọku anọduje
adzụ phophopho l'ọswa;
m'ọ bụ ẹge ọku adaja taphutaphu l'ugvu
15 bụru ẹge ịi-da phukaphuka
l'ọ bụ oke phẹrephere chịa ẹphe ọso;
nggu egudekwaphu
oke phẹrephere ngu ono yee ẹphe egvu.
16 Menua t'iphere ji ẹphe ifu;
k'ọphu ndiphe a-wata ọcho
ụzo, ẹphe e-shi maru ẹpha nggụbe Ojejoje.
17 T'e meje ẹphe iphe-iphere;
meru ọtsu egvu ye ẹphe l'ẹhu tekenteke.
T'ẹphe tsọkwaa iphere laa maa.
18 Ẹphe amakwanụru l'ọ bụ
nggụbe onye ono, ẹpha
bụ Ojejoje ono
bụ Ọkaribe-Kakọta-Nụ
lẹ mgboko mgburumgburu.